Ticker

10/recent/ticker-posts

Grape wine sacrament a hmang turin BCM leh Champhai Grape Grower Society te'n inremna thuthlung ziak thar

Aizawl | Sept 6, 2022: Mizoram Council of Minister August ni 30, 2022 –a thukhawmin Mizorama chhunga kuthnathawktute Grape thar atanga Dan hnuaia Wine siam chhuah a phal leh avangin; vawiin khan Mizoram Baptist Kohhran leh Champhai Grape Growers Society chuan Sacrament atana wine siamchhuahte lei turin inremna thuthlung an ziak a. Inremna thuthlungah hian point hrang hrang 11 tarlan a ni.


Vawiin chawhnu dar 2:00 khan Baptist Church of Mizoram (BCM) leh Champhai Grape Grower Society te chuan inremna thuthlung (MOU) an ziak thar.

Inremnaah hian BCM Hqrs aiawhin General Secretary Rev R Lalbiaklianan hming ziakin, Champhai Grape Growers Society aiawhin an chairman Pu HS Vanlalfakzualan hming a ziak a, hriatpuitu atan Kohhran lam mi pahnih bakah Horticulture Department Joint Director leh Champhai S.P ten hming an ziak a ni.

Vawiina BCM leh Grape chingtu Society te inremna ziak hi kum hnih chhung atan ziak a ni a, an inremna ang chuan Wine siamchhuahna hmanrua chu Grade chauh a ni tur a ni a, Mihring taksa hriselna atana tha lo tur Wine ah hian a awm tur a ni lo tih niin, Sacramental Wine quality hi  Inremna ziah a nih angina, Mizoram Baptist Kohhran leh Champhai Grape Growers Society remtih dunna lo chuan a Bottle, A rawng, Acid tam lam, a rim leh a taste te tihdanglam a rem lo an ti bawk. 

Mizoram Baptist Kohhran hnuaia Committee sang, Administrative Committee chuan Kum 2014 khan Grape Growers Society te Sacramental Wine siam chu Sacrament a hman a tan a that leh that loh zirchiangin, a sample te vawi tamtak enho a nih hnuah Sacrament atan hman turin a pawm a, Hei hi Assembly Executive Committee ah leh Assembly ah te pawmpui a nih hnuah Champhai Grape Growers’ Society nen inremna ziakin Kum 2016 atangin Sacrament atan a lo hmang tan tawh a. Hetih lai hian Mizoram Sawrkarin Mizoram Liquor Prohibition Act a ennawnnaah Alcohol tel Wine siam leh zawrh a khap tak avangin Champhai Winery atanga Sacramental Wine lei tu Mizoram Baptist Kohhran chuan Sacrament atana Sacramental Wine a hman khaih lak hlek a ni a. Council of Minister in Kohhran serh leh sanga hman tur Wine siam chhuah a phal leh tak avangin Inremna hi ziah thar leh a ni ta a ni.

Mizoram Baptist Kohhran chuan kohhran serh leh sang pawimawh tak Lalpa Zanriah buatsaihna Sacramental wine siam chhuah chungchangah Champhai Grape Grower Society nen November 11, 2016 khan thawhhona thuthlung (MoU) siamin, hetatang hian Champhai Grape Grower Society te siam chhuah zel hi Sacramental Wine atan hman a ni a. Mizoram Baptist Kohhran chuan kan ram thar chhuah leh siam ngei Sacramental wine atana hman chhunzawm zel chu tha a ti a, vawiin, September 6, 2022  chawhnu dar 2:00 khan Winery Packing Hall, Champhai Winery, Tlangsam-ah Inremna (Memorandum of Understanding) hi pawl pahnih te hian an an ziak thar leh ta a ni.

MoU ziak tharna inkhawm hi Pu HS Vanlalfakzuala, Chairman, Champhai Grape Grower Society in a kaihruai a, Rev. PC Lalropuia, Bialtu pastor Champhai Pastor Bial-in Pathian hnena inkawltirna hun hmangin, Pu C. Zohmingliana, General Secretary, CGGS in Report a pe a. Khuallian Pu James Lalrinchhaan, Champhai DC leh BCM General Secretary Rev. R. Lalbiakliana ten thu an sawi hnuah MoU sign a ni.


MoU hi kum 2 chhung atana ziak phawt a ni a, Sacramental Wine bottle khat hi 750ml niin, a man hi Rs. 140 a ni. Excise duty, Road Transport leh Permit te Baptist Church of Mizoram in a buaipui ang. Sacramental wine quality; Bottle, Colour, Acidity, Taste leh a rim te hi MoU ziaktu te pahnih remtihna tel lovin tih danglam theih a ni lo vang.

Kohhran dangte pawhin he sacramental wine hi an hmang ve duh a nih chuan General Secretary BCM hnenah emaw, General Manager, CGGS hnenah emaw an thlen ang a, Party pahnih te remtihna in an hmang thei ang.

MoU Sign fel a nih hnu hian Sacramental Wine Bottle 600 chu BCM Tualchhung Kohhran hrang hranga hman turin phurh nghal a ni.
Post i hmuh dan

Post a Comment

0 Comments