KTP GENERAL CONFERENCE 1991 @ NORTH VANLAIPHAI

‘Memoir’

‘North Vanlaiphai ROPUINA RAM’

- Rinzauva Sailo

Bill Gaither-a hovin, tum lawk lohvin kum 1992 khan Home Coming bul an ṭan, an hlawhtlinzia mai chu. Anni aia kum khata hmain  KTP General conference 1991, North Vanlaiphaia neih-ah a van tla kan dawng ve nawlh. Inbuatsaih lawk lo, zirlawk lovin (impromptu), thlarau hmun khatah chêngin van lam kan thlir ṭhup a nih kha!

KTP General Conference a 'ROPUINA RAM' a lâr chhuah kum kha a ni. Mipui lam aṭanga hla thlan zin ber pahnih zinga pakhat a ni chiang khawp mai. Hla hruaitu zinga mi, Upa F. Mawitea pawh a confi' chho ṭan…ṭum khat pawh a thunawn aṭangin a'n sa ṭan nghal ngawt a, kan nui deuh ham ham. Conference palaiten a hla kan duh vanglai a ni a, kan sa kham thei lo a ni ber mai.

Special item zai turin, The Friends inti te, tleirawl rual an lo ding chhuak. Hruaitu bengvarin, "An zingah hian Nl. Zothansiami, 'ROPUINA RAM' phuahtu a rawn tel hlauh mai a, a hlaphuah dan te pawh ngaihthlak a chakawm e, a remchan leh sawi bawk se la" tiin. Mipui beng a verh kherh a sin. Hmai zawng zawng chu dawhsan lamah an chhawng vû hi a ni mai e.

Dawhsan-a ding, Kawrthah tleirawl rual, kawr vâr leh puan dum bih zingah guitar kuah ṭâng mai Zothansiami chungah mit a fu lehzual.

"He hla hi…kum hmasa lawka boral ta, ka pa puala ka phuah a ni a...Vanram hi ka ngai ngawih ngawih ṭhin, ka pa awmna hmun a nih avangin...” tiin ṭap pâr chungin a sawi chho. Amah khawngaihna leh lainatna nen mipui insum thawm chu nasa tak a ni.

Chutah..an han zai ṭan, a reh hian a reh duk mai. Chang 2-na:

Lungngaihna leh harsatna te'n,

Nitinin min chim fo  ṭhin a;

Thihna te'n min chim buai laiin,

Ropuina ram ka thlir thin.

An aw a chhuak hlei thei meuh tawh lo. Dawhsanah an inhru tliar tliar a, zahna nen, an ding dir ngar ngar a ni ber e. Zai hruaitute - U Chhuanawma leh Mawitea te nen kan inmitmei, zai hruaina hmanrua ber- Khuangpui a lo ri, a thunawnah mipuiin kan zaipui, a ṭhen an che chhuak, dingin an lam bawk. Ṭhiante mal chunga lo ṭap ngawng ngawng tawk lah bo lo. Kan alh ta hlut mai a ni. 

Chang 3-na:

Ropuina ram ka thlen hun chuan,

Lungduh ka ṭhen takte zawng nen;

Bang lovin Lalpa chu fakin,

Lei nun reng kan ngai tawh lo'ng.

A phuahtu aiin kan intitatu tawh zawk. Chappui alh vanglai ang hlutin, awrawl tawp tawpin kan zai rual dul dul mai. A ropui, a va han nuam tak em!  

A ni, khi Phai kin zokhaw nuam takah khian, 'ROPUINA RAM' kan thlir hova, kan chen ho tawh a. Khi khua aṭang ngei khian 'ROPUINA RAM'  thlir nawn ka la duh cheu bawk. Zothansiami (Tunah Kawrtethawvengah pasal fanau neiin a awm an ti) chibai leh ka duh a, ka thlen In, min duhsak em em tu - 'Zaute' tingata min ko ṭhin, Upa Vanthangpuia râla kal leh pawh ka ba hle a ni.