Ticker

10/recent/ticker-posts

MInister Lalruatkima St Anthony’s Hr.Sec.School Teachers’ day leh zirlai pass tharte chawimawina hun a hmanpui

Aizawl | September 6, 2022: Nimin khan St. Anthony’s Higher Secondary School chuan Teachers’ Day lawmna leh HSLC & HSSLC a hlawhtling te chawimawina hun Aizawl Vanapa Hall-ah an hmang a. Information Minister Pu Lalruatkima chu he hunah hian khuallian niin MBSE Chairman Pu JH Zoremthanga chu khual zahawm a ni.

(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

Minister Lalruatkima

Pu Lalruatkima chuan zirtirtute chu thalai te rilru leh ngaihtuahna buatsaihtute an ni a, kan ram future siamtute an ni, a ti. Kan piantirh atangin kan nu leh pa te hnen atangin zirtirna kan dawng tan a, chu chu kan chhungril ngaihtuahnaah intuhin kan nun a nghawng thui hle, a ti a. Kan zirtirtu ten zirlai bu leh nunphung zirlai pawimawh tak tak te min zirtir a, kan rilru put hmang leh khua leh tui tha ni turin kawng min kawhhmuh thin a ni, a ti. Zirlai bu min zirtir mai bakah zirtirtute chuan kan harsatna min hriatpui a, a sutkian theih dan kawng min zawnpui a, nun kawnga harsatna awm te hmachhawn dan thlengin min zirtir tiin Minister chuan zirtirtute pawimawhzia a sawi a. Zirlai hlawhtlingte lawmpuiin a bultanna chauh a ni tih hria a, kawng thui tak zawh tur an la neihah taimakna, tumruhna leh rinawmna nei tlat turin a chah a. Ram leh hnam kal zel tur atan entawn tur thil tha hnutchhiahtu ni tur leh Mizo hnam chawisang a, Mizoram chu India ram State dangte entawn tlak kan nih theihna turin zirlaite tan la leh zual turin Minister Pu Lalruatkima chuan zirlaite a sawm a ni.


Khual zahawm Pu JH Zoremthanga pawhin thu sawiin zirtirtu hna hi khawvel pawhin hna zahawm ber te zinga a chhiar a ni, a ti a. Zirtirtu tha chuan ram leh hnam, chhungkua leh khawtlang tana chhenfakawm ni turin a zirlai te a chherchhuak thin tih sawiin, taima leh rinawm taka an hna thawk turin zirtirtute a fuih a ni. MBSE Chairman chuan zirlai kalkhawmte fuihin nu leh pa te chawimawi a, zirtirtute thuawih nih tum zel turin a chah a. Zirlai hlawhtling tharte chu kawng tinrengah mi hlawhtling an nih theihna turin rinawmna leh taimakna nen hma lam hun hma chhawn zel turin a fuih a ni.

MBSE Chairman JH Zoremthanga

Teachers Day hi India ramah kum tin September ni 5 ah hman thin a ni a. India ram President pahnihna, Dr. Sarvepalli Radhakrishnan-a birthday pualin he ni hi hman thin a ni.

Nimin programme-ah hian HSLC leh HSSLC result chhuaka letter leh distinction hmu chin te chawimawina hlan an ni a. Nepali subject topper Subita Shaerma hnenah lawmpuina cheng 30,000 hlan a ni bawk.


Kum 2019 a din St Anthony’s Higher Secondary School hian kum 2020-2021 session ah khan HSLC pass 95.88% an nei a, HSSLC ah 100% an pass a. HSSLC Arts stream-ah top ten ah mi pali an nei a, subject topper an nei bawk. HSLC/HSSLC exam a top ten-a inhlangkai te hnenah hian pawisafai cheng nuai khat leh citation an hlan theuh a ni.


- DIPR


(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]
Post i hmuh dan

Post a Comment

0 Comments