THILPEK I DAWN KHA ENGTIN NGE I TIH DAWN?

Kohna mila nun: Engvangin nge khawvelah hian ilo pian ve?

— Rick Warren 

— 7 Sept., 2022

“Mi tinin thilpek in hmuh ang zelin Pathian khawngaihna tinreng enkawltu ṭhate angin, chung chuan rawng in bawl tawn ṭheuh rawh u” 1 Petera 4:10. 

Pathianin a siam chhan che i hria em le?  I tawpna tur chu i hria em le?

I tawpna tur thleng tur chuan, Pathianin thilpek a pek che hi hman dan i thiam a ngai a ni. Chung thilpek i dawn te chu nitina i nunpui ṭhinte an ni.

Ṭhenkhatte chu nangma thuneihna piahlama mite an ni a, entirnan i nu leh pa, i ram leh i hnam. Chung bakah chuan – thlarau lam thilpek, rilru, theihna, mizia leh i tawnhriatte pawh a huam ang. Heng te hian nang chu danglam bik i nihzia an tarlang a ni.

Heng thilpek i dawn te hi a tam thei ang bera hmang chhuak turin mawhphurhna i nei a. Chutih rual chuan i thilpek dawn lo vah chuan mawhphurhna i nei lo thung a ni. Kawng dangin lo sawi ila, lemziak thiamna i dawn loh chuan, thiam taka lemziak tura beisei i ni lo. Khawl siam lamah thiamna i nei a nih loh chuan i ṭhenawm putarte engine oil takngial pawh thlak tura beisei i ni lo vang. 

Amaherawhchu Pathianin i thilpek dawn chu mi dangte tana ṭangkai taka hmang turin a beisei che a ni. “Mi tinin thilpek in hmuh ang zelin Pathian khawngaihna tinreng enkawltu ṭhate angin, chung chuan rawng in bawl tawn ṭheuh rawh u” 1 Petera 4:10. 

Vanram i thlen hunah chuan, Pathianin tu nen mah a khaikhin dawn lo che a, nangmah bik chiah kha a teh dawn che a ni. Thilpek i dawn kha engtin nge i tih le? Pathian rinna kha han neih belh hlek la chuan eng nge i tih theih ang le? Rom 14:12 ah chuan, “Kan zain Pathian hnenah mahni chanchin kan sawi ṭheuh tur a ni” tih kan hmu si a.

Thuthlung hluiah khan Estheri chanchin, Hebrai nula lal ni ta leh a mite a chhanchhuah dan kan hmu a ni. Pathianin a tum a tihlawhtlin theihna turin thil pathum a pe a, finna, hmelṭhatna leh rorel thiamna. Khing te avang khian, “Estheri chu a hmu apiangte duhzawng mi nih a kai a … Lal chuan hmeichhe dang zawng zawng aiin a hmangaih a, nula dang zawng zawng aiin a khawngaihna leh duhsakna a hlawh a, tichuan lallukhum a khumtir a.” Esther 2:15-17.  

Pathianin Estheri chu chhan neiin thilpek a pe a. Chutiang chiah chuan, Pathianin chhan neiin thilpek a pe ve che a ni. Estheri ang chiah hian Pathianin i thilpek dawn chu vawng ṭha tur leh – midang te tana mahni hmasial lo leh ui lova hmang turin a duh che a ni.

Pathianin Estheri chu lal nunrawng tak lak ata chhanchhuak turin thilpek a pe a. Engtin nge Pathianin thilpek a pek che chu mi dangte tan a hman ve ang le?

Ngaihtuah zui atan

* I tawpna tur thleng turin Pathianin thilpek a pek che hi i hriat a ngai. Chung thilpek i dawnte chu ziak chhuak la, i chhungkua leh in hnam tih dan leh chung bakah chuan – thlarau lam thilpek, rilru, theihna, mizia leh i tawnhriatte pawh.

* I thil ziah ho chu han en la. Nangmah inzawt la: “Mi dangte ṭhatna turin eng hi nge ka hman ṭan nghal ngai”?

* I thilpek dawnah chuan nangman mawh i phur a, mi dang thilpek dawnah chuan mawphurhna i nei lo. Engtin nge mi dang nena i inkhaikhin fo lohna turin bul i ṭan ang?

*[Lettu: Sangpuia]*