Ticker

10/recent/ticker-posts

Minister Lalruatkima'n Helen Lowry College Graduation Day hmanpui


 
Aizawl | July 26, 2022: Vawiin khan Information and Public Relations Minister Pu Lalruatkima chuan Helen Lowry College Graduation Day Cum Freshers' Social vawikhatna hmanpuiin, khuallian a ni.

Minister Pu Lalruatkima chuan kohhran college din Helen Lowry College Graduation Day Cum Freshers' Social vawikhat hmanna a sawm a ni chu lawmawm a tih thu sawiin, vawiin ni ngai pawimawh a, Mizoram Legislative Assembly Speaker ni tawh, Dr. Kenneth Chawngliana'n he hun a hmanpui theih avangin a chungah lawmthu a sawi bawk a. Minister chuan zirlai lo kal khawm ten vawiin ni a chawimawi an nih chhan an hriat a pawimawh thu sawiin, an thiamna te chu anmahni tan mai piah lamah, hnam tan, ram tana hmang zel turin a chah a. Mihring nun kal chho-ah lehkha thiam an hlu em em tih sawiin, mi tangkai khawtlang leh ram tana ban rinawm ni turin ram in a beisei a; mi hnawksak emaw ram leh hnam timualpho turin vawiin ni ah hian chawimawi an ni lo a ni a ti a. Minister chuan kohhran te hian Lal Isua in rawngbawlna a lo kalpui pawimawh tak- zirtirna leh tihdamna kawngah hma nasa takin a la a; chumi kal zelah Helen Lowry College pawh din lo niin, he college a zir chhuak te chu kohhran college chhuak an nih avangin mi pawhin an lakah beiseina sang tak an nei a ni, a ti a.
 

Minister Pu Lalruatkima chuan vawiin ni a zirlai hlawhtlinna changtute hian tumruhna an neih bakah, an tih hram hram rah kha vawiin hian an lo seng ta a ni, a ti a. Mi tumruh leh taima tan hlawhtlinna a in hawng zel a, a in hawng zel dawn bawk a ni tih sawiin, mahni in zir peih a pawimawh a, syllabus a awm lo zirtur tam tak nunah a awm teuh a ni a ti bawk a ni. Minister chuan hriat loh te hre belh zel tura inbuatsaih a ngaih bakah, marksheet a marks score piah lamah eizawnna neih a pawimawh a ni a ti a. Hlawhtlinna tehna pakhat chu eizawnna bul bal tha neih hi a ni tih sawiin sawrkar hna chauh hna a ngai lo a mahni kut kawih thiamna chi hrang hrang hmanga dingchhuak nih tum turin zirlaite a chah a. Vawiin a zirlai graduate leh fresher kal khawm te chu tum mumal tak nei a, hmachhawp leh hmabak mahni inzawt fo in, ngaihtuahna thuk tak nena lehkha zir turin a chah bakah an kal zelna turah duhsakna a hlan nghal a ni.
 

Helen Lowry College hi Kum 2017 khan din a ni a, vawiin ni a graduate mi 56 te hi kum 2021 leh 2022 a Mizoram University hnuaia exam paltlang te an ni a. Helen Lowry College ah hian Education, Political Science, Economics, English, Sociology leh Commerce zirna a awm a. Tun dinhmunah hian thawktu mi 20 awmin, zirlai mi 120 vel an awm mek a; zirlai te hi Mizoram leh Tripura atanga zir an ni.
 
- DIPP
Post i hmuh dan

Post a Comment

0 Comments