FIH Women's Junior World Cup-a an khelh hmasa berah India chak; Didiki'n goal 2 khung

Aizawl | April 2, 2022: FIH Women's Junior World Cup khelh mekah India chuan an khelh hmasa berah Wales hmachhawnin 5 - 1 in an chak.

Didiki |© IG

India Hockey Women's Jr team-ah hian Mizo nula pathum telin, an vaiin an khel vek a. Chu mai ni lovin, Lalremsiami Hmar leh Lalrindiki (Didiki) te'n goal an khung.

vawiin match a thlalak

India in Wales 5 -1 a hnehna turah hian Mizo nulate an thawhhlawk hle a, Mizo nulate'n si 5 ah si 3 an thawh a, si 2 dang erawh mi dangin an thun a ni. Lalremsiami Hmar-in  Minute 4, Lalrindiki  minute 32, Mumtaz Khan minute 41, Lalrindiki minute 57 leh Deepika minute 58 ah te an thun a ni.

Marina, Didiki leh Remsiami

FIH Women's Junior World Cup 2021, South Africa a April 1, 2022 aṭanga khelhah hian India Jr. Hockey Women Team-ah Lalremsiami, Marina Lalramnghaki leh Lalrindiki an tel a ni.

Remsiami, Didiki, Marina

Nangmah hrim hrim khel ṭha i inti em?  i beisei i phak em? tih zawhna chu goal 2 khungtu Didiki chuan, "Aw ti e. Ka beisei aiin khel tha ka inti, Pathian min awmpuina vang liau liau a ni. A tir khan goal chu ka missed ve deuh hlek a, mahse Pathian remruat zawk a ni ang e, play pangngai-ah chuan tha thawkhat viau mai." tiin EXPLOREMIZORAM.COM zawhna a chhang a.

Lalremsiami Hmar chuan, "Aw, Pathian zarah keimah bik performance a ṭha ka tia, ka inbuatsaihna ang takin ka khel chhuak a ka lawm. Chuan, kan team pawh kan khel tha  vek e." tiin EXPLOREMIZORAM.COM zawhna a chhang bawk.

Lalremsiami hi Kolasib khua niin, Marina hi Kawnpui khua a ni a, Lalrindiki hi Hnahthial khua a ni bawk. Kolasib district nula pahnih leh Hnahthial district nula pakhat an ni a. Tin, Siami hi Govt Hrangbana College zirlai niin, Didiki leh Marina hi Govt Aizawl College a zirlai an ni.

Ngaihven hlawh Didiki

Didiki hian ngaihven a hlawh nghal hle a. A ṭhiante pahnih hi nikum ah team squad ah telh an nih tawh hnuin, Didiki erawh hi chu an kal dawn hnaiha Squad puanah a tel dawn tih hriatchian chauh a ni thung.

Nikum khan a kut vei lam ruh titliakin a inhliam ang ren rawn a. Hetia a rawn khel ṭha hian ngaihven a hlawh hle a ni.

Ngaihven hlawh - Hockey Star thar Didiki chanchin

@  https://www.exploremizoram.com/2022/03/didiki.html