Ticker

10/recent/ticker-posts

NEW KHAWLEK KHUA BELCHIANG ANG AW

New Khawlek hi In 30 khua niin, Thenzawl ațanga chhimthlang lam km 30 vel erh awrh chauh a awm a ni. A chhim lam km 6-ah Buarpui khua a awm bawk.
A rukin ngaihzawng a neih theih loh. Zan lama i len rukna kha a tukah chuan khaw pumin an hre leh vek tho zel. Tumah rel a chi loh bawk.😀😀

Mahse, mikhual an lawm thiamin an fel hle. An khaw paho hi zanah inhmukhawmin an titi ho țhin.


Naupangho pawh mikhual lawm leh belchiang turin an thlen inah an leng lut ve nak nak țhin a, mikhual bengvar nih duh chuan sweet emaw chocolate emaw sem tur ken nual a sual lo.

KAWNG:
Thenzawl ațang hian kawngpui țha takin a pawh a, a zau nuamin metal road mam țha tak vek a ni. Amaherawhchu fur lai a nih chuan kawngko min a awm zeuh zeuh țhin avangin Thenzawl ațanga tlawng lui thlen thlak dawn hnai hmun hnih hmun thum velah kawng chhe lai deuh paltlang tura inrin a ngai a, tin, tlawng chhakah, an khaw thlen hma deuhin  metre 100 emaw dawn leiminna lai a awm bawk a, fur lai chuan motor hnuai hrut lo turin SUV a zin a finthlak ang. Mahse, kawngpui hi an siam țhat ve reng avangin kum khat a ral leh meuh chuan a lo țha  ve leh vek turah ngai ila. Car a tlawh pawh theih khua ngei a ni e.

A KHAWMI TE:
Mizo leh gorkhali an cheng a. Gorkhali hi an tlem zawk deuh a, mizo saphun an ni tlangpui.  Tin, inenhranna an nei em em lem lo.

EI BAR ZAWNNA:
Tlangram lo neih hi an eizawnna pui ber a ni a, Huanthlai nghet lam siam leh sangha dil siam an awm ve nual bawk.  Ranvulh an awm ve zeuh zeuh. A bikin kel tam tham deuha vulh an awm. A hnute hralh chhuah tham leh a puma hralh tur pawh an nei thei ang.
Mak tak maiin coconut hi an khuaah a țha duh em em mai a, țhenawm khua pawhin a tui in tur tein a rah an lei sak fo țhin.

An țhalai țhenkhat chu Aizawl lamah thiam zir leh inhlawhin an awm. Țhenkhat hotel management lama kala phai lam hotel liana hnathawka eizawngte pawh an awm. Hmasawn an tumin, rual elna pawh an nei țha zel a. A tlangpuiin, mipa aiin hmeichhia an thawkrimin an 'ambitious' zawk niin a lang.
Tin, rawtuai leh mautuai hi a awm hunlai chuan an khaw daiah pawh eng tik lai pawhin khamkhawp khawrh tur a awm reng . A țhen chuan eirawng bawl dawnah chawhmeh a awm loh deuhin an han khawrh zawk thei bawk.

KHAW INEL/INER:
An pemsan khua, a khawhmun nghet zawk hi a hmar lamah a awm a, South Khawlek an ti. (Mizoram chhimbial chan lama awm a nih avang leh a aia hmarah a hming anpui a awm avangin South Khawlek hming hi pu a ni. North Khawlek khua chu Saitual District-ah a awm).
(pssss ..🤫🤫...
Tlemin an iner ve deuh hlek mai thei. In 29 emaw vel lehlam an ni a, Village Council inthlanah kan "veng" tia mahni khawlam zawk thlantlin an tum fo țhin awm e. 'Keini lam' tih leh 'anni lam' tih hi a ri ve fo țhin. In awm zat intluk thuak an ni naa New Khawlek lamah hian mihring an tam zawk.


SPORTS:
Khaw te takte e ti lovin sports lamah an duai lo. A bik takin volleyball hi a khaw nawt deuh thawin an khel a. In 30 lekah pawh hian mipa team 4/5 an nei thei a, hmeichhe lam pawh intum tham an awm. Naupang lam team thlengin. One day tournament a lar hle! A mihring tlem zawk hret South Khawlek lam hian volleyball-ah chuan tlemin an khan lo deuh hret zawk a nih pawhin a mawh lo ve!
Football lamah chuan tunhma deuh ațangin an khaw tlangdung leh chhehvelah  "Dengsur" khua an thiamin an chak deuh ber țhin a ni awm e.

KOHHRAN:
Kohhran lamah chuan Lunglei District a nih angin Mizoram Baptist kohhran awmna hmun a ni a, kohhran dang a awm lo. Tlemte nimahse kohhran khata awm chu an inlungrual phian. Kohhran țhalai sports tih pawhin a khaw nawtin an ințawiawm a, an hlim hle zel.

MOBILE CONNECTIVITY:
BSNL leh Airtel a hman theih a. An khaw sikul tlanga tower awm airtel signal a chak. BSNL hi chu an khaw țhenawm Buarpui lam tower ring an ni a, data inthawn nan chuan a zia reng naa thlalak leh video inthawn dawn chuan dawhtheih deuh a ngai.

TUI:
An harsa lem lo. An khawlaiah herh chhuah turin an khaw tui lâk a awm. A țhen chuan anmahni in bulah herhchhuah theihin an siam. 
Tuikhur țha tak, an khaw hmawr lam, North Khawlek lam kawngah an nei a, a kang chat ngai lo.


Tlawng lui hi 10km emaw vel chauh a ni a, tui chenna tur an nei țha. Lui dang sangha leh chakai han man mai theihna tur pawh an nei nual.
(Thlalak hi New Khawlek khua leh a chhehvel a ni e)

Post i hmuh dan

Post a Comment

0 Comments