PATHIAN THUTIAMTE CHUAN A DUHZAWNG THILTUMTE CHU A CHAWM ZEL

- Rick Warren
- May 31, 2022

“Lalpa, van Pathian, ka pa in ata leh ka pianna ram ata mi hruaichhuaktu leh mi betu leh, he ram hi i thlahte ka la pe ang tia ka hnena chhechhamtu chuan, amah ngeiin a vantirhkoh chu i hmaah a kaltir anga, chuta ṭang chuan ka fapa hi nupui i rawn neihsak dawnnia.” Genesis 27:4

Mi ṭhenkhat chuan hunbi nei zelin thil ruahman an nei ṭhin – kum tharah emaw an pianchamah emaw an tum thar ṭhin. An rihzawng tihhniam emaw an fate bula hun tam zawk hman emaw, lehkha chhiar tam, thil engemaw tihhlawhtlin tur lian tham emaw lian lemlo te pawh a ni ṭhin.

Chung thil tum zawng zawngte chu Pathian duhzawng a ni vek kher lo. Pathian duhzawngte chu Pathian Thu a lang a thutiamte nen a inmil ṭhin. Beidawnna emaw hlauhna emaw a lo thlen pawhin Pathian duhzawng a nih chuan a thutiamte avang chuan kal zel tura huaisenna leh rinna i nei zel ang.

Genesis 24 ah Abrahama'n a chhiahhlawh chu hna hautak tak a pe a: a fapa Isaka nupui zawnsak turin a ti. A tirah chuan a chhiahhlawh chuan nupui ṭha tak zawn hmuh loh a hlauva. Abrahama chu a zawt leta, “Hmeichhia chuan he mi ram lamah hian mi zui duh kher lo mahna: i fapa hi i lo chhuahna ram lamah chuan ka hruai kir leh tur em ni ang” tiin a zawt a ni. Genesis 24:5  

Abrahama chuan Pathian thutiam chu a chhiahhlawh a hrilh nawn a: “Lalpa, van Pathian, ka pa in ata leh ka pianna ram ata mi hruai chhuaktu leh mi betu leh, he ram hi i thlahte ka la pe ang tia ka hnena chhechhamtu chuan, amah ngeiin a vantirhkoh chu i hmaah a kaltir ang a, chuta ṭang chuan ka fapa hi nupui i rawn neihsak dawn nia.” Genesis 24:7

Abrahaman Pathian thutiam a chhiahhlawh a hrilh nawn hnuah chuan, a chhiahhlawh hlauhna pawh chu a bo ta a. 

Chutiang chiah chu i nun pawh a ni. I rilrua awm apiang chu thil tum lian taka chantir a har hle mai. Tuman hlawhchham an duh si lo. Mahse Bible chuan i tumte tihhlawhtling turin nangma theihnaa innghat lo turin a duh che a ni. Dik tak chuan, nangma theihna hmanga i thiltum i tihhlawhtlin theih chuan, i thiltum ti hlawhtling turin Pathian a hmasa berah i dah lo tihna a ni.

Pathian Thu chuan i thil tum chungchangah engnge a sawi? Bible-in engnge a zirtir tih i hriat hma loh chuan i hrethiam ngai lovang. Insurance ti si a, chu chuan engchin nge a huam tih hriat loh ang vel a ni. Thil ṭul lovah i mangang i mangang mai ang.

Bible-ah Pathianin thil hrang hrang min tiama; hriselna ṭha zawk te, nu leh pa ṭha zawk nih te, leiba tlakna tur te leh a dang tam tak a awm. Mahse chung thutiam leh a neih theih dan te i hriat loh chuan, chung i thiltumte tihhlawhtlinna kawngah chuan i mangang mai ang.

Hei hi thudik chu a ni, thiltum lian tak tihhlawhtling turin rinna chak tak i neih kher a ngai lo. Pathian ropui tak hnuaiah rinna tlemte i neih a ṭul zawk! I Pathian chu lei leh vana Pathian a ni a. Engkim a ti thei a ni.

Thil awihawmloh takte ti theitu Pathian chu ring turin i inpeih em? 

Ngaihtuah zui atan
* Thutiam hlenlotu mi ṭhenkhat avangin Pathian i rinna kawngah nghawng engnge a neih le? 
* I tumte tihlawhtling turin Pathian thutiam eng berah nge i inghah a ngaih le?
* I tum tihlawhtling tura i beihna kawngah Pathian thutiamte i beiseina chuan engtiangin nge inrintawkna a pek che?
*[Lettu: Sangpuia]*

Post a Comment

He post chungchanga i ngaihdan lo sawi ve rawh:

Previous Post Next Post