ṬAWNGṬAI CHHANNA DAWN DAN THURUK KAWNG LI

— Rick Warren 

— Feb 1, 2022



"Aw LALPA, van Pathian, Pathian ropui leh hlauhawm, nangmah hmangaiha i thupêk pawmtute chunga thuthlung hlena khawngaihna tilangtu; Israela thlahte sualna, i chunga kan sualna thupha ka chawi chhûng hian i beng lo chhiin i mit lo meng la, i chhiahhlawh tawngtaina, i hnêna a chhun azana i chhiahhlawh Israela thlahte ka ngensakna hi lo ngaithla teh ang che; kei leh ka pa chhûngte chu kan lo sual ta si a. I chungah tha lo takin thil kan lo ti ta a, i chhiahhlawh Mosia hnêna i pêk, thupêkte, dan te, rorêlte chu kan lo zawm ta lo va. I chhiahhlawh Mosia hnêna, 'In bawhchhiat chuan hnamtin, zingah ka titaitam ang che u a; amaherawhchu ka lam in lo hawi leh a, ka thupêkte in pawma in zawm chuan in zinga mi van tawp thleng pawha hnawhchhuah awm mah sela, chung ata pawh chu ka kai khâwm leh ang a, ka hming ka awmtirna tûra ka ruat hmunah chuan ka hruai leh ang,' tia thu i pek kha khawngaih takin hre reng ang che..." Nehemia 1:1-15

Pathianin huaisen taka ṭawngṭai turin a duh che a ni.

Entirnan, Nehemia, lal Artazerzia no hlantu chu Jerusalem kulh a chhia a ni tih a hriat khan huaisen takin a ṭawngṭai a ni. Jerusalem leh a venhimna kulhte siamṭha tura a kir theih nana lal thinlung a inhawn theih nan Pathian hnenah a ṭawngṭai a ni.

A ṭawngṭainaah chuan, Nehemian ṭawngṭai chhanna dawn dan thuruk kawng li a hailang a ni:

Pathian nihphung ngaihtuahin dilna siam rawh.

Nehemia'n Pathian nihphung leh a tih ṭhinte ngaihtuahin a ṭawngṭai a ni. Pathian chu tunge a nih a hriatchian em avangin inringtawk takin a ṭawngṭai a ni. Nang pawh Pathianin i ṭawngṭaina a chhang ngei ang tih ringin i ṭawngṭai thei a ni. Hetiang hian ṭawngṭai la: “Pathian rinawm i ni. Pathian ropui i ni. Hmangaihtu Pathian i ni. Pathian danglam tak i ni. Tunge i ni tih ka hriat che avangin he ṭawngṭaina hi ka ring a ni. He harsatna hi i ching fel thei tih ka hria, Lalpa!”

Sualna neia i inhriat chu puang rawh. 

Nehemia'n a sualna a puang a. Israel sala a tanna chhan kha Nehemia vang a ni lo. Kha tih hunlai khan pian pawh a la piang lo a ni. Mahse, a ram sualnaah chuan a inchhiar tel ve a ni. Heti hian a sawia, “He dik lohnaah hian ka tel ve a ni.”

Pathian thutiamte chu neih tum rawh. 

Nehemia chu Pathian hnenah a ṭawngṭaia, hetiangin, “I chhiahhlawh Mosia hnêna i sawi kha hre reng la” tiin (Nehemia 1:8 NLT). “Hrereng la” tih thu Pathian hnena sawi chu a ngamawm em? Nehemia'n Pathianin Israel fate hnena a lo tiam tawh chu a hrilh nawn a ni. Chumi zulzui chuan, a ṭawngṭaia, “Lalpa, Mosia kaltlanga min lo hriattir tawhna angin kan rinawm loh chuan Israel ram hi kan chan dawn a ni. Mahse hei pawh hi min tiama, kan sim chuan ram chu min pe let ang" tih hi.

Pathian chu hriattir nawn a ngai em ni? Ngai lo. A tiam tawh chu a theihnghilh em ni? Theihnghilh lo. Chuti si engvangin nge Pathian chu i hriattir nawn? Chu chuan Pathian thutiam i hriatrengna tura a puih zawk avang che a ni.

I thil dil chu chiang takin sawi rawh.

Chhanna mumal tak i beisei chuan, dilna mumal tak siam rawh. I ṭawngṭainate chu huamzau tak a nih chuan, Pathianin a chhang che a ni tih engtin nge i hriat theih ang?

Nehemia'n lal hnena thu a sawi hnu chuan, heti hian a ziak a, “Lal chuan lawm takin mi kaltira” (Nehemia 2:6 NIV). Nehemia ṭawngṭaina chu Pathianin a chhang a ni.

A hlawhtlin theih nan Nehemia chu huai takin a ṭawngṭai a ni. Hetiang hian i ṭawngṭai ve tawh em, “Lalpa, min hlawhtlintir rawh”? I la ṭawngṭai lo a nih chuan, engvangin nge i ṭawngṭai loh vang? Pathian hnena hlawhtlinna dil chu a ṭha lawm ni? Hlawhtlinna i sawifiah danah a innghat zel a ni. Hei hi hlawhtlinna sawifiahna ṭha tak niin ka hria: “Ka nuna Pathian thiltum tihhlawhtling tura rinna, hmangaihna leh Thlarau Thianghlim thiltihtheihna.” Hei hi nuna thiltum hlu tak a nih avangin huaisen takin i ṭawngṭai thei ang.

A lehpekah chuan Pathianin i ṭawngṭaina a chhan theihna tura a mamawhte ngaihtuah la, Nehemia'n a lo entir tawh chu zawm la. Pathian nihphung puang la, i sualna puang la, Pathian thutiam chu beisei la, thil dil bik nei ang che. Tichuan Pathian hnen aṭangin a chhanna chu nghak ang che!

Ngaihtuah zui atan

Pathian hnena ilo dil ṭhin chu eng nge? Chu i thil dil chu Pathian nihphung nen inzawm emaw inzawmlohna engtin nge ni?

Thil huamzau deuh i lo dil ṭhin em? Huamzau taka i dil chu engtin nge dil bik neiin i thlak theih ang?

Vawiinah hian Pathian thutiamte zingah eng nge beisei theih i neih?

Eng thil pawh lo ti tawhin, khawi hmunah pawh lo awm tawh mah la, Pathian angchhungah chuan hmun i nei a, a nghak reng che a ni. He sawmna hian a huam zau va, ring la pawm tawp mai rawh.

Pathian khawngaihna chu ring la. Pathian hnenah i sualna puang la, ngaihdam dil ang che.

Chhandamna chu tute tan pawh a ni a, miin an sualnate an puana Isua chu Lal leh chhandamtua pawm apiangte tan a ni. Pathian angchhungah i tel ve theih nan inngaitlawm takin Pathian chu dil ang che.

I inpeih em? Ṭawngṭai tura i inpeih chuan, hetiang hian ṭawngṭai rawh le:

“Aw Lalpa, ka sualna avanga nang nena kan inṭhenhran hi ka duh tawh lo. Nang ka rin che chuan ka thiltih sual zawng zawngte min ngaidam dawn a ni tih min tiam angin, nun awmzia hi zir ka tum ta, chuti chuan i vanram in nuamah engtikniah emaw chuan min la pawm ve ang. 

“Ka sualnate ka rawn puanga, ka chhandamtu i ni tih ka ring e. Ka sualnate ka puana nang ka rin che chuan ka him ang tih min tiama. Chhandamna chu khawngaihna avangin rinna kaltlanga kan neih a ni a thildang vang a ni lo i tih avangin ka ring che a ni. Ka nunah hian Lal ni turin ka pawm ta che a. Vawiinah hian i hnung zui ka duh a, ti tura min tih apiang chu ti turin ka inpeih e.

“Nung tura min siam ang ngeia nun ka duha. Hlimna dik chhar ka duha, mahni tana nun ai chuan damchhunga i rawngbawl ka duh a ni. Ka nunna i hnenah ka hlana, min chhandam tur leh i angchhunga min pawm ve turin ka ngen a che. Isua hmingin ka dil e. Amen.”    

Isua pawm tura i ṭawngṭai thei a nih chuan, he email-ah hian min lo hriattir la, min lo bia ang che Rick@PastorRick.com. Isua nena zinkawng i zawh ṭanna tura thil pawimawh a thlawnin ka pe dawn che nia.  

[Lettu: Sangpuia]

Post a Comment

He post chungchanga i ngaihdan lo sawi ve rawh:

Previous Post Next Post