ZOKHAWTHAR LAND CUSTOM STATION-AH THINGPHUN HNATLANG NEI

Champhai, the 1st June, 2022: Commerce & Industries (Commerce Wing), Mizoram Police, Central Custom Department Zokhawthar leh 8th Bn. Assam Rifles, Zokhawthar-te tangkawp buatsaihin vawiin khan Land Custom Station (LCS) Zokhawtharah thingphun hnatlang neih a ni. He hunah hian Land Custom Station Zokhawthara Sawrkar Department awmte; Commerce & Industries (Commerce Wing) Mizoram Police, Central Excise & Custom Department leh 8th Batallion Assam Rifles-te an tel a ni.

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

Thingphun hawnna inkhawm tawi Immigration Check Post Office kawt, Zokhawthara hun hman hi Pu Vanlalpara, District Marketing Officer (DMO), Commerce & Industries Department Champhai chuan a kaihruai a. Land Custom Station Zokhawthar hmuna thingpui hnatlang huaihawt chu Green Mizoram Day 2022 denchhena buatsaih a nih thu leh, 'Thingphun la, tui hna siam rawh' tih thupui hmanga hun hman a nih thu a sawi a. DMO chuan khawvel boruak lum zel leh tuihna kang zel siam tha turin thingphun uar a tul thu sawiin, keini sawrkar hnathawkten ram leh hnam tana hna ropui tak kan thawh theih chu thingphun uar a, boruak hrisel mipuite tana pek leh kan tu leh fa lo la awm zel turte tana sik leh sa nuam siam hi a ni, a ti bawk.

He hunah hian Inspector JH Sanghmingthanga, O/C, Zokhawthar Police Station, O/C Immigration Check Post, Zokhawthar ni bawk pawhin thu sawiin, Zokhawthar sik leh sa inthlak leh boruak lum chak tak siam tha a, boruak nuam tak siam tura thingphun uar lehzual a tul thu a sawi a. Hrisel taka kan khawsak zel theihna tur chuan boruak thianghlim Oxygen min pe theitu thing kan phun kan uar a, tha taka kan humhalh zui angai hle a ni, a ti bawk.

Hawnna hun hman zawh hian thingphun hnatlang neih zui nghal a ni a. Thingtiak 70 chu Land Custom Station Zokhawthar leh a chhehvelah phun a ni a, thingtiakte hi DFO Champhai atangin a thlawna dawn a ni. Hnatlangte chhùn ei leh in hi Land Custom Station sak thar hna thawk tur Lushai Engineers ten an tumsak a. Thingphun hnatlang hian Land Custom Station Zokhawthara hnathawktu Central leh State Sawrkar Department hrang hrang hnuaia awmte inkarah inpawhna tha zawk a siam a, hnatlanga thawkchhuakte hi an vaiin mi 50 vel an ni.

- DIPR