I THEIHNGHILH KHER A NGAI LO

 I THEIHNGHILH KHER A NGAI LO

— Rick Warren 

— May 24, 2022



“Pathian hmangaihtu, amaha ruat anga a kohvate tan chuan, an ṭhatna turin engkimin a thawhsak hlawm ṭhin tih kan hria." Romans 8:28


He ṭawngkam hi kan ngaithla fo ṭhin a: “Theihnghilh la, ngaidam rawh.” Harsatna pakhat chauh a awm: I ti thei lo. Thil theih loh a nih avangin!


I rilru nat tawhna chu i theihnghilh miah lo vang. Dik tak chuan, theihnghilh tum a ngai hran lo. Theihnghilh i tum poh leh i ngaihtuahnaah i theihnghilh tum chu i seng lut zawk tihna a ni.  


Theihnghilhtir che hi Pathian tum ber pawh a ni lo. Chu ai mah chuan, amaha innghat tur leh harsatna aṭang chuan thil ṭha a thlentir tur chu hmuhtir che a duh zawk a ni. Chu chu theihnghilh ai maha pawimawh zawk a ni, chu dinhmun aṭanga thil ṭha lo herchhuak chuan Pathian hnenah lawmthu a sawitir thei che a ni. I thil theihnghilh tawh avangin Pathian hnenah lawmthu i sawi theih a rinawm loh zawk a ni.


Rom 8:28 ah chuan, “Pathian hmangaihtu, amaha ruat anga a kohvate tan chuan, an ṭhatna turin engkimin a thawhsak hlawm ṭhin tih kan hria.” 


Kan Biblein thil engkim hi a ṭha tiin a sawi lo — a chhan chu thil zawng zawng hi a ṭha vek kher lo a. Cancer hi a ṭha lova. Natna pawh a ṭha lo. Inṭhenna a ṭha lo. Indona a ṭha lo. Thil hmansual hi a ṭha lo. Thil engemawzat nuna lo thlengte hi sual a ni. Khawvela thil lo thleng zawng zawng hi Pathian duhzawng a ni vek lo.


Mahse Pathian chuan amah i rin chuan thil ṭha lo aṭang pawhin thil ṭha a rawn herchhuahpui ang a ti. A hnena i tlukluha, “Lalpa, ka nun keh them engkim hi ka hlan a che,” i tih theih chuan, thlamuannain i nun keh them chu a rawn thlakthleng thung dawn a ni. I nuna thlamuanna lo thleng te chu Pathian pek che a ni — i nuna natna lo thleng te chu hrethiam rih lo mah la — ngaidam tho rawh, a chhan chu natna hmangin Pathianin thil ṭha a la thlen tir dawn si a.


I hriatreng tur chu: Miin i chunga an tihsual chu i theihnghilh kher a ngai lo. Chu ai chuan anmahni i ngaihdam theihna turin Pathian ṭanpuina dil zawk ang che, tichuan hliam damna chu a rawn thlentir zawk ang.


Ngaihtuah zui atan


Hliama awmtirtu che tunge i tihdam theih loh le?


Theihnghilh chu a theih dawn tak siloah chuan amah chu ngaidam turin engnge vawiinah hian i tih theih le?


I nuna harsatna dinhmun aṭanga Pathianin thil ṭha a rawn thlen hi engtin nge i hmuh le?


*Pathianin hun ṭha min pe nawn*


Eng pawh lo tisualin khawiah pawh lo awm tawh mah la, Pathianin hun ṭha a pe leh che a ni. I thil tihsual zawng zawng te, i lo hlawhchhawm tawhna te a hre fai veka, chuti chung pawh chuan a la hmangaih reng che a a la ngaihsak che a ni.


A khawngaihna chu thiltih hmanga hlawhchhuak turin a beisei lo che a; Fapa Isua Krista kan rin chuan Pathian thilthlawnpek khawngaihna avangin chhandamin kan awm ang. Pathian khawngaihna chu Isua kaltlanga i rin chuan, hetiang hian ṭawngṭai ang che:


"Lalpa, misual ka nih ka inhria a, i mi ngaihdamna ka dil e. Isua Krista hi i Fapa anih ka ring a. Ka sualnate avangin a thi tih leh chu thihna aṭang chuan i kai tho leh tih ka ring e. Ka chhandamtu atan ka ringa, vawiin aṭang hian ka Lalpa atan ka zui e. Ka nun min kaihruai la i duhzawng ti turin min pui ang che. Isua hmingin ka dil e. Amen.”


[Lettu: Sangpuia]

Post a Comment

0 Comments