CHIEF SECRETARY OFFICE KAI TUR DAN AN TUM MAW?

Social media leh Zonet chanchin thar puanah NGO Co-ordinator Committee-in Mizoram Chief Secretary ṭanglai, Dr. Renu Sharma office kái tùr dan an tum tih hi thil ṭûl lo tak a ni. Mizoram Chief Secretary Pu Lalnunmâwia Chuaungo kha Chief Information Commissioner(CIS)-a dah a nih dâwn khân Mizoram Chief Minister ṭhianpa Pu J.C.Ramthanga chu Chief Secretary ah dah nghâl mai tùr anga ngaih a ni a. Central sawrkar erawh chuan Pu JC Ramthanga chu Mizoram Chief Secretary ah rawn dah ta loin AGMUT Cadre-a IAS senior tak, Dr. Renu Sharma (IAS 1988) chu Chief Secretary ah a rawn dah ta záwk a nih kha.

Mizoram Chief Minister meuhin Central-ah, “Mizo ṭawng thiam CS kan duh,” tiin a thlen a; A Cabinet Minister zîngah sâp ṭawng thiam ṭha lo an awm ni-a sawi te pawh a awm bawk a. India ram chanchinbu hrang hrangah a chhuak chuai chuai a; tûn thlengin internet-ah chuan chhiar tùr a la awm. Minister-te hian sâp ṭawng emaw Hindi emaw an thiam ṭha lo a nih pawhin officer zînga a thiam kha hman ṭangkai ve mai tùr a ni zâwk a; zaha lák chi pawh a ni lo.

Mizo IAS officer senior tak hi AGMUT cadre-ah emaw India ram state dang Cadre-ah emaw awm ni sela chuan, Mizo IAS officer ngei, Chief Secretary-a dah pawh thil tih àwm tak a ni ang. Amaherawhchu, tûnah hian Mizo IAS officer senior kan nei tlêm hle; Chief Secretary-a an ruat ṭhin hi a tlângpuiin Pay Matrix 17-a awm chin an ni ber a. Chutiang kan neih lâi chu Pu JC Ramthanga (IAS 1989, Manipur Cadre), tûna Mizoram Addl, CS ni mêk leh Pu Lalbiaktluanga Khiangte (IAS 1988), Jharkhand State Cadre-a mi hi an ni a. Pu JC Ramthanga lah pension mai tùr a ni tawh a. Pu Lalbiaktluanga Khiangte (IAS 1988) hi kum 2024-a pension-a kal tùr a ni ang a. Ani hi Pu Lalnunmâwia Chuaungo-in CIS hna a zawm dâwn lâi khân Aizâwlah a lo chuang chhuak a; Pu JC Ramthanga âiin naupang zawk mah se, IAS-ah chuan senior zâwk a ni a. Mizoram CS hna pawh a rawn beisei ve deuh a ni mai thei! Amaherawhchu, boruak kal dàn a enin beisei bo-ah a ngâi a ni mahná; chinchâng hre tak mi pakhatin min hrilh dàn chuan Chief Minister pawh a hmu duh ta lo làw làw a ni.

 Tûnah hian Pu Lalbiaktluanga Khiangte hi Mizoram CS-ah dah dâwn se, Cadre thlák a ngaih dàwn avàngin thil tih fel neuh neuh tùr a awm ang a. Pu Lalbiaktluanga Khiangte tih lohah chuan Mizo IAS officer senior deuh kan neih chu Pu Lalrinlian Fanai (IAS 1997), Principal Secretary, Social Welfare, Uttarakhand leh Robert L. Chongthu (IAS 1998), tûna Principal Secretary to the Governor of Bihar te khu an ni a; Chief Secretary atân chuan an la junior deuh. Pay Matrix 15-naa awm ve ve an ni. Chuvàngin, Mizo ngei duh thlan tùr hi kan nei hlawl lo a ni!

 Chutih kâra CM dung thûla NGO Co-ordinating Committee-in, “Mizo ngei Chief Secretary kan duh,” lo tih thar vêl hi a hun lo hle a ni. Mizoram hian IAS&IPS Cadre hran pawh nei ila, Mizo vek an awm dâwn chuang lo a; chuvàngin CS leh DGP tùr hi chuan vai kan nei fo dâwn tih hriat láwk tûr a ni. Nakinah *"Engati nge?”* ti bui bui lo tùrin thil kalhmang hi hriat láwk a ṭha.

 Mizote hian hnam dang thawhpui hi thiam tum ila a ṭha hle ang. India ram aṭangin kan inkâp chhuak zo ta lo sá sá, India rama awm dàn hi kan thiam pawh a ngâi ve bawk a ni. Covid-19 hripui lêng zualpui kârah khân Mizorama DC hrang hrang zînga vâi DC-te khân an district tân phâi lam aṭangin thil tam tak an hai chhuak zâwk te pawh kha ngaihtuah  tham tak a ni. Mizo DC-te âi khân a ngaihna an hre deuh zâwk em ni chu âw tih mai tùr a ni.

 Mizoram sawrkara thawk tùrin vai officer—IAS&IPS bâkah IFS leh Central Services-a mite pawh an lo la chhuak zêl ang. Anniho hi kan thawhpui thiam chuan hna ṭangkai tak an thawk thei ang tih ring ngam ila. Cachar DC *Keerthi Jalli* (IAS 2013), Andhra Pradesh mi chu tûnlai hian a lãr hle mai;  ramri buai lâi pawh khân ṭang na tak a ni. Assam mi a ni bîk hauh lo; mahse a awmna state tân a rinawm thiam hle a ni. Chutiang bawk chuan Mizorama IAS&IPS officer rawn awmte hi kan hman thiam chuan Mizoram tân hian an ṭang na thiam hle ang tih ring ila. Kan rin ngam loh erawh chuan anni tân pawh rilru put dàn táwk thiam ve mai a ngâi ang. 

 *NGO Co-ordinating Committee-in Mizoram Chief Secretary ṭang lâi, Dr. Renu Sharma office kái tùr dàn an tum hi chu a ho mai pawh ni loin a âtthlák tak zet zâwk a ni.*
(Revd CHṬ—30.5.2022)

- Revd Chuauṭhuama,
May 30, 2022

Post a Comment

0 Comments