Governor-in MZU tihchangtlunna tur Rs 60.31 crore projects lungphum a phum

Aizawl, the 16th February 2022: Governor Hari Babu Kambhampati chuan vawiin khan Mizoram University Campus, Tanhrilah  EWS Scheme hnuaia Rs 60.31 Crore a thawh tur project 6 bul tan nan lungphum a phum.  He project hnathawhna sum hi MZU chuan Ministry of Education hnuaia University Grant Commission atangin a hmu a ni.  Engineering Projects (India) Limited (EPIL) chu he project thawk tura thlan an ni a; anni hian MZU, Tanhrilah building 4 leh Pachhunga University College Campus-ah building 2 an sa dawn a ni.

EWS hnuaia building sak tur te bul tanna atan lungphum a phum hnuah Governor chuan thu a sawi a. Zirlaite tana zirna thatak  pe tura MZU in theihtawp chhuahna leh a tanlakna te Central sawrkarin a hriatpui a. Hmasawnna ruhrel lian tak tak sakna tur sum a rawn ruahman chu a lawmawm takzet a ni a ti. Tunah hian MZU chu University naupang te ni mahse la, India ramah pawh University tha pawl tak a ni tawh a. He hlawhtlinna ropui tak hi Mizoram tan chuan inchhuanna tham a ni a. Tun dinhmun, MZU in a thlen theihna kawngah hian thawktute inpekna leh zirlaite hlawhtlinna  a langsar hle a ni a ti a. A bik takin, tuna Vice Chancellor leh a thawhpui fak an phu hle a ni a ti.

 Zirna kalphung thar - National Education Policy (NEP) 2020 a taka kalpuinaah pawh MZU chu hmahruaitu zingah an tel a; an tanlakna te hi central sawrkar chuan an rawn hrechiang em em a ni a ti. Tun dinhmuna pawimawh ta ber chu Skill Development a ni tih sawiin hemi huangah hian MZU chu tun aia nasa zawka tan la turin a chah a. National Education Policy (NEP) 2020 in a tum langsar tak chu ‘hna zawng’ aia ‘midangte hnathawhtur leh eizawnna siam thei’ mithiam tam zawk chherchhuah a, India ram chu khawvel thluakbur a siam a ni a ti. He policy hnuaiah hian India chuan  khawvel pum huapa mi tangkai leh lehkhathiam chhawrtlak  tam tak  chherchhuah a tum rualin ei leh bar kawnga ram intodelh a siam pawh a tum tel tih a sawi a. Helai tak hi, he zirna kalphung thar in a tum ber leh a laimu a ni tih hre reng tur leh hemi lam hawia zirna kalpui zel turin MZU mithiamte chu a fuih ani. MZU in hma a sawn zel na atana pawimawh, hmasawnna ruhrel lian tak tak din a ni tur chu phurawm atih thu a sawi a. MZU tana thil pawimawh ber erawh zirlaite thiamna sang ber pe tura zirtirtute intahhriam zel leh National Education Policy (NEP) 2020 inkaihruaina anga chher tum a ni tih a sawi bawk a ni.

 National Institutional Ranking Framework tehna ang chuan Mizoram University chukum 2020 chhung khan India rama University thazual zinga   67-na a ni a. Times Higher Education Impact Rankings 2021 in khawvela university thazual 1115 a thlan chhuah zinga 601 leh 800-na inkarah Mizoram University chu a lang pha a. Kum 2019 khan NAAC chuan  Mizoram University chu ‘A’ Grade a lo pe tawh bawk a ni.

 Finance Officer Report in a tarlan dan chuan EWS scheme hnuaiah hian MZU campus-ah  Boys Hostel  1– seat 100 awm theihna ( Rs 10.7 Crore), Girls Hostels 2- seat 100 ve ve awm theihna ( Rs 21.28 Crore) leh Academic Building 1( Rs 15 Crore) sak a ni dawn a. PUC campus-ah seat 50 awm theihna Boys Hostel 1 (Rs 5.85 Crore) leh Academic Building 1 ( Rs 7.46 Crore) te sak a ni dawn a ni.

 EWS project lungphum phumna hun hi Prof Lalnundanga, Registrar in a kaihruai a. Prof KRS Sambasiva Rao, Vice Chancellor hnen atangin MZU report tawi ngaihthlak a ni a; Prof. Vanlalchhawna, Finance Officer in technical report a pe a. Nageshwar Rao, Executive Director, EPIL  hnen atangin project thawh dan tur tlang pui ngaihthlak a ni leh a. Contractor te chu thla 18 chhunga an hna thawk zo tura tih an ni a. MZU leh contractor te inremnaah hian project khawih chhungin project estimate chu ennawn theih a ni dawn lo bawk a ni.

- DIPR