KTP leh MAHNI KUT KEA DIN

(Entrepreneurship)

- K. Remruatfela

CKTP hmalaknain KTP Branch tinah KTP member-te leh mahni kut kea din pawimawhna zir ho ni se tih a ni a. Kan thupui zir tur hi Zofate tan pawhin financial market lama min thanharh tirtu, sawrkar rinchhan kher lova mahni kutkawih ngeia din a pawimawhzia min hriat chhuah thar tirtu a nih ngei pawh ka beisei!

[News update awlsam taka i dawn theih nan telegram channel hi lo join ve ta che https://t.me/exploremizoramchannel ]

Presbyterian Kohhran bultumtu, kan mi hmasa te kha mi thiam leh mi taima, khawtlâng tidanglam thei khawpa mi intodelh vekte an ni a. Chuvangin, keini kristian thalaite pawh hi an hniakhnung zuiin kan taima ve tur a ni. Nu leh pa rinchhan ringawt lovin mahni kea ding chhuak ve ngei thei turin KTP member te i intipaukhauh bawk ang u. KTP active member nih leh thatchhia, hlawhchham, mahnia inchâwm zo lo nih hi a inmil lo em em a. Pathianin theihna thûk nasa tak min pek hi hmang chhuak thei turin kan taima ang a, thluak kan hmang nasa bawk tur a ni. Chu chu KTP active member nihna nena thil inhmeh tak a ni si a.

Ram changkang leh hmasawn apiangah corporate governance a lar a, sawrkar hna hlutna a hniam thin. Kan ramah erawh kan la retheih vang nge, mipui kan la tlem vang zâwk; a mi nawlpui hian mahni kea dinchhuaha, entrepreneurship lam zawh chhoh aiin sawrkar hna hi kan la beisei deuh vek zawk niin a lang a, kan harhchhuah a hun tawh tak zet!

Kan thalai lehkhathiam mi vengva tak takte pawh hian ‘Industry’ ; ‘Firm’ ; ‘Company’ lam dina enkawl aiin khawi emawni sawrkar department-a Officer nih kan thlahlel zawk fo thin niin a lang a. ‘Stock Exchange’ ; ‘Foreign Direct Investment’ ; ‘Law of Securities & Financial Market’; ‘Corporate Governance’ ‘ ‘Multi National Companies’ tihte hi ram changkang thalaite tan tawng tuallêng _(common language)_ a nih tawh laiin keini ramah chuan MPSC exam/SSC Exams tih velte hi tawngkam tlanglawn a la ni zawkin a lang a. Kei ngei pawh hi ‘engtikah nge sawrkarah i luh dawn’ tih tawngkam hi ka dawng tam thin khawp mai. Kan ram la pachhiatzia leh hmasâwnna tur kan la ngah zia thui tak a târlang âwm e.

Tun hnaia film chhuak thar, sap film, vai film leh korean film velte kan en chuan khawtlangin an mi zah leh mi thiltitheite hi Bureaucrats lam aiin Industrialist lam hi an ni deuh zel tawh a ni tih pawh kan hre thei ang. Corporate khawvelah hi chuan sum che vel a tam a, competition a sang a, thluak hman a ngai nasa lehzual a, survival game tak tak khelh a ngai a ni. Chutih lai erawh chuan kan hriat reng tur chu, Pathian rinchhana kan beih tak tak phawt chuan thil tih theihloh hi a lo awm reng reng lova. Amah kan zui a, taihmak kan chhuah phawt chuan hlawhtlinna hian min hmuak reng a ni.

Tin, ka han zeh tel bawk duh chu "Entrepreneur" tih hian hemi Corporate Governance lam chauh a kâwk lova. Sawrkar hna ni lo, mahni kutkawih ngeia ei kan dapna zawng zawngte hi a huam thei vek a ni. Thiam bik thil neite tân chuan sawrkar hna kher ni lovah mahnia kut kea din theihna kawng a tam tawh em em a ni. A tlângpui han tarlang ila:

 (i). Computer khawvelah ringawt pawh eizawnna thawh sen loh a awm.

((ii). Electrical work – TV/Phone/Fridge/CCTV/AC etc.

(iii). Electric fitting/Plumber/Painter/Mistiri/Cobbler etc.

(iv). Entertainment – Sports/gaming/singing/social media/modeling etc.

(v.). Cake baking/Pizza/Homemade restaurant/planting etc.

(vi.) Online marketing/editing/short services etc.

(vii). Barber/Beautician/Therapist etc.

A tlângkawm nan a pawimawh ber chu kan thiamna leh finna zawng zawngte hi ramhuai vulh len nan mai ni lovin, Pathian ram zauh nan keini kristian thalaite hian kan hmang thin tur a ni a. KTP member te hi Lei chi, khawvel ti êngtu ni thei turin kan thil tih kawng tinrengah taihmak i chhuah nasa  lehzual deuh deuh ang u.