Ticker

10/recent/ticker-posts

ZPM MLA TEN TUIRIAL A SOLID WASTE MANAGEMENT CENTRE TLAWH

Aizawl 4th August, 2022: Tukin zing khan ZPM MLA te chuan Tuirial-a Aizawl khawpui bawlhhlawh paihna hmun, Solid Waste Management Centre (SWMC) a hmunah an tlawh.




ZPM Leader Pu Lalduhoma chuan, “Gate han luh chiah hian a hmun tura ruahman ni miah lovah bawlhhlawh a vum thur a. Kawng sirah bawlhhlawh a an chhek mai mai a, kal harsa khawpin a awm a, he kawr hian Tuirial lui a fin a; kan lui dunga bawlhhlawh paih lo tura min zirtirtu ber sawrkar ber hian lui dungah kan bawlhhlawh te a nawr liam hmiah hmiah a, a dik lo hle a, hei hi a pawi em em a ni,” a ti.

Pu Duha chuan, “Tunah hian district headquarters panga-ah SWMC tur hi cheng nuai 60 theuh pein hma an laktir a, building pakhat mah a la ding lova, pakhatmah a la function lova, hengte hi chak zawka hma kan lak loh chuan kan ram leilung kan ti chhe mek ni. Miin in an sa a, in an thiat a, ip a han khung mai theih loh motor liana trip tham mi pakhat pawhin  paih turte an nei a, chumi paihna hmun tur chu sawrkar hian a buatsaih reng reng lo a ni. Sawrkar berin a buatsaih miau loh chuan a rukin zanah kawngpui sirah te an paih a, kawngpuite a ti tawpin a ti bawlhhlawh a, tute paih nge kan ti a, a hnaivai vengten tlawmngaiin an thianfai leh a, a paihtute kan dem a, an paihtute hriatchian chuan hrem pawh a tha, chutihrual chuan heng mite hian paihna tur an nei miau lo a, khawnge an paih chuan ang, paihna tur hmun sawrkarin a buatsaih loh avangin hetiang hi a thleng a, kan sawrkar hian a tihtur hi a ti lo hle a ni,” a ti.

Pu Duha chuan, “Thingtlang khaw tam takah bawlhhlawh paihna an nei deuh thluah tawh a, chutah chuan bawlhhlawh an paih khawm a, a thlang kawrah a tawlh thla a, chutiang chuan kan ram lui lianah a luang khawm a, khaw tin thli hi kan ramah hian nungcha te tana chet hleihtheih loh turin kan siam mek a ni. Heti ringawt hian bawlhhlawh hi paih tur a ni lo a, hmuntina a darh tur kha hmun khatah pawi khawih tur khawpin i chhekkhawm teh ang,  helai hmun na na na hi chu ram leilung leh luipui a finnaah pawh luipui tichhe tham law lawin kan bawlhhlawh hi hmun khatah i paihkhawm teh ang u tih ang lek a ni. Chuvang chuan heng hianin awmzia a nei lo em em mai a ni. Hemi kawngah hian a mipui mimir hrim hrim pawh kan harh a, sawrkar pawhin hma a lak vat vat a ngai a,” a ti.

Dr Vanlalthlana, MLA chuan, “Solid Waste Management Centre hi kan veina a rei tawh a, Assembly Session-ah pawh kan lo sawi fo tawh a, tunah hian enkawltu nei lo ang maiin a awm a ni. He hmun hi UD& PA in AMC hnenah ni March ni 8, 2021 khan a hlan a, an inhlan hian a hmaa UD&PA hnuaia bawlhhlawh sawngbawlna enkawltu SIPMIU hian AMC hi la enkawlpui zel tura tih a ni. Tunah hian SWMC hi enkawltu nei lo ang mai niin, weight bridge pawh hman theih a ni tawh lova. Mipuite bawlhhlawh min thliar hrantir laiin SWMC lamah erawh bawlhhlawh pawh thliar hrang mumal tawh lovin, a remchanna  apiangah an paih mai mai tawh a ni ber a. Heng bawlhhlawh te hi lui kawr lamah paih liamin kan luitui leh nungchate tana hlauhawm thei dinhmunah a ding niin kan hria a, ennawn a tul hle a ni. Sawrkar hi kawng tha zawk zawh tura koh harh kan duh avangin helai hmun hi kan tlawh a ni,” a ti.
Post i hmuh dan

Post a Comment

1 Comments

  1. You've provided quite good information Waste Management Singapore here. This is fantastic since it expands our knowledge and is also beneficial to us. Thank you for sharing this piece of writing.

    ReplyDelete

He post chungchanga i ngaihdan lo sawi ve rawh: