Sainik School Principal in Governor Hari Babu Kambhampati an Sikul tih hmasawn dan tur sawipui

Aizawl, the 18th January 2022: Vawiin chawhma khan Raj Bhavan-ah Sainik School, Chhingchhip hotuten Governor Hari Babu Kambhampati an hmu a. Sainik School, Chhingchhip hmasawnna hrang hrangte sawipuiin hmachhawp te pawh an sawipui bawk a ni.


Governor Hari Babu Kambhampati chuan Mizoram-ah Sainik School kan nei chu thil lawmawm tak a nih thu sawiin Sainik School hotute chu India ram hmundanga Sainik School te aia tha zawk Mizoramin a neih theih nan tan la zel turin a fuih a. An hmasawnna te leh an mamawhte pawh zawtin a remchan dan anga theihtawp a lo chhuahpui tur thu a sawi a ni.

Wg.Cdr Sharul Hameed, Principal leh Maj S.Kalyan, Vice Principal te pawhin Sainik School chhingchhip chuan hun reilote chhungin nasa takin hma a sawn thu an sawi a. Tunah hian Pawl 6 atanga pawl 10 thleng zirna kalpui mek tih tarlangin Zirlai 300 an nei mek tih an sawi a ni. Hun reilote hnuah Pawl 11 leh pawl 12 zirna hawn belh tum a nih thu te, chumi hunah chuan zirlai awm thei zat 420 an neih an rin thu te an sawi bawk a. India ramah Sainik School, Chhingchhip chu Sainik School 33 zingah Hmeichhe naupangte luh ve theih nana bul tanna hmun a ni an ti a. Tunah hian Sainik School dangah te pawh Hmeichhe naupang tan admission hawn tan mek a ni an ti. Sainik School, Chhingchhip-ah hian tualchhungmite tan 67% seat hauh a ni a, 33 % chu pawnlammi te tan a dil theih a ni.

Wg.Cdr Sharul Hameed, Principal, Sainik School, Chhingchhip chuan School chhung hmuhma chei leh siamthat hna chu state sawrkar kut a nih thu a sawi a. Mizoram sawrkar atanga School cheibawl hna thawhna sum an dawn thin thu te pawh a sawi a ni. Principal chuan tunhnai deuh atang khan he tanpuina sum hi an dawn tawh lo thu a sawi a. State danga Sainik school te ruala ke pen ve thei tur te leh hmunhma tha zawk nei tur chuan theihtawp chhuah a tan lak a hun tawh a. State sawrkar atangin Sainik School, Chhingchhip cheibawlna tur pawisa pawh a hma thei anga dawn an mamawh tawh hle a. Hemi chungchangah hian Governor chu theihtawp chhuah sak turin an ngen nghal bawk a ni.

- DIPR

Post a Comment

0 Comments