BASKETBALL | Mizoram super League season 7 tipoff

Aizawl | May 26, 2022: Mizoram a Basketball league sang Mizoram Basketball Association (MBBA) leh Zonet buatsaih Mizoram Super League (MSL) season 7 tipoff hun chu zanin khan Vaivakawn Cultural Centre-ah hmangin, Zonet co - owner K Sapdanga'n a Tippoff.

K Sapdanga'n MSL 7 a tipoff | PC Lala

He hun hi Angelina Paul chuan kaihruaiin MSL Club hruaitu leh Player te an kal tha hle. 

ZONET Co-Owner K Sapdanga chuan, infiamna hmanga Mizo thalai tih hmasawn hi Zonet dinchhan pakhat a nih thu sawiin chumi hlawhtlinna atana MSL 7 khelh a ni dawn ta hi lawmawm a tih thu a sawi.

Mizoramah phai atang player tha an rawn chuang chhuak a, player leh coach-ah pawh national team kan thleng chho zel hi MSL rah chhuah anih thu a sawi bawk.


K Sapdanga chuan, Club leh player te inpekna ropui a tih thu a sawi a, Basketball-ah Mizoram hian hma kan sawn zia a lang a ni, a ti bawk.

MSL inremna ah hian a senso hi Zonet-in a tum a, sponsor te awm thin mahse, senso erawh a phuhruk zo lo a, thalai ten infiamna lamah hma an sawn beiseina vanga hloh hi pawi an tih loh thu a sawiin MSL khel tur player zawng zawng te duhsakna a hlan bawk.

MSL Board chairman Malsawmtluanga chuan thusawiin sponsor te zarah  MSL 7 khelh anih dawn avanga lawmawm a tih thu sawiin an inpekna sum leh pai phal taka hman an phal vanga lawmawm atih zia asawi a, National Camp-ah Mizo an awm nual tawh a, hei hi MSL rah chhuah ani tih kan hriatin lawmawm kan ti a, hnamdang player tha tak tak MSL 7-ah hian an khel dawn a, mipui te a hmunah en theuh turin a sawm bawk.

MSL Board vice chairman Zomuanpuia chuan Handbook tlangzarhin, MBBA vice preaident Dr Vanlalthlana, MLA ni bawk chuan club hruaitite ngaihhruina thilpek a hlan a, Sponsor zawng zawng te hnenah Zonet director LV Lalthantluanga chuan ngaihhruina a hlan zui bawk.


MSL champion lai BCA te chuan champion tropy an rawn phochhuah hnuah MBBA General secretary R Lalnunpuia chuan Club tin captain theuh te ko chhuakin, infiamna thianghlim khel turin thu a tiamtir.

MSL 7-ah hian Club paruk Zarkawt BCA, Chawnpui Basketball Club, Tuikual South, Chanmari Vikings, Mission Veng Hotshots leh Khatla TBL ten an khel ang.

MSL 7 hi June ni 1, 2022 (Nilaini) zan dar 8:00 aṭangin R Dengthuama Indoor Stadium-ah khelh tan a ni ang a, Chanmari Vikings leh Mission Veng Hotshots ten an match hmasa ber an khel ang. Zonet chuan Live Telecast-in a pe chhuak dawn a ni.

- PC Lala
























Post a Comment

He post chungchanga i ngaihdan lo sawi ve rawh:

Previous Post Next Post