I NGHAH MEK LAI KHAN, PATHIANIN HNA A THAWK RENG

Sum enkawl dan

— Rick Warren 

— 12 July, 2022

“Tichuan, thil ṭha tih i ning suh ang u; kan inthlahdah loh zawngin a hun takah chuan kan seng dawn si a” Galatia 6:9

Bible chuan engkim tana hun bik a awm thu min hrilha, “Engkim tan hian hun ruat a awm a, van hnuaia thiltih zawng zawng tan hun remchang a awm” Thuhriltu 3:1

Nun hi hun hrang hrangin a siam a ni tih hi a dik hle a, chungah chuan nghah hun chhung pawh a tel a ni. Hman leh tun emaw tun leh nakin hun inkarah hian nghah khawtlai hun chhung a awm zel bawk. Chu chuan mi tam tak a tihnual ṭhin reng a ni. Ruahmanna, peipunna leh khawlkhawmna nei duhte tan a beidawnthlak ṭhin, vawi leh khatah a rah hmuh tur a awm nghal theih loh avangin.

Mahse rah chu zawi muangin a lo hmin a. Huana tomato rah hminsa nge i ei duha a hringa lawha tih hmin chawp? Tomato hmin sa ngei, muang changa ṭhantir tawh hnu lawh leh a la hel, a hun lova lawh chu khaikhin rual a ni lo. A hun hmaa i lawh chuan a tuina i hloh tihna a ni.

Sum enkawlnaah chuan i tuh hun ni lovah i seng a ngai ang. Chutiang zelin vawi khatah a rualin an hmin vek lo bawk. Theite i ching a nih chuan, an hmin rual vek lo tih i hria ang. Zawi zawiin an hmin a, tlem tlemin i lo thei ang. Sum dehchhuahna Pathian duh dana i nei a nih chuan vawi leh khatah i vannei ngawt dawn lo. Hun rei tak hnuah chauh i dawng ang. Nakin hnua a rah i sengna turin i nghah a ngai dawn a ni.

Amaherawhchu i nghah mek lai khan Pathianin hna a thawk reng a ni. I thawh rim rah emaw pawisa emaw thildang emaw i nghak mek lai khan, nang chuan engmah thleng lovah i ngai maithei.

Mahse, thil engemaw chu a thleng a ni. Thlai chi chu lei hnuaia a awm lai khan muang changin a lo ṭo a ni. Chu thlai chi chu Pathianin mal a sawm phei chuan zawi zawiin a lo ṭhang ang. Nakinah chuan thlai ṭiak chu leiah a lo ṭo chhuak anga, a hnathawh chu i hmu ang.

Amaherawhchu, i thawhrim rah i hmuh hma pawhin Pathianin hna a thawk a ni tih i rin erawh a ngai thung a ni.

Thlaite hian ṭhanglian turin hun an mamawh a. Thil engmah hi vawi leh khata lo puitling nghal thei a awm lo. Kuthnathawktu tumah hian darkar reilote hnuah an thlai chi tuh, lai chhuak leha a rah seng tum nghal an awm lo. An awm danin awmtir la, Pathianin a hun takah a ṭhantir mai dawn a ni.

Galatia 6:9  ah chuan, “Tichuan, thil ṭha tih i ning suh ang u; kan inthlahdah loh zawngin a hun takah chuan kan seng dawn si a” a ti a ni. 

Ngaihtuah zui atan

* I nunah eng rah ber nge seng beiseiin Pathian i lo nghah tawh le?

* Rah seng tur i nghah chhung chuan thlarauvah engtin nge i ṭhan le? I nghah lai chuan Pathianin engnge a zirtir che?

*Engvangin nge i tuh rah chu seng turin Pathian a nghahtir che nia i rin?

[Lettu: Sangpuia]