Lawngtlai Bawrhsap thar-in District MJA te thingpui a inpui

Aizawl | June 3, 2022: Lawngtlai Bawrhsap thar Pu Amol Srivastava chuan nimin khan Mizoram Journalists' Association (MJA), Lawngtlai District member-te chu a pisaa lengah sawmin, District hmasawnna atana hma lakna tur pawimawh hrang hrang a sawipui.
 

Lawngtlai Bawrhsap chuan chanchinbu mite chu khawtlang leh ram hmasawnna atana thawh hlawk berte zinga mi an nih thu sawiin, an hna thawh chu a ropui hle a ni, a ti a. District MJA member-te chu Lawngtlai District tan theih tawp chhuaha thawh hopuiah sawmin, mipui rawngbawlna leh District hmasawnna hna thawh kawngah a ṭulna apianga amah finchhuah ṭhin turin a chah a ni.

Bawrhsap leh District MJA member-te inkawm hona hunah hian Lawngtlai District Information & Public Relations Officer Pu C. Lalhruaitluanga pawh a tel a. District MJA te hi an President Pu Lalngheta Ralte chuan hovin, Bawrhsap hnenah hian District MJA Patron a nih hriattirna lehkha an hlan nghal a ni.

District MJA hruaitute chuan thil ṭha turah chuan eng lai pawhin MJA chuan sawrkar an thawhpui thei reng tih sawiin, an ngaih pawimawh an sawi zingah Lawngtlai District chhunga raltlan awmte ramri kana an chet velna chu, a hrulah ruihhlo leh thil ṭha lo tawlh luhna remchanga hmang an awm palh loh nan awmze neia khuahkhirh ṭul an tih thu an sawi a. Bawrhsap chuan MJA hruaitute thu sawi chu a ṭul anga lo en zui a tum thu MJA hruaitute hi a hrilh a ni.
 
- DIPR

Post a Comment

0 Comments