MFA-in hremna tichhuak - Armed Veng South hrem!

Aizawl | July 30, 2022: Mizoram Football Association Disciplinary Committee chuan, June 24 - July 19, 2022 chhunga khelh zawh tâk LBS Suzuki All Mizoram Inter Village Football Tournament-a thil thleng hrang hrangah hremna a tichhuak.

1. June 24, 2022-a Lengpui Ground-a Dinthar LC team leh Kolasib Ṭumpui VC team inkhelh ṭuma MFA Official kut thlaktu Dinthar LC team player Isaac Rosangliana  (J.No.15) chu Mizoram Football Association in a buatsaih/ a hnuaia Unit/DFA tournament-ah  match thum khel thei lo tura hrem a ni.

(He website kal zel theih nan hian fakna lo langte hi i lo hmet ve thin dawn nia.)

 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

2. July 13, 2022-a Lammuala Quarter Final match Armed Veng South LC leh Ramhlun North LC inkhelha mawi lo taka match official chunga che Armed Veng South LC team-a mi Laldinliana (J.No.26) leh Lalnunsanga (J.No.18) te chu Mizoram Football Association in a buatsaih/ a hnuaia Unit/DFA tournament-ah match thum khel thei lo tura hrem an ni.

Hetihlai hian Laldinliana'n a tihsual pawma puitling taka MFA hnena thupha chawina lehkha a thehlut nghal chu a zahawm kan tiin tun hnua ti tawh lo tura a intiamna chu MFA Disciplinary Committee-in lawmawm a ti hle. 

3. Quarter Final match July 13, 2022-a Armed Veng South LC leh Ramhlun North LC inkhelh bana mawi lo taka match official laka che Armed Veng South LC team-a mi R.Malsawmkima (J.No.22) chu Mizoram Football Association-in a buatsaih/ a hnuaia Unit/DFA tournament-ah match hnih khel thei lo tura hrem a ni.

4. July 13, 2022-a Quarter Final match inkhelh tawp lam leh inkhelh zawh tawh hnua Armed Veng South LC ṭantuten  Lammual hmunhma chu inkhela an lungawi loh avangin nasa takin an suasam a; MFA leh Assam Rifles ten uluk taka an enkawl khelmuala ṭhutna an paih darh bakah dressing room bar-te sawi chhiain tui pipe an tichhe tel a, official pavillion luhna tur hungna iron bar an tihchhiat bakah sponsor lam banner tar tam tham tak an tichhia a, khelmualah bottle ruak leh thil dang nasa takin an vawm lut bawk. Hetianga kan khelmual ngaih hlut suasam a ni hi MFA Executive Committee chuan pawi a ti takzet a, he mi bawhzui hian MFA Displinary Committee chuan ngun taka a ngaihtuah hnuin Armed Veng South chu Mizoram Football Association-in a buatsaih/ a hnuaia Unit/DFA buatsaih khúa leh veng inelnaah ṭum hnih khel theilo tura hrem an ni.

- Issued by Information and Publicity Committee, Mizoram Football Association

(He website kal zel theih nan hian fakna lo langte hi i lo hmet ve thin dawn nia.)

 

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]