GOVT. KHAWZAWL COLLEGE AH SKILL DEVELOPMENT AWARENESS CAMPAIGN BUATSAIH

Khawzawl, the 1st June, 2022: Labour, Employment, Skill Development & Entrepreneurship Development (LESDE) Department, Govt. Khawzawl College leh District Skill Committee, Khawzawl-te tangkawp buatsaihin vawiin khan Govt. Khawzawl College Multipurpose Hall-ah thalaite hnena thiamthil inzirtirna 'Awareness Campaign on Skill Development for Youths in Khawzawl District' tih chu Sankalp hnuaiah buatsaih a ni. He hun hi LESDE Department Director Pu K.Lalhmingliana chuan khuallian niin hun a hmanpui a, Pu C.C. Lalchhuangkima, Deputy Commissioner, Khawzawl chuan kalkhawmte hnenah fuihna thuchah a sawi bawk.

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

Khuallian Pu K.Lalhmingliana chuan thusawiin, thiamthil zirna khawvelah kan awm a, thiamthil zir kawnga indonaah kan lut mek a ni, a ti a. Khawvel kalphung hi economy-in a nghawng a, ram changkang apiang hi skill development a hmasawn ram an ni zel a ni, a ti a. Khawvel ram thiltithei leh ropuite, sum lakluh thang nasa te chu hmasawnna chhan bulpui ber chu skill lamah an hausak vang a nih thu a sawi bawk. LESDE Director chuan Skill India Mission chungchang tarlangin, Mizoramah pawh kalpui mek a nih thu leh Khawzawl-a awareness campaign buatsaih pawh Skill India Mission kalzel nena inzawm tlat a nih thu a sawi a. Khawzawl DC sawmna an ngaihhlut thu leh an ngaihpawimawh em avangin a tam thei ang ber an tel thu a sawi bawk a ni.

District Bawrhsap Pu C.C. Lalchhuangkima chuan LESDE Department-in an sawmna ngaipawimawha Khawzawl thalaite tana Skill training ngaihhlutawm tak an buatsaih chu lawmawm a tih thu a sawi a. Khawzawl District mai ni lovin Mizote chu Skill development kan tlakchham thu leh training kan mamawh thu a sawi bawk. Skill development a awm loh chuan thlaite zingah mi beidawng an awm tam ang a, ruihtheihthil ti an pung tual tual ang a, hnam a boral mai ang tih a hlauhawm hle a ni, a ti bawk.

Awareness Campaign hi chawhma leh chawhnuah then niin, chawhma lamah hian LESDE Department atangin mithiam ten thalaite tana eizawnna an hmuh theihna tura kawng hrang hrang awmte an kawhhmuh a. Pi Regina M. Ralte, Mission Manager, LESDE Department chuan skill development pawimawhnate a sawifiah a. Pi Irene Lalruatdiki, Trainer, Mission Foundation Movement leh Pu Jervis L. Chhakchhuak Trainer, Jay Jay TPS te chuan kalkhawmte hnenah ram danga hnahmuhna foreign placement awm theih dante leh training chi hrang hrang awm theite an sawi bawk a ni.

Chawhnu lamah Khawzawl chhunga mi thiamte leh hlawhtling bikte hnen atangin career guidance hun hman leh a ni a. Pu Ruatsanga Ralte, Commandant, 2nd IR Batallion, Dr. Zozikpuii, Medical Officer, District Hospital Khawzawl, Rev James Lalremmawia FG&CC, Khawzawl leh Pu Lalhlimpuia, Manager, SBI Branch, Khawzawl ten hun an hmang a ni. He awareness campaign-ah hian College Zirlaite bakah Khawzawl Higher Secondary School-a pawl 12 Zirlaite an tel a ni.

 

- DIPR