KṬP GENERAL CONFERENCE I RAWN KAL VE DÂWN A NIH CHUAN!

- Kenny Muankima


Kolasib hi Mizoram district hran hran zinga District Headquarters khawthleng rem ber a chhal ngam khawpa khawthleng nuam a ni a. Mizoram hmar lama awm niin sea level aṭanga 888 m (2,913 ft) vel chauha sanga awm a nih avang te, a location hi 24°13′52″N 92°40′34″E a awm a nih vang te hian khaw vawt tak a ni lo tih chu i chiang nghal thei mai ang.



Kum 2011 chhiarpuiah khan Kolasib ah hian mi 24,272 (District Population - 83,955) awm anga chhiar a ni a, LAD Household Locality Profile aṭanga a lan danin Selesih sangsarih khua pel hretin Kolasib khawpui chhung ah hian chhungkua 7,629 a awm a, a khaw len zawng tur pawh i mitthla thiam maiin a rinawm. Heng zinga 51.12% hi mipa niin 48.88% hi hmeichhia an ni a, nula tan kawppui zawnna hmun ṭha a nih zawk hmel riau mipa an chuang nual dawn tlat!



Engtin nge i rawn kal theih ang?
Helicopter hi Pawan Hans service kha Kolasib - Aizawl ah hian a awm ṭhin nain an tawp lailawk rih a, tunah chuan road-way a i rawn kal a ngai dawn a. Kolasib to Aizawl hi NH54 ah hian 83 KM niin Maxi-Cab (Sumo) hi 6:00AM - 5:00PM inkar darkar tin chhuk leh chho a awm reng a. Mahni lirtheia rawn kal tur lo tan pawh kal leh hawah harsatna a awm lo ang.

Filling Station dinhmun?
Mahni lirthei emaw midang motor hire a kan kal a nih pawhin kan hriat duh fo chu Filling Station awm dan hi a ni fo a. Aizawl i rawn chhuahsan hnuah - Serkhan dai, Bualpui leh Kolasib khaw tawn tirhah Aithuama Filling Station a lo awm ang a. Silchar lam aṭanga i rawn chho a nih thung chuan Vairengte, Khârzawl leh Kolasib khaw tawn tirhah Mizofed Filling Station a lo awm bawk ang. Fuel ah hi chuan tlan pah rem vek a nih vangin phâng lo turah lo inngai tawp phawt mai la..


Kawng laka chaw eina tur hi?
Aizawl leh Kolasib inkarah hian Lungdai, Serkhan, Bualpui leh Kawnpui te hi khaw hla tak tak aṭanga ṭam taka rawn thleng te tan chaw eina atana hotel awmna hmun deuh a ni a. Kal lam leh haw lamah pawh a rem vel ve ve ang a. Sairang kawnga tlan tan chuan Sairang hi a nih deuh mai hmel.. Silchar lam aṭanga lo kal tan chuan Vairengte, Bilkhawthlir dai vel a nih mia hmel thung a. Rawn thleng tlai zanriah lam fel law law duh leh haw lamah zing chhuah duh tan pawh a buaithlak loh ve ve ang..

Mobile Network dinhmun?
Ṭhalai fuankhawmna te tana pawimawh tak pakhat niziah chu Mobile Network ṭha hi a nih miau avangin hei hi sawi lan loh a rem lo. Network hi chu location a zir ni mahse a over-all anga chhut chuan Kolasib ah hian Jio hi a zia berin a rinawm a. Airtel hian dawtin hmun khawi emaw laiah phei chuan a ṭha ber dinhmun a luah bawk ang. Vodafone hi chu khawilaiah pawh a ṭha lo vel vek a ni ta berin a lang.

Thawmhnaw ken tur?
Sawi tawh angin khaw vawt tak a nih loh avangin a pan lam apiang kha ken tam a chi zawk hmel a. Chutih rual chuan sea level aṭanga a san loh em avangin khawchin inthlak thutah pawh boruak a inthlak dawrh theih avangin thawmhnaw lum lam ken loh tawp chu a felhlel deuh mai thei. Tin, Pandal hmun tur hi Conference laia ruah a sur ta chiam a nih chuan a berh deuh chep chep mai thei a, a chiau deuh ta emaw, a sa rum rut a nih pawhin thawmhnaw a hek lo thei lo tih erawh hre tel ta ila..

Eng lirthei nge ken chi ang!?
Kolasib khawpui chhung kawng hi zau tak tia sawi tur a ni lem lo a. Khawdang motor in min chimbuai tam loh avanga Traffic Jam awm lohna khawpui la ni ve cha cha a ni ber a. Tin, Conference hun hian motor lut a tam dawn bawk nen a te lam apiang a samkhaiin a rinawm a. A khalh peih tan chuan Two wheeler a ṭangkai zaw berin a rinawm.

Tui leh power supply?
Power Supply ah hi chuan District a zawnga eng ṭha ber kan ni hialin a rinawm a. A thawktu lam inpe tak tak te vangin thli leh ruah vanga chhia a awma kan han thim ve pawh hian kan thim rei hman mang lo a ni ber zaw mah. Chutiang bawkin tui pawh hi kan hnianghnar ṭhin viau a. Mahse nikum hmasa vel aṭanga tuihna a han kang chho leh tlahniam deuh vang khan kum dang ang em em chuan kan hnianghnar lova, mahse kan phâng lo turah ngai ang.

Kohhran lam hi?
Kolasib khawpui chhungah hian Presbyterian Pastor Bial panga (5) awmin Presbyterian Kohhran Biak In 18 a awm mek a. Family Guidance & Counselling Centre pakhat (1) leh Synod Bookroom pakhat (1) a awm mek a ni.

Chawhmeh lam ve thung?
Kolasib ah hian thlai thara tharlam ṭha a, thlai hnah hring thar tak tak kan hmeh thei turah ngai ila. Sa lamah tunhnaiah vawk hrileng vangin vawk a thi nasa a, thlenna te lo inbuatsaih lâwka a hrisel ṭha an lo rêp te a nih ngawt loh chuan vawksa hmeh lamah beisei a sang lo sa!

Engnge hriat ṭul dang pawimawh awm thei?
1. A hmasa berah chuan Facebook i hmang ve a nih chuan Conference Page hi lo follow ve la, Telegram i hmang a nih pawhin Conference Channel leh Group te hi i lo join ve dawn nia
#Channel: https://t.me/KTPGenConf22Info
#Group: https://t.me/Kolasib2022
#Page: https://www.facebook.com/KTPGenConf22

2. Hmun hran hran leh kan hma zawn ṭheuha Conference atana kan inbuatsaihna te Zoram pumin kan inhriatpawh tlan theihna atan chumi lam hawi thu leh thlalak te IG & FB ah i post dawn reng rengin Conference 2022 hashtag #KṬPGenConf22 hi caption ah min lo zeh tel sak ve la..

3. Tin, Kolasib mipui zia hi hriatchian a ṭha. Chuti lo chu i lo vuivai palh hlauh ang e. Kolasib mipui hi a tlangpuiin mi chukha thiam lem lo, ngaihthah chuang miah si lo, an mikhual te pawh mahni in anga che/khawsa ve bawrh bawrh mai tura en liam tawp chi kan ni tlangpui a. Chuvangin over miah si lo khan tu inah pawh thleng la zak buai vel duh suh, mahni in anga i awm thiam leh i nuamsa a ni mai!

4. Traffic Rules hi Conference chhunga hman tur bik siam danglam a ni a, man ngai lo turin KṬP General Conference 2022 Facebook Page leh Telegram Channel aṭang te khan lo download in lo bih hmasa la a duhawm. @ https://www.facebook.com/102111449147721/posts/107645435260989/

5. Kolasib lam hian palai lo kal tur te thlenna tur Counter siam sa fel thlapin Counter tinin an area a mikhual neih dan tur an tifel thlip thlep tawh hlawm a. Chuvangin i chhungte, ṭhiante, thawhpui leh hmelhriat te ina thlen kher tum lovin i thlenna tur counter pan la, anni ruahhmanna ang zelin thlenin pan ta zawk la a Kristian Ṭhalai Pâwl viauin a rinawm. Tin, mikhual hmuah ni/thlen kim ni a kim thei lo, tlai khawhnua lo kal tur te pawh kan counter thlenna tur i/c te information pe thlapa kal chauh ni se mikhual inchhiar hmaih a awm lo deuh ang. https://www.facebook.com/102111449147721/posts/102486835776849/ 👈🏻 i/c te contact i duh chuan https://www.facebook.com/102111449147721/posts/104079882284211/

6. Lirthei a tam dawn avangin a khalhtu te pawhin vanduaina thleng palh a awm lohna atan theihtawpa fimkhur tum tlang ta ila.

7. Khawpui chhungah Bus a service dawn avangin lirthei keng lo tan chuan Bus Stand hriatchian a pawimawh viau ang. Hei pawh KṬP General Conference 2022 Facebook Page leh Telegram Channel aṭangin a download mai theih ang. @ https://www.facebook.com/102111449147721/posts/107642485261284/

8. Kan thlenin tur a hriat si loh a, khawi khawmpui pawha ṭhlalai lam harsatna ni fo chu mobile charge dan tur hi a nih ṭhin avangin portable extension nei tan chuan ken tel thek hi inkhawmpuiah hi chuan a finthlak fo mai.

9. Zoram dung tluan aṭangin mi chi hran hran, fimkhur dan pawh in ang lo tak tak leh nunphung pawh inpersan tak tak pungkhawm tur kan nih dawn avangin hripui leng mek Covid19 laka inveng tura fimkhur te, lirthei chetsualna thleng palh thei laka fimkhur te kha chu mitin mawh a nihzia chiang ta bawk ila..

10. Kohhran Hmeichhe Khawpui Lian Kolasib in kan thlen ṭuma kan buaina lian ber pakhat chu mikhual bo zawn kha a ni a. A la kal ngai lo tan chuan khawthleng pharh duai maiah hian bo a sam viau ni tur a ni. Chuvangin i thlenna veng leh i thlenna chhungkaw hming te kha bel vat la, i hriat loh pawn zawt hreh suh. Data pack rawn nei tam la, gmap hman rawn thiam la a ṭha hlei hlei. "Auto-rickshaw 2 dinna bulah" tia thlenin chhinchhiah te kha rawn ching ve lo la!

11. Kolasib hi in bul maia thing leh mau la awm kan awm nual avangin lum viau mahse thosilen lo keng la i inchhir lo mai thei. I thlenna ten thosi nei lo mahse rannung thlawk neuh neuh a tam viau ve thei tlat.


#KṬPGenConf22

Post a Comment

0 Comments