Ticker

10/recent/ticker-posts

Hortoki VC leh NGO-in Civil Hospital Aizawl-a Zoramthari thihna dem; "Thil fello a awm a nih phawt chuan sorkarin a tih tur dik tak a ti ngei dawn a ni." - Health Minister

Aizawl | August 23, 2022: Hortoki VC leh NGO te chuan August 18 tuka an khaw nu Pi Zoramthari Civil Hospital Aizawl thawktute inthlahdah vanga nunna chan chu an dem thu thuchhuah siamin an tarlang.



Hemi chungchanga hian Health minister Dr R Lalthangliana chuan, "Thil fello a awm a nih phawt chuan sorkarin a tih tur dik tak a ti ngei dawn a ni." tiin Facebook page-ah post a siam.


Pi Zoramthari(Tebawihi) kum 35, W/o Pu Isak Malsawmsanga Hortoki khua, Aizawl Civil Hospital a a thih chungchanga Health Minister Dr.Thangtea kam chhuak.
Ni 18.8.2022 (Ningani)-a vanduaithlak taka boral ta, Pi Zoramthari (Tebawihi) kum 35, W/o Pu Isak Malsawmsanga Hortoki khua, Aizawl Civil Hospital-a a thih thu hian min ṭhâwng hle a. Ka thinlung takin pawi ka tiin, ka sûn a. A kalsan tak a pasal fanau, a chhûngte zawng zawng ka tuarpui takzet zet a ni.
Pi Tebawihi thih thuah an khua, Hortoki Village Council (VC) te leh Tlawmngai Pawl (NGO) zawng zawngin thuchhuah an siam pawh ka lo hmu a. An khaw nu thih chungchanga an thuchhuah hi an tih tur rêng ni pawh ka hria.
He thihna runthlâk tak chungchang hi, ngun zâwk leh fel zawkin enfiah a ni ang a. Inthlahdahna vang emaw, dâwngdahna leh inngaihsak lohna ang chi thil thleng a awm a nih chuan,  chutiang mi te chungah chuan dan angin Action lâk ngei a ni ang. Thil fello a awm a nih phawt chuan sorkarin a tih tur dik tak a ti ngei dawn a ni.

(He website kal zel theih nan hian fakna lo langte hi i lo hmet ve thin dawn nia.)
 
[News update awlsam taka i dawn theih nan telegram channel hi lo join ve ta che https://t.me/exploremizoramchannel ]


PRESS RELEASE VC & ALL NGO HORTOKI 
Pi Zoramthari (Tebawihi) kum 35 w/o Isak Malsawmsanga Hortoki hi mi hrisel leh harhvang tak niin, tuna a naupaiah phei hi chuan, "ka naupai tawh zawng zawngah ka la fit ber tum a ni". a ti nghe nghe a ni.
Nau neih a hun dawn hnai tawh a inhria in, Ni.4.8.22 ah Aizawl Civil Hospital ah check up turin an kal a, Ultrasound-a lo en in a nau ala hlat thu leh tui a pai tlem thu hrilh in Ni.12.8.22 ah kal leh turin leh an lo veitir tur thu sawiin an thlah a. Heta an kal leh pawh hian Nau ala hlat thu leh chhulkawngka ala in hawn zau loh thu lo hrilh in an hawtir leh a. Hetah hian Doctor te rawn chuang si lovin Nurse (kawr pawl ha) ten Ni 29.8.2022 a kal leh turin haw tir leh an ni a. Hortoki a haw tlang lovin Aizawl lamah chamchilh in an nghak ta a.
Ni.17.8.22 Zinglam Dar.9:00 atanga a pumna intan leh in a pumna hi a zing tulh tulh a, chhun Dar.12:00 ah chuan Damdawi In (Civil Hospital) bawk hi damna leh tha taka nau neih beiseiin an pan leh a, a pumna chu zual zelin dawn Dar.4:00 ah Nurse ten a dinhmun enfiah leh in, a chhul kawngka ala in hawnzau loh thu in an lo chhang leh a, ngaihtha taka an awm hnu in a pumna in zual lam a pan zel si a, nurse an rawn te lah chuan, "Fa pathum i nei tawh a, tha takin i nei mai ang" tiin a hriselna dinhmun pawh endik lo in a kalsan leh to mai a ni.
A pumna mangang lutuk tawh chuan "min zai mai rawh u" ti hial in a tawngchhuak tawh a, a awmpuitute pawh an mangang in an thlabar hle a ni.
Ni 18.8.2022 zing lam Dar 2 vel atang chuan a pumna pawh vawi khatmah a chawl tawh lova, a awmpuitu in Nurse duty ka va ko ang e a tih pawh in amah (Tebawihi) chuan va ko duh sub, san a pek hun nghak rawh u, min ti leh tho ang, awmzia a nei chuang lovang tiin a beidawng em em a. Mahse, na a tih tak em avangin a awmpuitu chu Nurse ko tura va kalin an muhil lai ava kaitho a, an lokal pawh in engmah a ni thei ta chuang lova, Ni 18.8.2022 zing lam Dar 6:30 ah a na tuar lovin a boral ta a ni.
 
He thihna chungchangah hian Hortoki Village Council leb All NGOs chuan hriatthiam harsa kan ti a, mi hausa zawk leh thiltithei zawk te dam khawchhuahna turah thingtlang mirethei ten nunna hlu tak kan chan hi na kan tiin pawl kan ti hle a, hetih laia Civil Hospital Aizawl a Nurse duty te hi kan dem takzet a ni. 
lnngaihsak lohna a vanga thihna hi thleng ngei a ni tih kan Chiang a, Tun hnu zelah hetiang hi thleng tawh lo se kan duh tak meuh meuh a ni. 

Dated: Hortoki,
The 23rd August, 2022

(H.VANLALSIAMA) (LALBEISEII) (L.ZORAMTHANGA) (LALHRUAIA ) (LALZAHAWMA ) (ZD VANLALVENA) 
(ZONUNDIKI) (LALRAMHMUAKI) (C.LALMUANKIMI) 




Post i hmuh dan

Post a Comment

0 Comments