Ticker

10/recent/ticker-posts

Sports Minister Pu Robert Romawia Royte-in Lawngtlai District Sports Complex sakna tur lungphum a phum

Thlazing ni 16, 2022: Vawiin khan Mizoram sawrkara Sports & Youth Services Minister Pu Robert Romawia Royte chuan Lawngtlai District chhung Mampui khuaa Lawngtlai District Sports Complex sakna tur lungphum a phum.


Independence Day lawmna hun hman zawha Central YLA Playground-a lungphum phumna hun buatsaihah Sports Minister Pu Robert Romawia Royte chuan sawrkarin infiamna hmunhma ṭha awm lohnaah hmunhma ṭha buatsaih tura ruahmanna lian tak tak a kalpui thu sawiin, Lawngtlai District pawh Sports Complex lian leh changtlung tak nei hmasa pawl a ni tur chu a nihlawhthlak hle tih a sawi a. Infiamna kawnga Lawngtlai District ṭhalaite hmasawnna tur hna hrang hrang zingah Lawngtlai Vengpuia Astro Turf Football Ground siam hna chu ṭan a nih tawh thu sawiin, a dang pawh thawh chhoh zel a nih tur thu a sawi a. CYLA Playground mipui ṭhutna gallery chung khuh siam dan tur pawh ngaihtuah mek a nih thu sawiin, Lawngtlai East (Tuichhak) lampangah "Operation Mualzavata" hming chawiin football field leh infiamna hmunhma eng emaw zat siam beihpui thlak tum a nih thu a sawi bawk.

He hunah hian Sports & Youth Services, ICT & Tourism Board Vice Chairman Pu TC Pachhunga (Ex-MLA) leh Lai Autonomous District Council-a Chief Executive Member Pu V. Zirsanga te chu khual zahawm an ni a. LADC CEM Pu V. Zirsanga hian thu a sawi bawk a ni.

Sports & Youth Services Secretary Dr Lalrozama chuan hun a kaihruai a. Mizoram State Sports Council-a Assistant Engineer Er James Lalramnghaka chuan technical report pein, Lawngtlai District Sports & Youth Officer Pu H. Vanlalbiakzauva'n lawm thu sawiin hun a khar a ni.

Lawngtlai District Sports Complex sakna atan hian Sawrkar Laipui Ministry of Minority Affairs hnuaia Pradhan Mantri Jan Vikas Karyakram (PMJVK) aṭangin ₹ nuai 5,019.43 approval dawn a ni a. 90% (₹ nuai 4,517.49) chu Central sawrkar tum tur niin, 10% (₹ nuai 501.94) chu State sawrkar tum tur a ni.

District Sports Complex hi Lawngtlai khawpui aṭanga km 20 vela hlaa awm, Mampui khaw bulah sak tura ruahman a ni a. A sakna tur hi Central aṭangin 1st instalment (₹ nuai 2,258.74) dawn tawh niin, a hna pawh tender tawh a ni a, a thawk turin M/s Decor India, Guwahati te thlan niin, hna pawh ṭan thuai tum a ni.

Lawngtlai District Sports Complex project hnuaiah hian Artificial Football Turf (110m x 74 m), Synthetic 8-lane Running Track, Pavilion with Changing Room, Gallery, Multipurpose Indoor Hall, Volleyball Court, Basketball Court with Gallery, Tennis Court with Gallery, Futsal Ground with Gallery, Changing Room (2 nos), Approach Road with Parking, Public Toilet Block leh Gate, Security Cabin &  Counter sak hna te hi thawh a ni dawn a ni.


- DIPR
Post i hmuh dan

Post a Comment

0 Comments