59th KTP GENERAL CONFERENCE REVIEW

- K Remruatfela

Vawiin i.e. ni 22 May, 2022 (Sun) chawhnu dar 2:45 khan Upper Republic Branch KTP te chuan 59th KTP General Conference Review kan nei a, chuta sawihona huna ka thusawi tlângpuite chu:_

1. Keini luck si lo hian kan motor chang hi a luck a. Kum tir atang tawha hauhtu an awm avangin veng dangte nula ho te nen kan kal ho a. Kan branch ho bulah ka lo thleng ve thei ta lova, in mi hriatthiamna ka rawn ngên hmasa a ni.

2. Hmeichhe rual kalpui hi chu thlalâk an ti reng a, mipa tân chuan a ninawm châng a tam thin hle. A châng leh an thlalâk laiin hmeichhe bag 3 te kan ak rual a, a pa lo thin hle a ni.

3. Kan Speaker in Pathianni chawhmaa "Kohhran humhalhna" chungchâng a sawi kha 100% in ka thlâwp a. Ka ngaihdan leh ka vei em em te a rawn sawi vek a, ka lawm hle a ni. KTP member te hian ngaithla nawn leh vek thei ula ka ti hle mai.

4. Pathianni chawhnua a thusawi erawh a that em em rualin Puithuam meuh sawi atân chuan a mah mah deuh em aw tihna ka nei a. Hei hi a sawi tha lo ka tihna lam ni lovin amah Speaker ka venpuina zâwk a ni a. Midangin chawhmaa a thusawi tha tak khel lova chawhnua a thusawi zawk hi amah beih lêt nana an kher chhunzawm ka hlauhpui vâng a ni ber.

5. Kan Speaker in kohhran humhalhna a sawinaa India ram state danga kohhran din a pawimawhna leh kan tu leh fate kohhran dinna state-a awm kan awm chuan kohhran bel hrâm hrâm tura a sawmna kha a lawmawm ka ti tak zet a ni. Bangalore Mizo Presbyterian Kohhran leh KTP - Bangalore Branch dinnaa thahmemngai pâwl kan lo nih ve tawh thinaah kan speaker thusawi kha ka thlâwp em em a ni.

6. KTP mai ni lovin Presbyterian kohhran mipui zawng zawngte hian kohhran pawimawhna hi kan hriat thar lehzual a pawimawh tak meuh meuh a. Ministry hrang hrang leh khawvel changkânnain min eichhiat lohna turin kohhran mi hle ila, i presbyterian em em reng ang u.

7. Mizo thalaite hi kan moral a chhe tawh hle a ni tih hi phat rual a ni lova. Amaherawhchu, conference-a thalai sing rual tih tak zeta Pathian an au lai han hmuh hi chuan Lalpa tana rinawm 'Baal hmaa thingthi ngai lo' thalai tam tak an la awm a ni tih hi a chiang a, a lawmawm em em a ni.

8. KTP General Conference inkhawma zaipâwl zai hi duh aiin a tam thin mah mah niin a lang a. Hei hian thusawi thlengin a nghawng buai a. Sunday tlaia Speaker hova chawei khâwm kan  neih tum pawhin kan speaker, Revd Dr. Chuauthuama ngeiin inkhâwm boruak a rei em avanga a duh ang a sawi kim vek hman loh thu a sawi nghe nghe a, a pawi em em a ni. Tih leh hunah item chhawk then dân hi awm thei se a tha zâwk ang ew aw tihna ka nei.