Ticker

10/recent/ticker-posts

Lawngtlaiah a tum hnih nan District Level Committee on Myanmar Refugees thu khawm

Aizawl | Feb 1, 2022: Nimin khan Lawngtlai District Level Committee on Myanmar Refugees chu a tum hnih nan an Chairman, Lawngtlai Bawrhsap Dr Andrew H. Vanlaldika hovin Lawngtlai DC Conference Hall-ah an thu khawm.




Chairman Dr Andrew H. Vanlaldika chuan January ni 27 - 29 chhunga District chhung hmun hrang hranga raltlante inkulhna hmun a tlawhnaa a thil hmuh leh hma lak dan a tar lang a. Task Group on Myanmar Refugees Nodal Officer, Lawngtlai Sub-Divisional Officer (Sadar) Pi TT Beikhaizi hnen atangin Lawngtlai District chhunga Myanmar raltlante enkawlna kawnga hma lakna kalpui mek dan ngaihthlak a ni a. Lawngtlai District chhunga Myanmar atanga raltlan awm mekte dinhmun leh mamawh thlir ho niin, chhawmdawl leh enkawl zui zel dan turte sawi ho a ni bawk.

Task Group on Myanmar Refugees Nodal Officer report atanga a lan danin, tun dinhmunah Lawngtlai District chhungah Myanmar atanga raltlan lo lut mi 5,300 chhinchhiah tawh an ni a. An zinga mi 3,522 chu kum 18 chung lam niin, hmeichhia 1,739 leh mipa 1,783 an ni a, kum 18 hnuai lam mi 1,778 an awm bawk. An khawsakna, an ei leh in tur leh damdawi bakah, an mamawh hrang hrangte a tul dana ngaihtuahsak niin, camp hrang hrangah dan lam inzirtirna legal awareness campaign kalpui mek a ni.

Raltlan lo thleng tharte hi COVID-19 hri an kai leh kai loh endik hmasak zel niin, raltlan zingah hri kai mi 298 hmuh chhuah tawh niin, thihpui mi 1 a awm a, mi 14-in hri an vei mek a ni. COVID-19 hri danna pawh a la theite chu pek ve zel niin, dose khat la tawh mi 1,553 leh dose hnih la kim tawh mi 336 an awm a. Raltlante chet vel dan uluk taka vil zui a nih theih nan an mimal chanchin nen uluk taka chhinchhiah hna kalpui mek niin, raltlante hi ID card pe vek tura ruahman a ni a, tunah hian ID Card 98 siam tawh a ni.
Post i hmuh dan

Post a Comment

0 Comments