MNF chu hun ṭha lo atan ruat an ti; hun ṭha atan pawh ruat kan ni - MNF President & CM Zoramthanga

• MZP hruaitu hluiten MNF an zawm
•Kum 2023 inthlanah Congress Under 5, ZPM Under 10, MNF 30!


• "Mizo kan nih chuan ngaihtuahna seng vak lo pawha MNF zawm tur niin ka hria,"
- MZP Ex President B Vanlaltana

Aizawl | April 4, 2022: Vawiin Thawhtanni hian Mizo National Front (MNF) chuan Mizo Hnam Run, Aizawl-ah Chhung Inkhawm neiin, MNF President leh chief minister Pu Zoramthanga chuan MZP hruaitu hluite MNF party-ah lawmlutin thu a sawi a, "MNF chu hun ṭha lo atan ruat an ti; hun ṭha atan pawh ruat kan ni," a ti.



MNF President chuan, "MNF party chu intilal lo leh intodelh thang kan ni a, kan zin chhuak pawh hi hruizen, suahdur leh bawngtuthlawh nen kan chhuak mai thin. Mahni kea din tum, intodelh leh independent tum tlata kal thin kan ni, a ti a. Miten MNF chu hun tha lo atan Pathianin a ruat an ti thin a, hun tha atan pawh ruat a nih thu a sawi.

"Party-ah pawh keini chu indonain a chilh hnan kan ni a. Dhaka-ah ral vek tawh tura ngaih kan nih laiin Pathian tanpuinaa lo chhuak kan ni a, MNF sut tlang hi a tam tawk lutuk. Awmnem deuh ni ila hmanah kan ral tawh ang, kan dinnghehna hi Pathianin mal a sawm a, hei hi kan dinchhuahna a ni.

"Kan khingpuiten MNF chu hun tha lo atan ruat a ni, an ti thin. A dik rualin, hun tha atan pawh ruat kan ni," tiin Pu Zoramthanga chuan MNF-in mautam tam a hmachhawn thu leh tun tumah Covid-19 a hmachhawn thu a sawi a. "Pathian tanpuinain kan su chho zel a. Amaherawhchu, MNF chuan hei aia rapthlak kan su tam tawh lutuk, tam tak kan thi tawh bawk. Tuna harsatna hi chu, kan sut tlang tawhte ngaihtuah chuan a nep lutuk," a ti a. MNF party hi Pathianin tuaipui hmanga a tuai (chem anga chher hriam), chutiang lo kaltlang tawh chu a ni a, eng pawh hmachhawn ila mipuiten lo hlauthawng suh u, a ti.

MNF President chuan din ngheh chu chakna a nih thu sawiin, "MNF-ah chuan kan nghet tur a ni. Tui anga nghet lo a ni ve tur a ni lo. International war karah pawh dingnghet kan ni a, huaisen takin kan kal tur a ni. Covid period a zo ang a, malsawmna kan dawng ang. MNF hi tum ropui tak neia kal kan ni. Kan history kum 60 thlir ila min chhanchhuaktu Pathian hi a la pangngai reng a ni a. Hei hi kan chakna bul a ni," a ti.

Congress dinhmun sawiin, "Serchhip bye election kha thlirin CM bial hlun leh a bupuiah an candidate-in dahkham a chawi a nih kha. Kha khan a lantir chu an zam a ni. An candidate pawh halral thilhlanah an hlan a, party dang an vote vak a ni. Central lam thlir ila Sharad Pawar-a te pawhin UPA hruaitu nih an duh tawh lo. Delhi lama a khawnvartui bur a tluk tawh chuan heti lama a phita chu alh ngaihna a awm tawh lo. Nakum kan inthlang turah pawh an tihsual chuan an artelukawn thei," a ti.

Pu Zorama chuan: ZPM pawh hmana mi ang an ni tawh lo. Movement an inti a, unit neih tul an ti lo, kalphung thar an ti, kohhran hi kan unit a ni mai an ti. Val upa council nen chiang taka sorkar siam an tum a nih kha. Tunah chuan kha boruak kha a ni tawh lo. Party dang thovin an kal tawh a. Movement duh tawk lovin party recognition (registration) an fight a, Sebengtung sakeibaknei vuna inthuam ang mai leh super CM han tihte kha a rem tawh lo. Kalphung an thlak zing em em a. An kalphung ber chu sorkar kheuh pawr tur dap a ni mai.

"Keini'n diamond jubilee kan lawm laiin, anni chu tui anga nghet lo leh kalphung thlak zut, an dinna ngaia la ding an ni. Kum 2023 inthlanah Pathian leh mipui zarah MNF-in sorkarna kan chang ang," a ti a. Congress chu under 5, ZPM under 10, MNF chu MLA 30 tlin tura a rin thu leh Congress phei chu beih beih tham an ni lo, a ti.

Politics-a kan inbeih dan a hniam tih sawiin Pu Zoramthanga chuan: "Kan hnathawh dan leh development kalpui danah Zoram mipui tan a tha em? tih lam aiin an hunlaia tribal certificate an pek Kamrula-te an buaipui em em a. Abu-a pawh buhfai supply tura an hman kha, keini'n ramri buai lai khan i supply chhunzawm thei ang em tia kan chhawr zui mai a ni," a ti.

Chief Minister Pu Zoramthanga chuan India Budget-a Mizoram hmasawnna tur dah a nih thu sawiin, "Union Finance Minister Nirmala Sitharaman-i'n Union Budget-ah Special Assistance to States for Capital Expenditure hnuaiah Rs. vbc 400 kan rawn pe che, a ti a. Hengte hi ka zuk biak vang a ni lo, Pathianin Nirmala Sitharaman thinlungah a dah a niang," a ti a. Kan mamawh dangte pawh min pe zel ang, a ti bawk.

Pu Rama chuan eptuten sawi pawr tur an dap chawp nasa tiin, SEDP sem turte an hmu a, an mang a ang em em a. Heti lai BJP-ten president's rule-a Mizoram dah tura an nawr laiin Rajya Sabha Chairman berin Mizoram Assembly House-ah  kan rorelna chu India rama tha ber pawl a nih thu a sawi chhuak tih sawiin, party mipuite chu hlauthawng lo tur leh dinghet tlat turin a chah a ni.

MNF President-in vawiina mi thar lawmluhte chu; MZP general headquarters president kal chhuak B Vanlaltana, MZP Headquarters Saitual president kalchhuak Lalchhandama leh MZP Sub - Headquarters Lungsen president hlui F Lalremruata te an ni.

Lawmluh tharte aiawhin MZP president hlui Pu B Vanlaltana chuan MNF a zawm chhan a sawi a, "Pathian leh kan ram tan titu party awmchhun a nih vang leh mi tam takin nunna hial an lo hlanna a ni a. Mizo kan nih chuan ngaihtuahna seng vak lo pawha MNF zawm tur niin ka hria a. Tin, he party hi Pathian hriatpui a nih vang, a ti.

Mizo Hnam Run inkhawm hi MNF Vice President Pu Vanlalzawma'n a kaihruai a, Adviser Pu Vanlalrema Rokhum-in hunserh a hmang a. Secretary Pu Lallenmawia Jongte-in Zampui tlangdung zin report a pe bawk a. Inkhawmah hian Minister, MLA, party hruaitu leh mi thahnem tak an tel a ni.

Post a Comment

He post chungchanga i ngaihdan lo sawi ve rawh:

Previous Post Next Post