I THEH AIIN I SENG A TAM ZAWK

Sum enkawl dan

— Rick Warren 

— 13 July, 2022



“Amaherawhchu chutiang kawngah chuan theh tlem chuan a at tlem bawk ang a, theh tam chuan a at tam bawk ang. Mi tinin ui chunga pe lovin, pek loh theih loh anga ngaia pe hek lovin, an thinlunga an tum ang zelin pe ṭheuh rawh se; Pathian chuan hlim taka petu a ni a hmangaih ni” 2 Korinth 9:6-7

Kuthnathawktuin huanah bean tam tak ching sela, eng rah nge thar a beisei ang le? Dawnfawh em ni? Nge Thingfanghma zawk? Ni lo e, bean bawk a thar chhuak ang. Buaina tur emaw zawhna tur a awm hran lo, a chhan chu a tuh a piang chu a thar tur a ni mai.

Chu chu siam nawnna dan chu a ni – i nun kawng engkimah hmang la a dik vek ang, a bikin sum dehchhuah chungchangah pawh. Kawng dangin siamnawnna dan chu lo sawi ila – i theh apiang i seng ang.

Bible chuan, “Amaherawhchu chutiang kawngah chuan theh tlem chuan a at tlem bawk ang a, theh tam chuan a at tam bawk ang. Mi tinin ui chunga pe lovin, pek loh theih loh anga ngaia pe hek lovin, an thinlunga an tum ang zelin pe ṭheuh rawh se; Pathian chuan hlim taka petu a ni a hmangaih ni” 2 Korinth 9:6-7

He thil hi a ṭha zawng emaw a ṭhalo zawng emaw pawhin i chungah a thleng thei a ni. Ngilneihna chi i theh chuan midang pawh i chungah an ngilnei ang. Mi i ngaihdam chuan midang pawhin an ngaidam ve ang che. I thilphal viau chuan mi pawh i chungah an thilphal ve ang.

Mahse engtiklai pawha i thinrim chuan, mi pawh i chungah an thinur ve ang. Mi bum i chin viau chuan miin an bum ve ang che. Mi rel i hrat viau chuan, engnge lo thleng ang? Miin an rel ve mai ang che.

Siamnawnna dan chuan i theh apiang i seng ang a ti a. Mahse puntirna dan chuan i theh aia tam i seng ziah a ti a ni.

Vaimim fang khat leiah i tuh hian, fang khat chauh i thar lo. Vaimim kung a lo ṭo a, vaimim kawmah chuan fang tam tak i thar ṭhin a ni. Hei hi Pathianin he leilunga a thiltihtheihna a tarlanna a ni. I tuh aia tam daih i tharchhuak ṭhin a ni.

Chuvang chuan miin min beih pawhin ka beilet duh ngai lo. A chhan chu thanga awh ka duh lo a ni. Ka chungchang thu tupawhin eng ang pawhin sawi se, a ṭha lo zawngin ka chhang ngai lo. A chhan chu, ka chhanlet vaih chuan ka theh aia tam ka seng dawn si a. Chuvang chuan ka chungah an tih loh dan anga chhanlet ka duh zawka. Anmahni malsawm leh ṭawngṭaisak chu ka duh zawk a ni. Chu chu dawn ka duh vang zawk a ni, ka theh aia tam ka seng ziah ṭhin a ni.

Thufingte 11:24 ah heti hian kan hmu, “Semdarh chu pun leh zualna a ni a, mamawh tawk aliam kawmpui chu tlakranna a ni.” 

Ngaihtuah zui atan

* I nunah puntirzelna dan chu engtia nasain nge a thawh le?

* I thil peipunna aṭang chuan engnge i beisei? I beisei anga i seng theihna turin engtin nge chi i theh le?

* Engtin nge Pathianin puntir lehzual che sela i duh (Thufingte 11:24)? I thil pek danah Pathianin hma a sawntir theihna tur chein i sum enkawl danah engnge thlak danglam ngai le?

*Isua nena nun thar ṭan turin i inpeih em?*

Isua ringtute tan chuan thiam loh chantirna a awm lo tih Pathianin min tiam a ni. I sualna lak ata chhandam turin Isua a rawn tir a ni. Krawsa a thihna avang chuan thil i tihsual tawhte leh i tihsual tur te nen lam a man a pe tawh a ni. I sualna avangin amah leh amah inhlanin, a felna min pe a, Pa Pathian nena inlaichinna kan neih theihna turin hna min thawhsak a ni.

Chanchin ṭha chu chutah chuan a tawp lo. Pathian chuan Isua chu thihna ata a kai tho bawka, sualna leh thihna ata a thiltihtheihna chu a lantir bawk a ni. Chu chuan vanrama chatuana a mah nena chen theihna min neihtir a ni.

I nun chu Isua Krista hnenah i hlan duh chuan, he ṭawngtaina hmang hian ṭawngṭai ang che. “Lalpa, misual ka ni ka inhria e, chuvang chuan i mi ngaihdamna ka dil e. Isua Krista hi i Fapa a ni tih ka ring a. Ka sualna avangin a thi a, thihna hnehin a tho leh a ni tih ka ring e. Min chhandamtu a ni tih ka pawma, ka Lalpa atan ka pawma, vawiin aṭangin amah zui turin ka inpe e. Ka nun hruai la, i duh zawng ti turin min pui ang che. Isua hmingin ka dil e.

Isua i pawma i ṭawngṭai a nih chuan, email ah hian min lo bia la Rick@PastorRick.com min hriattir ang che. Isua nena i zinkawng i zawh theihna tura thil ṭangkai ka lo thawn dawn che nia.   

[Lettu: Sangpuia]

No comments

He post chungchanga i ngaihdan lo sawi ve rawh:

Powered by Blogger.