Zoram Rohlu Dr Thangchungnunga a herliam!




Aizawl | May 22, 2022: Mizo doctor ṭha leh chhuanawm, mi dangte tan a thiamna leh hriatnate hmang ṭhintu, Zoram Rohlu - Dr Thangchungnunga chu tukin dar 3:10 khan kum 68 mi niin a boral.


Dr Thangchungnunga hi Septicaemia natna vanga boral a ni a. Vawiin dar 3 hian Dawrpui Kohhran Centenary Hall-ah vui a ni ang.

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

Dawrpui West a cheng Dr Thangchungnunga hi a lehkhabu ziah, 'ka tawnhriat' avangin mi ngaihven leh hlut a hlawh zual nasa hle a ni.

Dr Thangchungnunga hi MBBS, MS Ortho a ni a, Orthopaedic Surgeon a ni.


A thiamna leh hriatna te mi dang tana malsawmna ni tura hmang ṭhintu Dr Thangchungnunga hi uitu an tam hle  a ni.


Dr.Thangchungnunga chanchin tlangpui
Dr. Thangchungnunga hi 15th August, 1954 khan Pu H.Vanlalthanga(L) leh Pi Zairemi(L) te fa pasarih zinga a pathumna niin Tlangnuam ah a lo piang a. 
A unau te chu :
1. Lalrinliani w/o H Lalsanglura(L), Tlangnuam
2. H Lalrokima h/o Rohmingliani, Tlangnuam
3. Dr. Thangchungnunga h/o VL Rammawii(L), Dawrpui
4. Thangzuali w/o Thanghnuna(L), Tlangnuam
5. H Lalrammawia h/o Lalrozami, Dawrpui
6. H Lalzuithangi w/o C Liandawla, Tlangnuam
7. H Lalbiaknunga(L) h/o Lalchhuanthangi, Tlangnuam

Zirna lam
St. Pauls School, Tlangnuam atangin Primary, Middle leh High school a zir a, kum 1973 ah Matric a zir zo a. Pre-University(PU Science) chu St.Edmunds College, Shillong atangin kum 1975 khan a zir zo leh bawk. PU Science a zir zawh hnu hian kum 1974 atangin King George Medical College, Lucknow ah Doctor (MBBS) a zir tan a. Kum 1979 ah tha takin a zir zo a. A zir zawh hnu, intern an tih laiin UPSC ah exam beiin Prelims chu a inziak tling ve mai a, amaherawhchu, administration lam hi a tuina lam anih loh bakah a pa thu awihin Mains exam lo in Medical line ah hian a kal tlang ta zawk a ni. Doctor a nih piah lamah hian amah hi kutthemthiam tak a ni a,  inchhung bungrua te hi a siam ve mai thin a, inchhung bungrua an hman lai tam tak pawh hi a siam a ni nghe nghe.

Eizawnna leh Chhungkaw lam
Kum 1981 ah Mizoram sawrkar hnuaiah Assistant Surgeon-I hna thawk turin lak a ni a, a hmasa ber atan West Phaileng ah a awm a.  Hemi hnu kum 1982, September ni 11 ah VL Rammawii nen Tlangnuam Presbyterian Kohhran Biak Inah an innei a, fa pahnih Samuel Lalrozama leh Abisag Lalhruaitluangi te an nei. A nupui Pi  Rammawii hian kum 2013, May ni 27 ah khan a lo boralsan tawh nghe nghe a ni. 

Kum 1988 ah Post Graduate (Ortho) zir turin an chhungkua in Chandigarh ah an kal a, tha taka zir zo in kum 1990 ah an lo haw a, Civil Hospital, Aizawl ah a awm chhunzawm ta nghal a ni. A service hun tam zawk hi Civil Hospital, Aizawl ah a hmang a, kum 2017 ah khan Director, Mizoram State Cancer Institute a nih laiin Superannuation Pension in sawrkar hna a chawlhsan ta a ni.
Sawrkar hna a chawlhsan hnuah pawh hian mipui leh ram tan tiin a thiamnate a hmang chhunzawm zel a. A theih ang chin chinah private hospital leh clinic lamah te a thawk chhunzawm zel a ni. A hnathawhah hian a tui em em a, ngaihtuahna pawh a seng nasa a; a  thiam pawh a thiam hle. Dr. Thangchungnunga hian Mizorama a vawikhatna atan - Saitika zai (Laminectomy), Khel ruh lehlam  thlak(Hemiathroplasty), Khel ruh pum pui, malpui lam leh kumkuruh lam thlak (Total Hip Replacemnet), Nghawng ruh zai (Cervical Spine  operation) te hi hlawhtling takin a lo ti tawh a ni.

Kohhran leh khawtlang rawngbawlna lam
Dr. Thangchungnunga hi phak ang tawka kohhran leh khawtlang tana ke pen ve thin a ni a. Biate a an awm laiin Thuhriltu leh KṬP hruaitu (Office Bearer) te lo ni tawhin Dawrpui Kohhranah pawh hian hun engemaw chen chu rawngbawltu niin a koa tla chanvote chu tha takin a hlenchhuak thin a ni. Tin, kum 2004 atang khan thianhoin a remchan dan ang angin ṭawngtaia inpawlhona hun an hmang thin a. hun a lokal deuha rawngbawlna mumal leh chak zawka kalpui a nih theih beiseiin Open Door Fellowship tih hmingpuin ke an pen tan ta a ni. A nupui boral hnuah pawh an inchungah a nupui hriatrengna pualin ṭawngtai In ‘Peniel’ a siam a, a thiante leh Pathian mi lo kal apiang tan tawngtaina hmuna hman theihin an hawng reng a ni.
 
Young Mizo Association, Dawrpui Branch-ah pawh kum eng emaw chen chu hruaitu a lo ni ve tawh bawk a ni. Tin, mipui vantlangin an tangkaipui theih turin hriselna lam kaihhnawih thuziak nitin chanchinbu leh tualchhung chanchinbu-ah te a chhuah fo thin a ni. Tun hma atanga literature lama tuimi a ni a, a tlangval lai pawhin cowboy chanchin ngaihnawm ti thin em em a ni a, sap tawng atanga mizo tawnga lehlin lehkhabu pawh cylostyle-in vengchhunga chhiar 
tur ten a lo chhuah tawh thin. Kum 2018 khan a chanchin ngaihnawm takin “Ka Tawn Hriat” tih a lo chhuah tawh a, MAL Book of The Year Top 10 ah a tling ve hial a ni. Chumi hnuah chuan “Mi Tin Tan” tih lehkhabu a chhuah leh a, tunah hian tihchhuah mai theihin “Ka Tawn Hriat-2” tih chu a peihfel tawh bawk.

A nat dan leh hun hnuhnung lam
January ni 15, 2022 ah khan a tupa Invictus Zothanmawia birthday an lawm a, hemi zan atang hian Gout na a nei tan a. In lama an inenkawl hnuah February ni 21 ah khan emergency in Civil Hospital pan pui a ni a. Hemi ni atanga vawiin thleng hian tumhnih damdawiin ah luh pui a ni a, tum ruk lai zai a ni bawk. A natna ber hi Gout, Spine Infection, psoas Abcess leh Septicemia te a nih deuh nual hlawm avangin hmasawn a harsat hle a. Hetianga damdawiin lama inenkawl a nih mek lai hian doctor ten phai lama kalpui tha an ti a, chutiang tura kan inbuatsaih mek laiin ni 20.05.2022 (Zirtawpni) zanah khan a chak loh zual deuh avangin Intensive Care Unit (ICU) ah kan indah lut leh ta zawk a. Hei hi ICU a kan luh vawithumna a ni nghe nghe. ICU ah hian Doctor leh Nurse ten theihtawp an chhuah chungin 
nimin zingah khan a hniam leh zual deuh avangin nihnih tal Ventilator vuah leh phawt tha an ti a. Chutianga ventilator nena kan tan hnuah 
thlamuang tak leh ngaihtha taka kan awm laiin nizan zanlai vel atang khan a hniam ta hle mai a. Damdawiin lama enkawltuten theihtawp min chhuahpui chungin tukin zing dar 3:10 ah khan Chatuana Nung turin Lalpan a hnena chawl turin a hruai ta a ni. 

Dr. Thangchungnunga hian a fate pahnih :
Samuel Lalrozama h/o V Lalnunpuii, Dawrpui
Abisac Lalhruaitluangi, Dawrpui leh a tute :
Invictus Zothanmawia Hmar (2yrs) leh Leo Zoramliana Hmar (9mnths)  te a kalsan a ni.

Lawmthu sawina
Kan chhungkaw chhiattawh chungchangah chhungkhatlaina, thiantha leh vengchhung mipuite, kohhranhote leh khawtlang mipuite  chungah lawmthu kan sawi a ni. In lamah leh damdawiin lama kan  inenkawl lai pawhin kan awmna hmunah mai bakah tawngtaina nen  min pui thin tih kan hria a, kan lawm tak meuh meuh a ni. Tin, Civil Hospital, Aizawl a ICU leh Ortho Depmartment Staff zawng zawngte chungah lawmthu kan sawi bawk a. A hmangaih em em Civil Hospital, Aizawl ah ngei a hun hnuhnung a hmang thei hi amah pawh a lawm hle in kan ring. Lawmthu sawi tur tam tak kan nei a, kan sawi kim loh te  pawh a awm ngei ang. Kan chunga in thatna zawng zawngah kan lawm a, a let tam takin Lalpan malsawm che u rawhse.

VUINA PROGRAMME
A hmun : Dawrpui Kohhran Centenary Hall, 
A hun : 22nd May, 2022, 3:00 PM
Vuitu : Pastor F.Lalhmingthanga
Tawngtai sakna : Upa Lalawmpuia Khiangte
Thusawi : Pu Samuel Lalrozama (a fapa)
Thlamuanna :Vuitu
thuchah

Tawngtaisakna : Rev. V Lalkima (Bialtu)

Hla : Kan khawvel ni a kin hunah
 KHB 465
Malsawmna/Lalpa Ṭawngtaina
Thlanmual : Upa F Lalfakzuala

Post a Comment

0 Comments