I DUHTHUSAM CHU ENGTIN NGE I KALPUI DAWN?

 *I DUHTHUSAM CHU ENGTIN NGE I KALPUI DAWN?*

- Rick Warren

- May 3, 2022

“Chutichuan mi fing lote anga awm lovin mi fingte anga awm zawkin, in awm danah fimkhur rawh u; nite hi a ṭhat loh avangin remchannate lei zel rawh u.” Ephesi 5:15-16.

Tute pawh hian duhthusam kan nei a. Naupang i nih lai aṭang tawhin i nei tawh pawh a ni maithei. Tunhnai lawk aṭanga i neih pawh a ni maithei. Duhzawng, chakzawng leh tum neihte chu mi zawng zawng nunphung a ni. I chhungrilah i thukru pawh a ni thei, amaherawhchu, khawiah emaw chuan duhthusam chu i nei ngei a ni.

Chuvangin duhthusam i neih leh neih loh chu zawhna a ni lo. Zawhna awm chu, chu i duhthusam chu engtin nge i kalpui dawn tih hi a ni zawk? 

Duhthusam zawng zawng hi a hlawhtling vek kher lo. I fel tawk loh vang te, i chhuahvah tawk loh vang te emaw i rau tawk loh vang te a ni chuang lo. Duhthusam hi a hlawhtlinlohna chhan tlangpuiah chuan, a hlawhtlinna tura ke pen chhin ngaml oh vang a ni.

Bible-in lal pakhat a tum ti hlawhtling ta lo chungchang a sawi a, “Jehosaphata chuan Ophir-a rangkachak phur tur Tarsis lawngte a tu a; nimahsela a kal ta lo; Ezion-geber hmunah lawngte chu a chhe ta vek si a.” (1 Lalte 22:48)  

I nuna lawng engtikah mah lo lut lo tur chu a lungchhiatthlak viau mai, chu ai mah chuan lawng tu vek tawha, kal chhuahtir miah loh kha a ni zawk. Lal Jehosaphatan tha leh sum a sen ral tur zawng zawng han chhutpui teh. Rangkachak phur tur lawngrual a tu a, nimahse pakhat mah a kalchhuah tir lo a ni. Lawng chawlhhmun pawh an pel lo hrim hrim a ni! Thlipui a lo tleha lawngte chu chawlhhmunah an la awm reng a, lungte chu an su dawt dawta, an chhe ta vek a.

Mi ṭhenkhat chuan an lawng tur nghakin an damchhung hun an hmang tluanchhuak zaka. Mahse Pathian chuan i lawng lo lut tur chu a nghak lova. Lawng chawlhhmun aṭanga i lawng kalchhuahtir hun chu a nghak zawk a ni.

Mi pakhat kum 30 lai mai rawngbawlna bul ṭan tura duhthusam nei ka hriaa. A sawi ṭhina, a duhthu a sama, a ruahman bawka. Hun tam tak chu duhthusamna atan a khawhrala, amaherawhchu chu duhthusam chu kaltlangpui turin ke pen chhin a ngam miah lo. Lawng chawlhhmun aṭang chuan a lawngte chu a kalchhuahtir miah lova.  A hnu lawkah chu pa chu a thi a, a duhthusam pawh a thi zui ta a ni.   

Bible kalh zawnga lungchhiatna avanga thil tih ṭhulhtirna hi a tlanglawn hle ang, mahse a taka tihhlawhtlin har ve tak chu a ni thei e. Ti nghal mai rawh. Bible chuan, “Chutichuan mi fing lote anga awm lovin mi fingte anga awm zawkin, in awm danah fimkhur rawh u; nite hi a ṭhat loh avangin remchannate lei zel rawh u.” Ephesi 5:15-16.

Bible chuan remchanna leia ti nghal zel turin min duha. Duhthusam tihhlawhtlinloh chu a lungchhiatthlaka. Lawngte chu lawng chawlhhmuna awm tura duan an ni lova. Kalchhuak tura duan an ni zawk a ni.

Kalchhuak turin i inpeih em?  

 

Ngaihtuah zui atan

* Eng duhthusam nge a puitlinna tura hmalak miah loh i neih? 

* I duhthusam a taka chang turin engthil nge ila mamawh? Chung thilte chu Pathian puihnain engte nge awma i hriat le?

* Vawiinah hian eng remchanna nge lei ṭha ber nia i hriat?

*[Lettu: Sangpuia]*