MZP in zirlai hruaitu pass tharte lawmpuina hun hmang

Aizawl | August 5, 2022: Mizo Zirlai Pawl (MZP) General Headquarters Aizawl chuan nimin chawhnu dar 2 khan BS Farm-ah MZP chhungkua, Students' Union Leaders leh Hnam zirlai pual hruaitu pass tharte lawmpuina hun a hmang a. He hun hi MZP Vice president Pu Andrew F Lalramnghaka'n kaihruaiin, Serlui bialtu MLA Pu Lalrinsanga Ralte in khuallian niin a hmanpui.

Khuallian Pu Lalrinsanga Ralte chuan thu sawiin, MZP chhungkua, College Students' Union leaders leh Hnampual zirlai pawl ten, zirlai pawla inhmang chunga degree course hrang hrang result tha tak tak an nei avangin leh rank holder nei thahnem tak an awm avangin lawmawm a tih thu a sawi a. Zirlai hruaitute chu kan ram leh hnam engkimah dah hmasa turin a chah. 

Khuallian chuan, "Zirna hi kan ram leh hnam humhalhna tur atana hmanraw ṭha ber a ni" a ti a. Tum mumal tak nei chunga zir zel turin leh kan ram mamawh leh hnam tana mamawh chhanna ni turin kalkhawmte a fuih bawk.

Lalrinsanga Ralte chuan, "ṭhenkhat chuan mi hlawhtlinna chauh an hmuhsak a, hlawhtlinna chang tura an thawhrimna, tawrhna leh eng ang dinhmun harsa nge an hmachhawn an hmuhsak ngai lo!" a ti.

Lalrinsanga Ralte chuan, MZP in Zofate insuihkhâwm nana a hmalakna fakin, Hnampual zirlai pawl te MZP te nen thawhhona tha tak an neih chhawmnung zel turin leh mahni hnam ṭawng theuh humhalh turin a chah a. "Mahni hnam bil ṭawng hmusit chuan a hnam a hmusit a ni", chuvangin Mizo tawng tihausa tur chuan mahni ṭawng theuh kan humhalh a ngai a ni a ti. 

MZP President Lalnunmawia Pautu pawhin thu sawiin, "Vawiina MZP chhungkua, hnampual leh college SU hruaitu lawmpuina thilpek kan hlante, inkal zelna turah duhsakna kan hlan che u a. Line hrang hrangah in la kal darh anga, eng hna pawh thawk ula mahni hnam zahpui mai loin, mahni culture vawng rengin, kan pi leh pute aṭanga zonunzemawi kan neihte chhawm zel turin kan sawm che u" a ti.

Zirlai hruaitu pass tharte lawmpuina hunah hian College Students' Union hruaitu 63, Hnam Pual hruaitu pathum leh MZP General Headquarters executive committee member pathum an vaiin mi 69 hnenah lawmpuina thuziak hlan a ni.

Zirlai hruaitu pass tharte hi Mipa 49 leh Hmeichhia 20 an ni.