June 4-ah K-Pop India Contest 2022 Aizawl Regional Round

Aizawl | June 3, 2022: Kum tina thalai tam takin an nghahfak K-Pop Contest Aizawl Regional Round chu June ni 4, 2022 hian a lo thleng leh dawn ta.

Korean Cultural Centre India-te YouTube channel-ah en theihin zan dar 08:30 ah tih chhuah a ni dawn.

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

He intihsiakna hi Korean Cultural Centre India leh Mizoram K-Pop Fanclub-te thawhhona zarah kumtin an lo buatsaih tawh ṭhin a. Hri leng avangin kum hnih kal ta chhung kha live programme buatsaih lovin online-a neih a ni a, kumin pawh fimkhur zual zawkna avangin online veka neih tur a ni.

He intihsiakna ah hian lam leh zai lama thalai talent nei ṭha tak tak te a ber nih tumin an inek leh dawn a ni. Online Round an paltlang hnu ah Regional Round intihsiakna an hmachhawn chho leh dawn mek a, heta pakhatna dinhmun luahtu hian India ram pum inelna ah Mizoram aiawhin an zuk inel leh dawn a ni. Ram pum huapa pakhatna la te hian international level intihsiakna South Korea-a neih thin ah India ai an awh thin a, kan Mizo thalaite pawh tum hnih ngawt India ai hi an lo awh tawh a ni.

Regional Round-a pakhatna te hian inelna sang zawk hmachhawn theihna mai bakah hamthatna tha tak tak an dawng thin a, kumin hian an sponsor Atomy Noida Smile Vision Centre-te hnen atang Skincare Line Gift Set manhla tak an dawng dawn a, hei mai bakah hianin cash prize pek an ni bawk ang.

Kumin Regional Round-ah hian intihsiakna mai bakah K-Pop Contest-in a lo chherchhuah tawh performers talented tak tak Jonathan Lil Jae - K-Pop Contest neih a nih tan atanga India ai awha Korea kal hmasa ber Frozen Crew member, Priyanka Mazumdar - Indian nula pan-Asian girl group Z-Girls member, Zomuana - 2017 kuma Changwon K-Pop Festival South Korea-ah India aiawha Dance category-a ram 88 atanga lamthiam rawn tel ve te hneh a pakhatna lawmman latu Immortals Army member leh Juchy - 2018 kuma India ram pum huapa intihsiaknaa Vocal category-a pakhatna lawmman latute hnen atang guest performance hmuhnawm tak tak en tur a awm dawn bawk.

Intihsiaknaa tel te mai bakah thlirtute tan pawh lawmman dawn tur tha tak awm dawn bawkin, he Inrinni zan show ah hian Atomy Skincare System 'The Fame' Set Rs. 9100/- man hu leh thil dang dawn theihna a awm dawn a, lo thlir ṭheuh turin buatsaihtu lam chuan K-Pop ngaitute an sawm a ni.