Ticker

10/recent/ticker-posts

KHA ZÂN KHA!

May 8, 2022 - Pathianni zan a ni a. CKṬP ruahmanna aṭanga a lan danah chuan mihring 10,000 vel kal tur anga round-up theih a ni chungin Kolasib lamin a bak kal awm thei nia an ngaih avanga mi 12,000 lenna pandal an sakah General Conference vawi 59-na tawp zan hman a ni tih kan la hre ṭheuh awm e.


Awlsam leh rang taka EXPLORE MIZORAM a thu post te i dawn duh chuan telegram channel hi lo join ve rawh @ https://t.me/exploremizoramchannel

Usher lamin theih tawpa chhiar dik tuma vawi 4/5 lai an chhiar ṭhat hnuah an chhiar theih chin ngawt pawh hemi zan hian mi 30,160 an ni hem mai! A ropui a sin.

Chutah he zâna Inkhawm ten he zan hi an damchhunga an hriat reng tawhna turin chung lamin ro a rel a. Inkhawm ṭan hnu lawkah ruahpui a rawn tir ta! Sur nasa bian bian tak a ni.

Pandal ah mi 12000 vel an tawmhul theih chuan pawn lama ruah do tura lang kha mi 18,160 vel an ni dawn tihna a ni a. Mipui pungkhawm chanve aia tamin ruah an do a ngai dawn nia a lan takah chuan Sub-Committee hran hran an phe nghal suau suau a.


- Mipui tawmhulna turin New Diakkawn Community Hall an hawng a, Govt. Diakkawn Middle School an hawng bawk a.
- Lam tuala mipui inhnawh lut turin pawn lama duty ten an ngen nghal a. Mahse atu mai pawh khan lamtuala luh hi an hreh vek bawk si.
- Tawmhulna tura Hall leh School hawn a nih thu hi Information Office aṭangin an au lauh lauh reng a. Mahse ruah thawm leh mipui insingsa thawm nen thawm a inhliah tawn hneh mai bawk si.
- Sub-Committee tinin an office ṭheuhah a tam thei ang ber mipui tawm hul tir tumin an beng bawk a. Information Office kha auna hmun ber a nih vangin bawrtu an ngah bawk nen an lo beng duhthawh deuh a, an office ṭhenawm Reception & Refreshment Office te nen Office pathum ngawtin a chim phah ta hial a nih kha.
- Mipui lam pawh mahni remhriat dan danin an insaseng bawk a.
- A ṭhen hall leh school ah an tlan lut a, a ṭhen pandal hnaiha awm inah te an tlan lut a, ṭhenkhat an thlenin lamah an tlan haw a, a ṭhen phei chu vawk inah te hial an zuang lut a nih kha!
- Ṭhenkhat, tlan ve duh reng reng lo, Inkhawm ban thleng raka ruah do tlang zak, an awm hmuna hlim em ema Pathian faka lam dawrh dawrh te pawh an awm bawk a. Anni ho hian a hmuna duty a hmutu apiangte mittui an ko chhuak a ni ber e!
- Reception lam lah an thawhlawm chhiar lai takin an office a chim bawk nen chhiar tura Polythene-a an dah zinga mi kawr tuia tla lut, bo ta daih a awm bawk a. Mahse ruahsur ban hnuah hai chhuah leh niin tihian an pho ta dul mai a nih hi.
- Mipui ruah laka an himna atana buaipui ngaih karah office chim ami te buaipui an ngai a, office chim buaipui a ngai zui bawk a.

Picture hi Office a chim lai taka thlalak niin an sawi a. Information Office chhuat a rik tuarh lai, Refreshment Office lam a chim ve hma, Office chim ṭan dawn lai taka Refreshment Chairman Upa James Vanlalruata hmel camera in an lo lak fuh niin an sawi! 😁

Ngaihtuah let vang vang pawh hian kha zan tluka pandala duty te tana zan luhaithlak kha a la awm lo a, Conference lo kal zel turah pawh kha zân anga duty indaih loh zân kha a thleng leh tawh kherin a rinawm loh.


Chuti chung chunga kan tlin lohna min hai der sak a, kan tlinna lai hlir min hmuhsaktu Conference a rawn kal, a bik takin kha zân a inkhawm ho vâng khan Kolasib tan chuan 'KHA ZÂN KHA' General Conference a awm chhung zawngin hriatreng a hlawh tawh ang. Khati khawpa kan buai phili tlâng chunga kan tlin lohna lai apiang min haider saktu Kristian Ṭhalai te chungah thinlung takin lawmthu kan sawi mawlh mawlh e.



#KṬPGenConf22 #KTPGenConf22








Post i hmuh dan

Post a Comment

0 Comments