Pachhunga University College-in lawmthu sawina hun hmang; Chief minister-in hmanpui

Aizawl 15th August 2022: Pachhunga University College chuan vawiin khan an auditorium-ah kawng hrang hranga hlawhtlinna an hmuh avanga lawmthu sawina Thanksgiving and Grand Celebration programme an buatsaih a. He hunah hian Mizoram Chief Minister Pu Zoramthanga chu khuallian a ni.


Pu Zoramthanga chuan Pachhunga University College lawmpuiin North East ah mai ni lo India ram pum huap pawha lang tham college tha Mizoramin a nei chu chhuanawm a tih thu a sawi a. Hmarchhak State ah chuan zirna kawngah a tha ber dinhmun hauh pha an ni a, khawtlang rawngbawlna - thisen pek, faina, thingphun uar leh ram ngaw humhalh kawngah pawh hmahruaitu an ni a, academic line chauh ni lo kawng dang tam takah hlawhtlinna ropui tak tak an hmu chho mek a ni, a ti. Mizoramin hmelma lian tak kan hmachhawn mek damdawi hmansual te, HIV, cancer leh natna dang hluar em em te, kan khawtlang nun tibuaitu thil tha lo te hi do turin thalai te an pawimawh Chief Minister chuan a ti a. Pachhunga University College zirlai leh zirtirtute fuihin an college atanga bul tan a, college dangte leh thalaite tan entawntlak ni thei tur khawpa tan la turin a fuih a ni.

Pachhunga University College hian July ni 20-21, 2022 chhung khan National Assessment and Accreditation Council (NAAC) assessment an hmachhawn a, July ni 26, 2022 khan Accreditation A+ Grade pek an ni a, Cumulative Grade Point Average (CGPA) 3.37 an hmu a ni. India Hmarchhaka NAAC A+ College pahnih awm-ah a score sang zawk niin, Hmarchhak college zinga NAAC grading a score sang ber a ni. Sawrkar laipui Ministry of Education hnuaia India rama zirna sang dinhmun endiktu, National Institutional Ranking Framework (NIRF) in ranking an tihchhuah thar berah, Pachhunga University College chuan College category-ah 45-na dinhmun a hauh phak bawk a ni. NIRF tehna atanga college tha zual 100 zingah hian hmarchhak atangin Pachhunga University College hi a tel pha awmchhun an ni. India ram chanchinbu lian, India Today chuan kum 2022 chhunga College tha zual ‘The Best Colleges in India' a thlan chhuah zingah Pachhunga University College (PUC) chu telh a ni a, Arts zirna-ah ram pumah 141 na a ni a, Science-ah ram pumah 167-na niin Commerce zirna-ah 183-na a ni bawk.

Pachhunga University College chu ramngaw neih that leh a humhalh kawnga a thawh that avangin India rama hetiang lam endiktu ‘Green Mentors’ Ahmedabad te chuan dinhmun sang ber ‘Platinum Rank’ chu kum 2021-2023 chhung atan an pe a. Sawrkar laipui Ministry of Education chuan Aizawl District chhunga ramngaw humhalh tha, vawng thianghlim leh bawlhhlawh sawngbawl tha chawimawina ‘District Green Champion 2021-2022’ chawimawina chu March ni 22, 2022 khan a hlan  bawk a ni.

Pachhunga University College NSS Unit te hian kum riat chhung (2015-2022) chu zirna in zinga a thlawna thisen pe tam ber lawmman a lo dawng tawh a. Kum 2022 pawh hian thisen unit 651 pein Educational Institution category-ah lawmman pakhatna a dawng leh bawk a ni. Mizoram University hnuaia College hrang hrangte inelna ‘Varsity Sports’-ah Pachhunga University College chu kum 6 chhung (2016, 2017, 2018, 2019, 2021, 2022)  ‘Overall Champion’ dinhmun a hauh thei a, a zawna champion rei ber dinhmun a hauh mek a ni. Hei bakah hian Department of Information & Communication Technology-in zirna in zinga website enkawl tha a thlan chhuah zingah Pachhunga University College chuan lawmman pathumna a dawng a, online hmanga admission kalpui dan ‘Best Online Service Initiatives’-ah lawmman pangana a dawng bawk a ni.

Vawiin programme-ah hian Mizoram University Vice Chancellor Prof. KRS Sambasiva Rao chu khualzahawm a ni a. Pachhunga University hlawhtlinna a lawmpui thu sawiin hmasawn zel turin duhsakna a hlan a ni. PUC Alumni Association aiawhin an President Pu Lalbiakthanga Khiangte in thu a sawi a. Mizoram Synod Moderator Rev.Dr.Vanlalnghaka Ralte chuan Pathian hnena lawmthu sawi tawngtaina hun a hmang a. An Principal Prof. H.Lalthanzara'n kalkhawmte lawmna thu sawiin IQAC Coordinator Dr Henry Lalmawizuala'n report a pe bawk.

- DIPR

Post a Comment

He post chungchanga i ngaihdan lo sawi ve rawh:

Previous Post Next Post