PATHIAN ANPUIA SIAM I NIHNA CHU ENG NGE A AWMZIA?

 _Kohna mila nun: Engvangin nge khawvelah hian ka lo pian ve?_

— Rick Warren 

— 6 Sept., 2022

“A hriat lawkate chu ama Fapa ang taka awm turin a ruat lawk si a, a Fapa chu unau tam takte zinga fa tir a lo nih theih nan. Fapaah chuan kan bul leh pianhmang chu kan hmu si a" Rom 8:29.

A tir aṭangin, Pathian ruahmannaah chuan a Fapa, Isua anga siam che a tum a. Leilung siamtirah khan chu chu Pathianin a lo puang tawh si a, “Pathianin, ‘Kan anpuiin, keimahni ang takin mihring siam ila” a ti a ni. Gen 1:26 

Thilsiam zawng zawng zingah, mihringte chauh hi Pathian anpuia siam kan ni. Chu chu nihlawhna ropui tak a ni a – zahawmna a pe bawk che a ni.

Pathian anpuia siam nihna chu eng nge a awmzia ni le? A nihphung tak chu a zau em avangin chiang taka hriatfiah theih chu a ni lo, amaherawhchu kawng thenkhat han sawi ila:

Pathian anga thlarau nei i ni. I thlarau chu thi thei lo a ni a, lei taksa hi i la chhuahsan dawn a ni.

Finna i nei a. I ngaihtuah theia, thil i hisap thei a, harsatna i chingfel thei a ni.

Mi dang nena cheng ho thei i ni. Hmangaihna dik tak i pechhuakin i dawng thei a ni.

Chhia leh ṭha hriat theihna i nei a. A dik lo aṭangin a dik i hre thei a, chu chuan Pathian hmaah i dikzia a pholang thei a ni.

Amaherawhchu harsatna a awm: Pathian anpui i nihna chu a kim lo va, sual avangin a kal suala, a chhe ta a ni. Chuvang tak chuan Pathian anpui kan nihna kan hloh tawh chu kan neih let theihna turin Isua a rawn tir a ni.

Pathianin “kan anpui leh keimahni ang tak” a tih hi tu anpui nge? Isua Krista anpui hi a ni!

Bible chuan, “A hriat lawka te chu ama Fapa ang taka awm turin a ruat lawk si a, a Fapa chu unau tam takte zinga fa tir a lo nih theih nan. Fapa ah chuan kan bul leh pianhmang chu kan hmu a ni" Rom 8:29.

Bible chuan Isua chu “Pathian anpui ngei” (2 Kor 4:4), “hmuhtheih loh Pathian anpui” (Kol 1:15) leh “a ni chu a ropuina eng leh, a tak anpui ngei” a ti a ni. (Heb 1:3)

Miten an chhungte ang tak chu, “A fapa chu a pa ang chiah chiah” ti ten an sawi ṭhin. Miten ka fateah keimah ang an hmuh chuan ka lawm ṭhin. Chutiang chiah chuan Pathianin a fate chu a anpui leh amah ang chiah ni turin a duh a. Bible chuan, “Mihring thar, thutak felna leh thianghlimnaa Pathian anga siam khan inthuam bawk ula” min ti. Ephesi 4:24

Vawiinah hian i anpui ang chuan nung la, tichuan miten nangmah an hmuhin, i Pa vana mi chu i anzia an hre thei ang.

Ngaihtuah zui atan

* Krista ang turin engtin nge i beih ve ṭhin le?

* Eng kawngah te nge mi ten Krista chu i ang tawh reng a ni an tih theih ang?

* I nunah Krista-anna nungchang eng nge neih i chak le?

*Krista hre lovin Krista angin i awm thei lo*

Isua i rin chuan amah nen i nun bul chu i sualnate puangin i ṭan thar leh thei e. I nun chu ama hnenah i hlan thei a nih chuan hetiang hian ṭawngṭai rawh le. “Lalpa duh tak, misual ka ni tih ka inhria a, chuvang chuan i ngaihdamna ka dil a che. Isua Krista hi i Fapa a ni tih ka ring a. Ka sualna avangin a thi a, thihna hnehin i kai tho leh a ni tih ka hria e. Vawiin aṭang hian ka chhandamtuah ka pawm ta che a, i hnung zui turin ka inpeih e. Ka nun hruai la, i duhzawng ti turin min pui ang che. Isua hmingin ka dil a che. Amen”

Isua pawm tura i ṭawngṭai thei a nih chuan, he email-ah hian min lo hriattir la, min lo bia ang che Rick@PastorRick.com. Isua nena zinkawng i zawh ṭanna tura thil pawimawh a thlawnin ka pe dawn che nia.  

*[Lettu: Sangpuia]*