Er Zira'n Tlawng Lei (Sihhmui) leh NH44A siam mek endik




Aizawl | Feb 17, 2022: Vawiin hian Mamit Bialtu MLA Er H. Lalzirliana, Vice Chairman, Road & Infrashtructure Develoment Board (RIDB) ni bawk chuan Tlawng Lei leh NH44A/108 siam mek chu a hmunah kal chilh in a endik a ni. Er. H. Lalzirliana, MLA hi SE, NH C-1 PWD, EE, NH Div – 1 PWD Govt. of Mizoram, General Manager, M/s Ratna Infrastructure, President Mamit District VC Association,  MJA Mamit District hruaitute, Chairman Joint VC Mamit leh Party hruaituten an tawiawm a ni.

Er. H. Lalzirliana, Vice Chairman, RIDB chuan Tlawng Lei (Sihhmui) siam mek chu a hmunah tlawh nghal in, hna thawktu Company te chu tha tak leh chak taka hna thawk turin a chah a, Tlawng lei hi Airport panna kawngpui a awm a nih avangin Mizoram luh leh chhuah na kawngpui pawimawh ber pakhat a nih avangin Lei pawimawh tak a ni a tia. Hun hmasa lamah Tlawng Lei siam chu alo pamtul tawh avangin leh a chim avangin nunna chan hial an lo awm tawh a, chutiang thleng lo tur chuan theih tawp chhuah turin hnathawktute chu a chah bawk a ni.


Tlawng Lei siam mek hi Poddar Infotech Pvt. Ltd. in an thawk a, kum 2021 March thla atang khan hna hi thawhtan a ni a, tun dinhmunah 25% vel hna zawh tawh niin March 2023 a zawh hman tura tih a ni a, Company lam chuan an agrement in hna zawh hun a tih hmaa hna thawhzawh an tum a ni. Tlawng lei siamna tur hian Rs. 36.99 Cr. ruahman a ni.

Mamit MLA Er. H. Lalzirliana, Vice Chairman, RIDB chuan NH44A/108 kawng siam chu tlawh in a endik nghal a, hna thawktu Company te chu tha tak leh chak taka thawk a kawng siam turin a hrilh a, NH44A/108 kawngpui chu khawthlang mipuite tan mai bakah Mizoram tan kawngpui pawimawh tak a nih thu sawiin, Tripura, Assam mai bakah Bangladesh nen inkalpawhna atana kawngpui pawimawh a nih mek avangin kawng siam hmabak siam tur tlem la awm pawh fur thlen hmaa siam zo vek turin a hrilh a. Company te chu chak taka hnathawh a nih theih nan, hnathawhna hmanrua leh thawktu dah belh nghal turin a hrilh nghal a ni. Tin, Kawngpui tha leh tlo siam a nih theih nan Side Drain uluk taka siam turin a chah a, kawng siam chak an tum luat avanga tha lo taka kawng siam lo turin a hrilh nghal a, a tul ang zel in a enpui zel dawn thu a sawi a. Tin, Mizoram PWD (Highway) te pawh hna tha tak vil turin a chah nghal bawk.

Pu Mazira chuan amah NH44A kawng siamna tur MORTH lam in an sanction leh theih nan Mizoram Chief Minister Pu Zoramthanga hmalakna chu fakawm a tih thu leh Pu K. Vanlalvena, MP, RS in nasa taka Delhi lamah hma alak avangte leh Department a thawkte in pekna leh thawhrimna avanga, kawng siam chhunzawm theih a ni tur chu lawmawm a tih thu a sawi a ni. Tin, amah  tawiawmtu khawtlang hruaitute, chanchinbu mite leh tlawmngai pawl hrang hrangte chu kawng tha taka siam zawh a nih theih nan theih tawp chhuahpui a, vilpui turin leh thil dik lo leh tha lo a awm a nih chuan rang taka amah hriattir thin tura chah in, hmasawnna tura thawhhona kawngah inlungrual taka thawhho pui atan a sawm bawk a ni.

Tun dinhmunah NH44A/108 siam mek hi Dapchhuah – Dampui peng thleng km 6 vel black top loh la awm in, Darlak leh Tuidam inkar Km 4 vel siam loh la awm bawk in, Teirei Lei dawh tur ala awm bawk a ni.


Mizoram PWD Highway hotute pawh in NH44A siamna tur sum sanction a nih theih nana Pu Zoramthanga, CM leh Er. H. Lalzirliana, Vice Chairman, RIDB te hmalakna chu fakawm an tih thu leh an taimakna avanga kawng siamna tur pawh hmu thei an nih thu an sawi bawk a, Pu Mazira ngenna angin hnathawktu Company te pawh ulauk taka an vil tur thu an sawi a ni.

Kawng siamtu Company, M/s Ratna Infrastructure hotute pawh in Dapchhuah - Dampui kawng la siam loh pawh tun thal chhung ngeia siam zawh hman an tum thu leh hnathawhna tur hmanrua leh hnathawk tur tam zawk an ngaihtuah zel thu an sawi bawk a ni.


NH44A (Km 11.000 to 114.618 Km) Lengpui – Mamit – Langkaih (Tripura) hi kum 2010 khan MORTH chuan sum sanction in, kum 2011 atangin hna thawh tan a ni a. Harsatna hrang hrang avangin kawng siam hna hi a chak lo hle a, Company lam in hnma an thawh muan avangin leh MORTH lam in sum an sanction that loh avangin hnathawh mumal loh in a awm reng a, kawng siam zawhna tur sum pawh a tawp mai tura ngaih hman a ni a. Pu Zoramthanga, Chief Minister Mizoram, PWD Minister hmalakna bawhzuiin Rajya Sabha MP Pu K. Vanlalvena leh Mamit bialtu MLA Er. H. Lalzirliana, Vice Chairman, RIDB te chuan, ni 21 October 2021 khan Pu Giridhar Aramane, Secretary, Ministry of Road, Transport and Highways (MORTH) chu hmu in NH44A/108 kawngpui siam mek Central atanga hun rei tak Fund Release loh avanga harsatna a awm thu leh revised estimate (RE-3) rang taka sanction turin an ngen a ni, he hmalakna avang hian ni 7 December kum 2021 khan Secretary, MORTH ho a meeting chuan NH44A/108 revised estimate (RE 3) chu a thuphung in an pawm a, ni 15 December 2021 khan sanction approval pek niin, kumin 2022 December ni 31 ral hma ngeia kawng siam hna zawng zawng hi zo vek tura tih a ni.

Post a Comment

0 Comments