MÂK leh SUMCHHUAH

- K. Remruatfela

Kan Mizo hnam dâna inthenna ki pawimawh tak pahnih kan neih chu - 'Mâk' leh 'Sumchhuah' te hi an ni a. A tawi zawngin han sawi ta mai ila 'Mâk' kan tih chuan mipain an nupuite 'Neih tlâk i ni lova, ka nei peih tawh lo che' an tihna a ni a. 'Sumchhuah' a nih erawh chuan a hmeichhia zawkin an pasalte hnenah 'Innghahna tlâk i ni hlawl lova, i bulah ka awm reng peih tawh thlâwt lo a ni' a tihna a ni ve thung.

Chutianga chu thil nihna a nih avang chuan kan pi leh pu, nu leh pa te kha chuan pasalte mâk nih leh nupuite sum chhuah hnan nih kha an hlau ngawih ngawih a. Thil zahthâk taka an ngaih avangin chutiang dinhmuna an lo awm a nih pawhin thupbo hram hram an tum thin. Tlângkam titi-ah te hial pawh mâk hnu neih chu tluan lohna a ni tih te kha sawi dan thin a ni a. Nu leh pa tumahin an fapate mâk hnu neih tir an duh ngai lo! Mipa tan pawh nupuite sumchhuah hnan nih chu tlâwm thlâk tâwpkhâwk a ni a. Vantlâng mitmei lakah nasa taka inkiltawihna tham a ni thin.

Tunah erawh khawvel hmasawnnain min chîm chhoh tâk vang nge, Mizo Marriage, Divorce & Inheritance of Property Act, 2014 in 'Mâk' leh 'Sumchhuah' azira nupa inthen bungraw insem dân tur chiang taka a târlan fak fak tâk vâng zâwk, ro tha zâwk chan duh vânga a leh a linga pasalte lak atanga Mâk nih phût, nupuite sum chhuah tîr phêt tum kan kat na nuk a. Mipate'n nupuite sum chhuah hnan nih kha tlâwmah pawh an la ta mang lova, hmeichhiate lahin Mâk hnu nih kha zahah pawh an la mang tawh lo! Chung zawng zawng aia la mak zâwk cheu chu vantlâng mipui pawhin Mâk leh Sumchhuah hmanga inthenna hi chuti tehchiama kan thliar hrang ta lo hi a ni. Hei hi khawvel hmasâwnin min thanharh tîr tâk vang nge, ro sum itna hian kan mit a ti del ta zâwk tih erawh thil hriatthiam har tak leh ngaihtuah ngun ngâi tak a ni.