Lawngtlai | August 3, 2022: Lawngtlai Deputy Commissioner (Bawrhsap) Office chuan nimin khan an office staff, file khawihtu (dealing clerk)-te tan DC Conference Hall-ah 'Mizo Ṭawng Ziah Dan' zir hona an buatsaih.
He hun hi Additional DC Pu James Miahlung chuan kaihruaiin, ṭawng chu hnam rohlu pakhat a nih avangin mahni hnam ṭawng humhalh a, chawi san a, hman uar zel a pawimawh thu a sawi a. Ṭawng humhalhna atana pawimawh tak pakhat chu a hman dan dik taka hman leh a ziah dan dik taka ziah a nih thu sawiin, DC Office-a thawkte tan phei chuan lehkha tihchhuah tur reng reng ṭawngkauchheh dik leh ziah dan dik taka ziah a pawimawh lehzual a ni, a ti a. An thil zir turte ngun taka ngaithla a, chhinchhiah tum turin kal khawmte chu a chah a ni.
He hunah hian Government Lawngtlai College-a Mizo Department-a Assistant Professor Pu David H. Zothanpuia chuan DC Office dealing clerk kal khawmte chu "Mizo Ṭawng Ziah Dan" chungchanga hriat tur pawimawh hrang hrang, office hna thawhnaa hman nghal theih chi te zirtirin, mahni inzir belh zel theih dan tur kawng a kawhhmuh nghal a. Zawhna leh chhanna hun hlawk tak hman a ni bawk.
Tun hnai hian DC office chuan a theih ang angin ṭawng humhalhna kawngah hma an la chho va. DC office aṭanga mipui hriattirna leh thupek ang chi te pawh a theih chin chinah English version, Mizo version leh Lai version tein an tichhuak ṭhin a ni.
Post a Comment
He post chungchanga i ngaihdan lo sawi ve rawh: