Aizawl | July 26, 2022: Vawiin khan Vety Polyclinic Hospital Conference Hall, Khatla ah kum 2021 chhunga vawk pul hri “African Swine Fever” leng darh zel tur venna tura AH&Vety Department-in vawk an suat sakte tana zangnadawmna AH&Vety Minister Dr K. Beichhuan a sem a. Vawk suat tak neitu chhungkaw 2488 hnenah zangnadawmna sum fai Rs 10,48,42,200/- an bank account theuhah Direct Benefit Transfer-in thun a ni ang. AH&Vety, Fisheries and Sericulture Board Vice Chairman Pu C. Lalmuanpuia, MLA in he hun hi a hmanpui bawk a ni.
He hunah hian Dr K.Beichhua chuan African Swine Fever (ASF) dona kawnga hmalakna leh zangnadawmna (compensation) hmuh a nih theihna tura hma lakna a theitawp chhuahtute chungah lawmthu a sawi a, nikum 2021, March ni 21-a Lungsen khuaa vawk thih dan rinhlelhawm report an dawn veleh rang takin an bawhzui nghal tih sawiin amah ngei pawh March ni 8, 2021 khan Vety daktawr leh mithiamte nen Lungsen khua panin a riahchilh tih a sawi a, ASF darh zel tur khuahkhirh turin hma an la nghal a, an rin aiin a lo darh zau hman hle tih sawiin ASF hri kai hi 100% an thi tia sawi pawh a lo dik hle tih an tawnhriat thu a sawi bawk a ni.
Dr Beichhua chuan Mizorama sa kan ei nasat ber chu vawksa a nih thu sawiin, vawksa kan ei zinga a tam zawk hi chu rampawn atanga lakluh a ni a, ram pawn atanga vawk lakluhte hian vawk natna chi hrang hrang an ken tel thin avangin leh ramchhunga tharchhuah ngei vawksa a kan intodelh theih nan kum 2019 atang khan ram pawn atanga vawk lakluh hi kan khap tawh a ni a ti a. Kum 2-3 chhungin vawksa kan intodelh beiseia phur taka kan thlir laiin nikum kum tir lamah vawk hri avangin harsatna kan tawk ta a, hemi hma hian South-East Asia-ah African Swine Fever hri a len nasat avangin mipuite hnenah pawh a inven dan tur inzirtirna (awareness campaign) pawh nasa takin kan kalpui tawh a, tum 200 chuang lai hetiang hun hi kan buatsaih hman a, kan rih loh leh beisei loh taka hri a rawn lut ta tho hi kan hrilh a haiin, a pawi kan ti takzet a ni a ti a. Theihtawp kan chhuah vangin kum 2021 kum tawp lamah chuan he hri hi a reh tawh hle a, kan do hneh tawh dawn nia kan hriat laiin kumin February thla khan Sakawrdaiah ASF bawk hi a puang leh ta hluai mai a, Manipur lamah he hri hi nasa taka a darh lai mek a lo ni bawk nen a pawi takzet a ni a ti. Hri rawn darh tanna nia lang hi ramri hnaih khuate an nih avangin kan ngaihtuahna pawh a kal thui hle mai a, a mawhphurtu chhui theih ni lo mahse mipuiten sawrkarin kan himna atana ruahmanna a siamte kan zawm thata kan ngaih pawimawh a tul hle tih kan hriat thar a ngai a ni, a ti bawk.
Minister chuan ASF vanga vawk thi zawng zawngte zangnadawmna pek kan duh laiin sawrkar laipuiin inkaihruaina a lo neih sa ang baka kal a theih si loh avangin AH&Vety department hriatpuina a vawk suatte chauh zangnadawmna kan pe thei a ni, a ti a. Hemi atana sawrkar laipui leh state sawrkar sum thawh tur hi 50-50 a nih vangin mipuite manganna hriatpuia state sawrkarin a do letna tur sum petu Chief Minister Pu Zoramthanga chungah lawmthu a sawi bawk a, ASF hri kai vawk thite zangnadawmna tur pawh planning department kaltlangin an bawhzui tih a sawi a, Chief Minister Pu Zoramthanga’n Prime Minister Narendra Modi hnenah PM’s Special Package anga pe turin lehkha a thawn thu a sawi bawk a ni.
AH&Vety, Fisheries and Sericulture Board Vice Chairman Pu C. Lalmuanpuia, MLA pawhin vawk suat zangnadawmna an pe thei ta chu lawmawm a tih thu sawiin COVID-19 hripui leng vanga duh anga hmalak a chak theih loh karah pawh beidawng miah lova theihtawp chhuaha hma latute chungah lawmthu a sawi a, Vety Minister Dr K. Beichhuan theihtawp chuaha sawrkar laipuia Minister leh official pawimawhte vawi duai lo a hmuh thu sawiin a thahnemngaihna a fakawm a tih thu a sawi bawk a ni.
National Action Plan hnuaia ASF nuaibo (eradicate) na atana hmalakna lian tak dang chu CULLING (vawk suat) hi a ni a. Infected area chhunga mi zawng chu hri la kai lo pawh suat vek tur a ni. Mizoramah pawh hei hi a theih ang chin chinah kal pui a ni a. Vawk neitu te remtihna la hmasa vekin CULLING hi kalpui a ni. Culling atan hian hetiang hian Government of India chuan compensation pek theih dan ruahmanna a siam nghe nghe a ni.
Vawk kg 15 hnuai lam tan Rs. 2200, kg 15-40 tan Rs. 5800, kg 40-70 tan Rs. 8400, kg 70-100 tan Rs. 12000, kg 100 chunglam tan Rs. 15000 a ni a. Vawk chaw an lo dahkhawl pawh tihchhiat vek tur a nih av angin vawk chaw kg 1 zelah Rs. 22 ruahman a ni bawk.
Mizoram chhunga district 7 ah vawk suat a ni a, vawk suat zat leh chhungkua a nghawng zat chu hetiang hi a ni.
Sl. No District
No. of ANIMALS
No. of families affected Upto 15 kg 15-40 kg 40-70 kg 70-100 kg >100 kg TOTAL
1.
AIZAWL
811
1258
1059
726
892
4746
1058
2.
LUNGLEI
187
262
201
149
162
961
220
3.
HNAHTHIAL
87
83
123
55
77
425
140
4.
SAITUAL
58
44
51
35
20
208
56
5.
SIAHA
18
20
18
45
27
128
50
6.
SERCHHIP
878
712
608
575
299
3072
744
7.
MAMIT
273
877
715
353
810
3028
220
TOTAL
2312
3256
2775
1938
2287
12568
2488
District tina vawng suat zangnadawmna pekchhuah tur zat chu hetiang hi a ni.
Sl. No.
DISTRICT
TOTAL AMOUNT
1.
AIZAWL
Rs. 40068200
2.
LUNGLEI
Rs.7837400
3.
HNAHTHIAL
Rs.3521000
4.
SAITUAL
Rs.1531200
5.
SIAH
Rs.1251800
6.
SERCHHIP
Rs.25553400
7.
MAMIT
Rs.28079200
TOTAL
Rs.104842200
Zangnadawmna sem inkhawm hi AH&Vety Secretary Pi Lalzarmawii'n a kaihruai a, Pi Lalzarmawii chuan tuna ASF tawh hnihna (second wave) a vawk thi zat leh vawk suat zatte chu AH&Vety department official ten nitin uluk takin an chhinchhiah (record) zel tih a sawi a, vawk suat hi AH&Vety department hriatpuina a tih a nih loh chuan zangnadawmna hi hmuh theih a ni lo tih a sawi bawk. India ramah ASF vanga vawk suatte zangnadawmna dil hmasa ber leh awm chhun an nih bakah zangnadawmna sum pek chhuah awm chhun an la ni tih sawiin, state dangte pawh Mizoram tih dan entawn nachang hre tura hriattir an nih hial thu a sawi a ni.
Post a Comment
He post chungchanga i ngaihdan lo sawi ve rawh: