Lok Sabha MP C Lalrosanga'n PMG office tlawh

Aizawl 3rd June 2022: Vawiin khan Pu C.Lalrosanga, MP(LS) chuan Post Master General, North East-1 Pu Joseph Lalrinsailova chu Aizawl Dak Inpuia a pisaah tlawhin, postal service chungchanga thil pawimawh hrang hrang a sawipui.

 

MP Pu Rosanga chuan Post office kaltlanga mipuiin thil chi hrang hrang an inthawn mhin te a thlen har mhin avanga harsatna leh thil pawi eng eng emaw a awm mhin chu a ngaimawhawm a ti a, thil dawn mai tura ngaih tlai taka a lo thlen avanga tihtur pawimawh thulh phahna te a lo awm mhin hi pumpelh dan ngaihtuah a, hmasawnna lam pan a mul hle a. Delhi leh Aizawl inkar ringawtah pawh thil thawn kal muang lutuk a ngaimawh avangin a muanna lai nia ngaih Kolkata lam postal hotupa Chief Post Master General, West Bengal Circle hnenah pawh lehkha ziakin a thawn tawh thu a sawi bawk. Pu Rosanga, MP(LS) chuan Lengpui Airport-a Cargo Terminal awmlo chu a ngaimawh thu leh cargo terminal chungchang hi Airport Asst. Director a lo sawipui tawh bakah, a mul angin Delhi lamah pawh bawhzui zel a tum thu PMG hi a hrilh a ni.

PMG thar Pu Joseph Lalrinsailova pawhin thil thawn kal muang chu a ngaimawh hle tih sawiin, tunah hian Lengpui Airport-ah Cargo terminal a awm loh avangin by road-in thil thawn zawng zawng kalpui a ngaih thu leh Aizawl to Silchar-ah ni 1 a thang a, Silchar-ah ni 1 dang an lo dah leh a, chumi zawhah Silchar amanga Guwahati thlen nan kar khat te an hmang leh a, chutiang a nih avang chuan Aizawl to Delhi pawh hi kal chak ngaihna a la awm lo tih MP a hrilh a. Hetiang aia chak tura beisei chu Aizawl to Kanhmun, Kanhmun to Agartala, Agartala to Delhi, chutiang tur chuan ruahmanna siam chho mek a ni a, tun ai hian thil thawnte pawh a kal chak zawk turah beisei a ni a ti bawk. Aizawl Head office hmunah bik pawh hian bungrua lo thleng reng reng pawh rei rial lovin a chak thei ang bera pek chhuah zar zar a ni tawh thu a sawi bawk. Thil thawn bo chungchang te, parcel chhunga a thawntuin a dah ni miah lo, thil dangin lo thlak thlengte pawh hriat tur a awm thin a, hemi chungchangah pawh a mul anga hmalak mek a ni tih sawiin PMG Pu Joseph chuan Lengpui Airport-a cargo terminal a awm loh avanga an harsatnate hriatpuia hma lo laksak ve turin MP chu a ngen nghal a ni. PMG hian MP(LS) Pu Rosanga thlalak chuanna Stamp an siam thar chu a hnenah a hlan nghal bawk.

Vawiin PMG thar pisa a tlawhnah MP (LS) hi Telecom Advisory Committee Member Pu H.C. Vanlalruata chuan a mawiawm a ni.

 

- DIPR