LAW & JUDICIAL MINISTER-IN A BIAL CHHUNG ZIRNA IN TE A TLAWH CHHUNZAWM

Champhai, the 1st June, 2022: Law & Judicial Minister Pu T.J. Lalnuntluanga, Champhai South bialtu MLA chuan a bial chhunga zirna in pahnih; Govt. Comprehensive Middle School, Venglai leh Venglai Secondary School (RMSA) te chu vawiin chawhma khan tlawhin mamawh leh harsatnate a enfiah.

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

Pu T.J. Lalnuntluanga chuan a bial chhung zirna tihhmasawn kawnga pawimawh tak zirna in dinhmun leh mamawhte zirchianga tlawhkual mek a nih thu sawiin, mamawh leh harsatna thlente a tul ang zela bawhzui tum a nih thu a sawi a. Kan ramin hmabak eng tak a nei a, a thim zawnga thil thlir lova a eng zawnga hmathlir kan neih a ngai a, chumi tur chuan zirlai naupang nakin lawka ram leh hnam innghahna turte nitina ngaihvena enkawltu Zirtirtute in pawimawh hle a ni, a ti a. Ngaihtuahna dik leh rilru sukthlek thianghlim kan neih a tul avangin nundan mawi leh zirthiamna hmun Sikul-te chu an pawimawh deuh deuh dawn a, khawtlang nunphung innghahna leh insiamremna hmun pawimawh tak an nih avangin sawrkar pawhin an mamawh phuhruk turin theihtawp a chhuah mek zel a ni, a ti bawk.

Hmasawnna rahbi kawng zawh mek karah hun khaihlak leh inlumlet hunlaia awm mek kan nih thu sawiin, hruaitute duhkhawp lohna leh sawiselna nasa tak leng mek karah hotu hmasa atang tawhin ram mamawh tihpuitlin kawngah theihtawp thin a ni tiin, thalai enkawltu Zirtirtu mithiam zawkte chu Zirlai leh thalaiteah beiseina nung tuha thahnemngai taka zirtirna dik pe thin turin a chah a. Zirlaite chu mahni hnam nunphung leh ziarangte dah chungnung fo tur leh, inngaihniama hnam dangte chungen mai bik lova, hnam dangte tih theih ti ve thei tura ngaihtuahna senga inrintawkna nei fo turin a chah a. Ram leh hnam hmangaihna dik tak pu chunga thahnemngai taka lehkha zir sauh sauh turin a fuih bawk.

Law & Judicial Minister chuan Zirlaite chu tumruhna, taimakna leh rinawmna nen theihtawp chhuaha lehkha zir turte, hnathawh hreh nei lo tur leh khawtlang leh sawrkar pawmpui eizawnna tlak hna thawk turtein a fuih a. Inthununna tha tak hnuaiah Sikul leh a chhunga chengte fai taka an awm chu hmuh nuam tiin, Zirlaite chu nu leh pa leh Zirtirtute thuawih fo tur leh lehkha zirlai atanga tum mumal tak neih tum turin a chah a. Ruihhlo leh a kaihhnawih hrang hrang laka inthiar fihlim thin tur leh rilru leh taksa hriselna ngaipawimawh fo turin a chah a. Forest Minister ni bawk chuan boruak tha, sik leh sa nuam vawnhim zel a nih theih nan Zirlaite chu thing leh mau humhalha thingphun uar deuh deuh turin a chah nghal bawk a ni.

Venglai Secondary School (RMSA) hi kum 2012 a din a ni a. Tun dinhmunah Zirlai 53 leh Zirtirtu 7 an awm mek a. Kumin HSLC Exam result chhuakah khan candidate 25 atangin mi 15 (60%) an pass a ni. Govt. Comprehensive Middle School Venglai hi kum 1992 a din a ni a. Tun dinhmunah Zirlai 282 leh Zirtirtu 20; Primary leh Pre Primary Section-ah Zirlai 168 leh Zirtirtu 9, Middle Section ah Zirlai 114 leh Zirtirtu 11 an awm mek a ni.

Law & Judicial Minister hian MLA Fund cheng nuai 3 senga Venglai Bazar Shed siam a tlawh nghal bawk a. Minister hi Dr. Lallawmkima DIPRO, Pu H. Darhmingliana, Deputy DPC, Samagra Shiksha leh khawtlang hruaituten an tawiawm a ni.

 

- DIPR