KA DAWN KIR CHANG HIAN

  - Lalruatkima

        Kum 50 zet kalta July 30-ah khan khawvel eng hmu ve in, ka laihrui chhah ania, Sande sikul kalkim lawmman te la ve thinin, Ka pa sikul ah ngei mai khan Zirna run ka bela, Tui harsat vangin Inrinni kha in bual leh insukni ani maia, uniform ban leh kekawrbul hnap vanga khak bel tlat leh mawngtet bak hak tur kan nei lo thin kha ania, Chawhnu Sikul ban ve leh Sairawkherh/ Saihlum Ipte lak kan ruala, dai ah Thangchep leh Sahdal kam en turin Sava veh pahin Tom Sawyer ang mai in chhungte min tirh hma in chawthing tlang lek chungin kan tlan chhuak nghal thin kha ania. Thingtlang mi Petromax, Pressure cooker leh Radio nei hmasa pawl han nih te kha ropui tak a ni!

       Thingtlanga seilian tih tak ah Buh phur 300 te kan han thar ve a, nuam ve thin khawp mai, naupang mai e ti lo chuan chhungte feh vangin a tul ang zelin eirawngte hi kan bawl ve nawk nawk chang lah atam. Masi dawn ah Ka pa Synod khawmpui Aizawla hmang haw hian Buara ball (Tennis ball) min hawn hmangin thiante @Zira Hmar MLA te nen football kan khel ve laih laih thin, Ka pa te thian hou Sakhi thang/ Beai/ Sahdal kam peih zia leh an hlawhtlin thin zia te kha nuam ve thin khawp mai.

      Thing delh loh lung delh loh ta chu Pa te eizawnna avangin Aizawl kan lo chuang kai ve ta. Thiante um phak tuma rual pawl loh hlau ta reng rengin kan seiliana, Inrinni chu Thinglukham pu in Kangtekmual (RV road/Petrol pump mual) ah kan liam reng maia, anih loh chuan inhlawhfak ani mai. Action Shoe lar vang lai khan ka hlawhchhuah ngei maiin Ka pu @Rev R.Vanlalnghaka’n Bangalore atanga min hawn kan lawmzia te kha, Krismas urlawk zan a Pu Lalsangliana Sailo S/o Brig T.Sailo Aizawl Greater Water Supply Scheme hna tlaivar dawn dawn a Treasury Square vela kan thawh te khan zan hnathawh hahthlak bik zia ka hriatthiam phaha, Rs 500/- chiah neia, Adventure course Nehru Insitute of Mountaineering of Uttarkashi UP-a kan training nuam ka tih zia te kha, College kal paha PWD Sporting Club ah Khela in ka luta, Kanan Veng atangin tuktin Venghlui/College Veng leh Armed Veng field ah ke ngatin practise turin kan kal tauh tauh thina, Mizoram aiawha, India ram hmun hrang hranga football khela kan zin kual thin te, Bhutan khawpui Thimphu a Kings’ Cup final a penalty ka pet goal loh te, an Royal family chhas ten min bawrbuai dan te kha sawi vek sen ani lo ang. Nepal a sumdawnga ka zin thin laite, Vaihlo tawlha R.Lalawia (RL Ford) motor ngei mai chunga thlasik khawvawt vin tuk mai chunga kan chuan laite, Sialkal Bus Conductor a ka tan thin lai te kha hmanlai an chang zo ta. Sipai Lammual a Navy Sailor tura kan intlar an hotupa Brigadier-in Clerk ah tang zawk rawh aw min tih, Medical check-up kan paltlang dan te kha. ! 

        Ka Matric pass kuma kohhran rawngbawltu a min ruat nghal mai leh Branch YMA Ob a thlan ka ni nghal mai te khan ka nun min khalh ngila, Football khela nih bawk chuan zuk leh hmuam, ruihtheih thila fihlim vek bawk kha tunhnu ah hian hriselna atan a lo pawimawh zia min hmuh tir e. Hrangbana College kan kal ve laite, SU Vice President a thlan ka ni ve ngawt maite, MZP President atan a thlan ka nih ve nawlh dan te, Central YMA hruaitu ah kum 27 ka niha ka tel ve ngawt maite, Kum 27 mi nia, President, Aizawl Dist Football Association hmasa ber a thlan ka ni ve mai te, Kum 2008 a MLA ka in candidate ve ngawt mai chiang zet maia, ka tlin loh te kha Hlawhtlinna hlut zia hre tura hlawhchham phawt a hlut zia te kha sawi tur atam. Sumdawn bul tan tura @Er H.Lalzirliana MLA & Er Vanlalruata Ex-President Central YMA in min puih nasat em em dan te, 2003 a ka JCB Operator in tun thlenga ka khawl a la enkawlte, Cheng singsarih neia bul ka tan te kha tun hnu ah hian dawn tiseitu  an ni e. 

       Nu leh Pa ten Pathian thu an awi rah sengin malsawmna chhiar sen loh in min vura, “An thlahte thlengin Chaw khawn in hmu lo ang” ti tu kan Pathian rintlak zia te hian, Kan Pathian leh Kohhran belh hlawkzia min hmuh tira. Nupui fanau min hmangaihtu min pekte, eizawnna leh chenna tur min pek zozai te hi ka ngaihtuah chang hian enge maw ka nih le ka ti fo thin !.

       Ram rorelna khawla tel ve theia min siamtu Pathian leh mipui te chung ah lawmthu ka sawia, Hon’ble Speaker dinglam leh veilama kan thu ve ve thei te hi a mak in a ropui e, Session tan dawn apianga ka tawngtai hla- 

“Kan ram kan hnam min hruaia’n, Nang chauh kan thlang ber che, Chhunglam leh pawn lam hmelma, Indona thleng mahse, Hnehzel turin min puila, Ro min rel sak ang che”,  

“ Rorelna khawl hma ah zam lo la kan Vote ang che” thudik tana, huaisenna leh finna min pe tur a ka dilna te chhanin a awm fo thin.

      Taimakna, tumruhna, rinawmna leh thawhrimna hian engkim a lo si thlu thin tih chu a hmu chiangtu ka ni ve in ka inhria.

        Half Century (Kum 50) lo chuan kai ve tak ah hian, ka dawnkir chang hian kan Pathian hnena lawmthu sawi hi ka va ba nasa tak em aw tih hi ani e 🙏🙏

- Lalruatkima

Minister of State,

Mizoram