Minister Robert Romawia Royte-in Govt. T. Romana College ‘Freshers’ Social & Graduation Day hmanpui

 

Aizawl, the 26th July 2022 : Sports & Youth Services changtu Minister Pu Robert Romawia Royte’n vawiin khan Vanapa Hall ah, Government T. Romana College in zirlai thar an lawmluhna leh zirlai passed chhuak ta te puala programme ‘Freshers’ Social cum Graduation Day’ an buatsaih chu a hmanpui.

 

Pu Robert Romawia Royte chuan Govt. T. Romana College a zirlai lut thar te Plus 2 zirna zawhah college rapin bul an tan thar a, bul tanna tha in a tawp tha a hril thei thin a, chuvangin in zirna kawngah te, thian inkawmna kawngah te leh ngaihtuahna in siamna kawngah te a bul tan uluk turin ka chah che u a ni, a ti a. Degree nei thar zirlai passed chhuak te chu a lawmpui thusawiin in nunah bung thar in kai dawn a, tam tak tan chuan zirna kawng in zawh tawpna a ni dawn a, exam hrang hrang bei tur te in inbuatsaih chho anga, khawvel system hrang hrang hi a smart in a changkang tawh a, he khawvel hmachhawn turin thliarkar rilru zim te pu lovin rilru zau leh changkang put a tul hle dawn tiin zirlai te a fuih a. Zirlai naupangten hna ruak te an hriat a, hengte dil nachang an hriat nan Central leh State lamah hnaruak awm thinte chu an College Notice Board ah te tarchhuak thin turin zirtirtute leh Principal te a chah tel bawk.

Minister hian tunlai khawvel leh hmanlai khawvel tehkhinin, tunlaia a thei leh a tum tak tak tan kawng thar tam tak inhawngin hna thar tam tak hmanlaia awm ngai lo te a awm tawh tih sawiin thil reng reng a eng zawnga thlir tan chance a tam a, thawh rim leh thiam tel a ngai a ni, a ti a. A eng zawnga  thil thlirtute chu khawvel siamdanglam thin an ni zel tih chu hre reng turin zirlai a chah a ni. Social media in khawvel a tihdanglam nasat dan sawiin social media hi a tangkai em em rualin thil belhchian dawl lo thil rintlak lo a tam a, thu thar rintlak hriatna atana la tha ber chu chanchinbute leh TV news hi a la tha ber niin ka hria a, social media a thuthar hi chu belhchian a dawl lo tiin a sawi a ni.

Minister hian College magazine ‘Raltiang’ tih chu a tlangzarh a, zirlai ti tha te hnenah college in thuziak leh thil pek an siam leh buatsaih te a hlan bawk a. College tan football leh volleyball 5 ve ve, basketball leh futsal ball 3 ve ve bakah mipa leh hmeichhe team tan jersey a pe bawk a ni.  

College Principal chuan Dr. Jenifer Lalbiakdiki chuan an college in a tum ber chu zirlai hlawhtling ni tura naupangte chher bakah khua leh tui tha ni tura zirlai te buatsaih a ni tiin zirlai te chu an thil tih reng rengah rinawmna, dikna leh taimakna te vawng nung zel turin naupangte a fuih a ni.

Government T Romana College hi kum 1992 ah din niin zirlai naupang 1500 bawr an nei mek a. NAAC Accreditation hnuhnung ber a hmachhawn a Grade B+ a nei a ni.

- DIPR