Rampum huap Visual Arts 3D painting-ah Mizoram aiawh Lalruatfeli pakhatna

Aizawl | January 18, 2022: India ram state hrang hrangte intihsiakna National Kala Utsav 2021 January 1-12,2022 chhunga neih result puanchhuah Visual Arts 3D painting-ah Mizoram aiawha chhuak Lalruatfeli, Class IX, Kids Care School, Ramhlun South, Aizawl chu pakhatna a ni.


Kala Utsav 2021-ah hian Ministry of Education chuan a ruahman sa angin category hrang hrangah intihsiak a ni a, chungte chu - Vocal Music - Classical, Vocal Music - Traditional Folk, Instrumental Music - Classical, Instrumental Music - Traditional Folk, Dance - Classical, Dance - Folk, Visual Arts 2-Dimensional, Visual Arts 3-Dimensional, Indigenous Toys and Games te an ni. He intihsiakah hian lawmman pakhatna atanga pathumna dawngten pawisa fai bakah Certificate, Trophy leh Medal an dawng a, a tel zawng zawngten certificate an dawng bawk. Category hrang hranga lawmman pakhatna dawngten pawisa fai Rs 25,000/-, pahnihnain Rs 20,000/-, pathumnain Rs 15,000/- an dawng a ni.


Kala Utsav hi Ministry of Education-in India rama hnam zia rang chi hrang hrang tun hma atanga tun thlenga la chin chhoh zel zirlai talent nei tha tak tak ten an pholanna leh intihsiakna atana a buatsaih a ni a. Kum 2015 atang khan India ram state hrang hranga Secondary School leh Higher Secondary School zirlaite chu he Kala Utsav-ah hian an intihsiak thin a. National level-ah NCERT-in he Kala Utsav hi an buapui a, Samagra Shiksha chuan state tinah he intihsiak hi an buatsaih thung a ni. State hrang hrangten mahni state chhungah theuh Kala Utsav hi an buatsaih a. State Level Kala Utsav-a State tina a ti thate chu National Kala Utsav-ah an intihsiak leh ta thin a ni.


Kala Utsav hi hripui leng avangin tun hma angin kalpui hleih theih a ni lova, State Level leh National Level te hi online-a neih a ni. National Level-ah hian School Education Directorate Conference Hall atangin zirlaite hi online-in an tel a ni. National Kala Utsav-ah hian Mizoram hi top three-ah a lo lang ve tawh thin a, pakhatna dinhmunah tun hi a lan vawikhatna a ni. Mizoram aiawha National Level-a telte inlan dan hi Ningani zan dar 6-ah DDK Aizawl-ah tihchhuah a ni ang.

- DIPR

Post a Comment

0 Comments