Dan hnuaiah Nawhchizawrh a thiang ta!

Aizawl | May 26, 2022: India ramin bung thar a kai a, a kai dan erawh Kristianna nen chuan a inrem chiah lo!

Nimin khan India Court sang ber Supreme Court chuan nawhchizawrh chu eizawnna pangngai-ah a puang ta rup mai!

Tun hmaa 'thiang lo' ṭhin khan Heti hian Dan hnuaiah Nawhchizawrh ch  'thiang' a nih tir ta a ni!

Nimin 25 May khan India court sang ber Supreme Court chuan, khawvela eizawnna hna upa ber nia sawi ṭhin, nawhchizuar te hnathawh dan chu eizawnna (profession) pangngaiah a pawm fel ta.

Indian Constitution Article 142 in Supreme Court hnena thuneihna a pek chu hmangin, judge pathum awmna bench, justice L. Nagaswara Rao kaihhruai chuan he thutlukna hi a siam ta a ni.

SC chuan Nawhchizuar te eizawnna chu pawmin nawhchizuar te chu, police te pawhin eizawnna dangte ang bawka mawihnai (dignity) takin an cheibawl ve tur an ni, a ti a, eizawnna dangte ang bawk a, Article 21 of Constitution in a sawi anga humhalh leh enkawl tur an ni, a ti a ni. 

Mihring puitling chinin mahni duh thu thlapa nawhchizawrh an kalpui chuan dan bawhchhiatna a ni lo va, inzawrhna hmun, brothel hawn erawh chu dan kalh a ni a ti. Chuvangin endik hna kalpui a nih pawhin nawhchizuar te chu buaina siamsak (harass) leh hremna pek (penalise) tur an ni kher lo, a ti. 

Police te hian chhuanlam chi hrang hrang siamin nawhchizuar te leh anmahni dawrtute hi manin thubuai an lo siamsak tawn ṭhin a ni.

Tin, nawhchizuar ten anmahni fa ngei an chenna hmuna an awmpui a nih pawhin, an eizawnna vang ringawta laksak tur an ni lo va, midang fa leichhawn emaw, rukchhuah (traffic) emaw ni lovin an fa ngei a nih leh nih loh erawh finfiah  phalsak thung.

      Tin, nawhchizuar te hi an eizawnna kawngah tihbuai an ni fo ṭhin a. Chutiang hunah chuan, an hnathawhna kaihhnawih thil ah police hnenah complaint an thehlut a nihin police ten an lo enhrang bik tur a ni lo. nawhchizuar te chu hriselna thilah leh dan lam thilah enkawlna pangngai pek ve tur an ni bawk.

    A chang chuan police te chuan check an neih changin nawhchizuar-ten condom tam tham deuh an kawl an hmuh chuan brothel siam anga thubuai siamsak an ching ṭhin a, hetiang thilah pawh, an invennana an hmanrua te chu buaina siamsak phahna tur a nih loh thu a sawi bawk.

     Tin, police te chuan nawhchizuar te mimal nihna chungchang media te hmaah an pholang tur a ni lo, a ti bawk. Heng mite hi lockdown vunglai phei kha chuan hna nei lovin an buai hle hlawm a, sawrkar pawm loh an nih miau avangin, migrant workers dangte anga ṭanpuina pek an ni bawk si lo va. Chuvangin he rorelna hian an nun a ti danglam hle tura ngaih a ni.

    He SC order tihchhuah a nih hian internet lamah sawi a hlawh zui nasa hle a, ṭha ti tu an tam khawp mai. Heti a nih takah chuan, nawhchizuar te eizawnna, tenawm leh zahthlak anga sawi pawh dan kalh a ni chho thei maiin a rinawm.

With Input from-  JT Chhunga / Internet