An duh thua Tripura a pem Mizoram-a Bru vote nei sang khat chuang paih tawh!

Aizawl | Aug 8, 2022: An duh thu ngeia Tripura a pem thla a inbengbel tawh, mahse Mizoram electoral roll-a an hming la chuang Bru vote nei mi 1,259-te hming chu Mizoram electoral roll ațanga paih a ni tawh.

 

(He website kal zel theih nan hian fakna lo langte hi i lo hmet ve thin dawn nia.)

 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

 

 

 
Mizoram Joint Chief Electoral Officer Pu David Liansanglura Pachuau hnen aţanga AIR in thu a dawn danin hetianga Tripura electoral roll-a Bru vote nei hming thunte hi Tripura election hotute’n an rawn hriattir ve leh Mizoram electoral roll aţangin paih zel a ni a. Mamit district-a assembly bial pathum, Kolasib district-a bial thum leh Lunglei district-a assembly bial pathumah te Bru vote nei hi an la awm a ni.
Kum 1997 October ni 21-a Bru helhovin Dampa Tiger Reserve a nungcha humhalh hna thawktu Pu Lalzawmliana an kahhlum hnu khan Bru tam tak chu Tripura-ah an pem thla a. Tripura a an awmna tur siamsaka an awm chung pawhin Mizoramah vote an nei zui zel a. Hei hi Mizorama pawl hrang hrangin dodal mahse Election Commission of India-in ţan a khawh tlat avangin Mizoram inthlanna-ah vote an thlak zui zel a.
Kum 2020 January-a sorkar laipui, Mizoram sorkar, Tripura sorkar leh Tripura a awm Bru pawl hrang hrangte inremna angin vawi tam tak Mizoram a lo let tura tih hnu pawha lo kir duh lo Bru hnam mi 32,000 chuang chu Tripura-ah an inbenbel phalsak a ni ta a. He inremna zulzui hian Mizorama vote la neite chu Tripura electoral roll-a thun chhoh an ni ta a, chu’nghote hming chu Mizoram electoral roll aţanga paih a ni ve ta zel a ni.

 

- AIR News Aizawl