Zoram Thar-in Biak inpui hlimthla tlangzarh;

Zofate Lalpa Pathian in Thlarau Thianghlim hriak min thih ni a Biak inpui hlimthla tlangzarh hi a hun dik tak a ni - Rev Zaichhawna 

Aizawl | April 4, 2022: Zoram Thar Zofate Lairelna Inpui hruaitute chuan Rev. Dr. Zaichhawna Hlawndo hovin vawiin chawhma dar 11 khan Chanchinbumite kawmna Aizawl Press Club ah an nei.


Rev. Dr. Zaichhawna Hlawndo chuan Zofate zawng zawng ta tur Zofate Pathian Biakinpui chu sak ṭan theih tawh tur a nih thu a sawi a. Biakinpui hlimthla drawing pawh a tlangzarh nghal bawk. Vawiin hi Zofate tana hun pawimawh ber Thlarau Thianghlim kan ramah a in larna ni, Zofate Lalpa Pathian in Thlarau Thianghlim hriak min thih ni a Biakinpui hlimthla tlangzarh hi a hun dik tak a ni a ti bawk. He Biakinpui neitu chu Zofate kan nih angin  hnam hnatlangin kan vaia ṭangrualin Biakinpui kan sa dawn a. Khawvel in mak a ti hle dawn a ni a ti bawk. 

Press Conf. Video:



Zofate Pathian Biakinpui Hmel Hmang:
Biakinpui sak dan tur, a hmel hmang leh a hman dan tur Rev Dr Zaichhawna Hlawndo in a dawn dan te a sawi a. He Biakinpui hi Khawvel puma hnam tinrengte hip khawmtu a nih dawn avangin khawvela Kristiante Pathian Biakin lian ber a ni ang. Biakinpui ram zau zawng hi 23809.52 square metres (Bigha 17.79) a ni a, khawvela Biakin lian ber ni lai mek St Peter’s Basillica hi Square metres 23000 niin, Zofate Pathian Biakinpui hi Square metres 809.52 in a lian zawk a ni.


Biakinpui hi a dung leh vang feet 270 a ni dawn a. A san zawng hi feet 177 a ni ang. Lamtual zau zawng hi feet 80 hawlhtlang a ni ang. Biakin chhungah hian thutna 30000 dah a ni ang. Biakin hung chhung ah hian mihring 70000 vel din theihna tur a ni ang. Kawngkhar pui 12 a nei anga, chung kawngkhar 12 chuan pindan 12 a nei ang a, chung pindan te chuan hming an nei vek ang.
 
Heng kawngkharpui 12 chhunga pindan chhungah hian ṭhutna a awm vek ang. A bangah pindan awmzia hrilhfiahna thu leh lem ziah a awm ang. Biakinpui tlawhtu apiangte chuan chung pindan 12 chu tlawh vek tur a ni dawn a. Pindan awmzia leh a chhunga Bible thu leh a lem awmzia lo hrilhfiahtu an awm zel ang. Chung kawngkhar leh pindan hming te chu hetiang hi a ni ang:-
 
1. Thilsiam (Creation) kawngkhar leh Pindan
 2. Eden kawngkhar leh Pindan
3. Nova kawngkhar leh pindan ni ang
 4. Abrahama kawngkhar leh pindan
 5. Zawlneite kawngkhar leh pindan
 6. Bethlehem kawngkhar leh pindan
 7. Lal Isua Krista Kawngkhar leh Pindan
8. Kross Kawngkhar leh Pindan
9. Thawhlehna kawngkhar leh pindan: 
10. Zirtirte kawngkhar leh pindan
11. Tirhkoh Paula kawngkhar leh pindan
12. Damna kawngkhar leh pindan


Biakinpui Sak Dan Tur
Biakinpui hi Design Plus Architects, Aizawl Chanmari te duan a ni a, a satu an ni bawk dawn a ni. Sum leh pai lakkhawmna leh a ṭul ang apiang buaipuina chu Zoram Thar Zofate Lairelna Inpui kutah a awm ang. Biakinpui hi Hnam Hnatlang hmanga sak tur a ni ang. Khawvel puma Zofate zawng zawng a neitu kan nih vek dawn avangin mahni remchan leh phal anga Hnam Hnatlang tha leh thawhlawm te thawh tur a ni ang. Mimal leh chhungkua bakah pawl emaw kohhran hminga hnatlang duhte tan pawh tha leh thawhlawm thawh theih a ni ang. Zofate Pathian Biakinpui sak hnatlang hi Zofate a taka Lal Isua Krista a kan inpumkhatna tur hmanrua a ni dawn a, khawvelin thlah khat leh hnam khat kan ni tih hi lohtheihlovin an hre dawn a ni. A satu tura tan pawh hian hnamdang ringlote rawih a rem dawn lova, Zofate kut themthiamna hmanga sak tur a ni dawn a ni.


Biakinpui Hman Dan Tur:
Zofate Pathian Biakinpui hi Zofate ta tur, tumah mimal emaw pawl emaw thliar hran awm lova kan vaia ta tur a ni. Zoram Thar Zofate Lairelna Inpui in a enkawl dan te, hman dan tur leh kalpui zel dan turte a rel zel ang.

Tuna Mizorama Pathian Biakin hi chu kohhran pawl (church denomination) ta deuh vek a ni a, in hman ṭawm theih chin awm mahse zalen taka in hman ṭawm theih Pathian Biakin kan la nei lo a ni. He Zofate Pathian Biakinpui hi hnam biakin a ni dawn a, kan hnam leh Kristianna hi a inzawm tlat tawh dawn a ni.


Kohhran pawl hrang hrangte pawhin an duh chuan Inkhawmpui nan an hmang thei ang. Tin Ram pum huap emaw, khawvel huapa inkhawmpui nan te pawh hman theih a ni ang. Kan ramah Pathian Lal Ram Sawrkar a lo din hunah chuan Zofate kan inpumkhat vek tawh dawn a, Kohhran Rorelna (Church Council) te pawh a ding tawh turah beisei a ni a. Chutianga rawngbawlna hmun tur office te pawh a remchan anga buatsaih theih a ni ang.

Biakinpui chhungah hian pindan hrang hrang hman theih tur a awm dawn a. Hengte hi pawl emaw kohhran hrang hrang rawngbawlna nei duhte leh in tuaithar duh te tan pawh hman theih tura ruahman tur a ni ang.

Biakinpui ram chhungah hian pangpar hmun leh thing leh thei hrang hrang hmun tur bikte ruah hman vek a ni. Biakinpui hmun sirah hian luite a luang tlang a, he lui hi dil lian taka khuah remchang takin a awm a, he hi uluk taka khuah tur a ni dawn a, sangha chi hrang hrang te khawi a ni ang a, lawngleng te pawh dah tum a ni. Mikhual thlenna tur – a hranga mipa leh minu thlenna in te, mimal emaw chhungkua thlen theihna turte pawh ruahman a ni ang. Lirthei dahna inchhawng lian tak pawh sak tura ruahman a ni bawk.


Hnatlang thawhhlawn hi tam lua tlem lua awm lova thawh ṭan theih a ni a. Hmingpum leh veng/khua chiang taka tarlan tur a ni a, a hnuaiah te hian pek theih a ni.

Account Holder: Zoram Thar
Account Number: 60300816949
IFSC: MAHD0001592

Account Holder: Zaichhawna Hlawndo
Bank: State Bank of India
SBI Account number: 20370061777
IFSC: SBIN0001539

Google Pay: 
Zaichhawna Hlawndo
8131958421

Post a Comment

He post chungchanga i ngaihdan lo sawi ve rawh:

Previous Post Next Post