Ticker

10/recent/ticker-posts

MNF sorkar hi a sorkar chhunzawm zel chuan kan duh loh ramah min hnuk lut dawn - Lalsawta

Aizawl | January 18, 2022: Vawiin January ni 18, 2022 (Thawhlehni) khan kum 2022 atana Congress Party Office, Congress Bhavan hawnna hun hman a ni a. Congress Bhavan hawnna hun hi Pu Lal Thanzara, MPCC Vice President-in a kaihruai a, Rev. KC Vanlalduha'n hunserh hmangin, MPCC President Pu Lalsawta leh Pu Zodintluanga Ralte-ten thu an sawi bawk.


Pu Lalsawta, MPCC President chuan, "Tuna kan ram dinhmun hi Mizoram mipui hian a tha lo kan ti a, kei ngei pawhin kan dinhmun hi a tha lo ka ti. Mizoram hi Mexico-te, Columbia-te anga  misualte rorelnaah kan siam ang tih hi ka hlau a ni. Kan ram hun tawng mekah hian mipui chuan tan tur lam kan hre vek tawh a, mahse, kan sorkar hi a ni lo lamah a tang niin mipuiin kan hre tlat. Kan ram tichhetu hi huai taka kan do a ngai a. Mizoram dinhmun chhe mek siamtha tur leh, sorkar tha siam turin kan sorkar leh hi a tul tlat a ni. Tuna Mizoram tibuaitu ber chu zep rual lohin pawisa a ni. Pawisa duh lutukna avangin kan ram a buai mek a, sorkar a buai mek a, hei hi siamthat kan tum a ni. He kan thil tumah hian kan mal tan dawn lo tih kan hria. Mizoram mipuite hian sorkar tha hi kan duh ngawih ngawih tawh a, chu ngei chu Congress Party hian pek kan tum a, sorkar tha siam kan tum a ni. Politics-a kan awm chhan hi hausak belh lam a ni lo, thuneihna neih belh ringawt lam a ni lo, Mizoram siamthat leh tihhmasawn hi a ni zawk," a ti bawk.


Pu Lalsawta chuan, "He MNF sorkar hi a sorkar chhunzawm zel chuan kan duh loh ramah min hnuk lut dawn. Hei hi Mizoram mipui hian kan dan a ngai a ni. Kum 2023-ah kan inthlang dawn a, mi hausaten an hausakna hmanga mihring lei an tum leh dawn. Hei hi Congress Party chuan kan phal dawn lo. Congress Party chauhin kan phal dawn lo a ni lo, Mizoram mipui hian kan remti dawn lo. Khawvela mihring lei theih pahnih chiah an awm - Bawih leh Nawhchizuar; hetiang ang leka min hmutute kutah hian kan ram hi kan hlan tur a ni lo. Mi hausate hi kan hua a ni lo, hausakna hmanga vote lei tumte hi kan duh lo a ni"


"Pathian zara sorkarna kan siam a nih chuan Pathian duhzawng kan ti dawn a, That loh theih lohna bawm kan siam dawn a ni. Israel-ah Mizo tam tak an pem thla a, Israel-a an awm chuan thatchhiat a thiang lo, eiruk a thiang lo, ruih buk buk a thiang hek lo. Mizoramah pawh entawn tur kan nei reng - Biate-ah chuan fai loh theih lohna bawm an siam a, Baktawngah Pu Ziona pawlten thatchhiat theih miah lohna bawm an siam bawk. Mizote hian that te, dik te hi kan tlin tih a chiang a ni. Mizote hian sorkar tha siam hi kan tlin a ni" a ti.


Pu Lalsawta chuan, "Engemaw avanga Congress Party lo chhuahsan tawh zawng zawngte lo kir leh vek turin tih tak zetin kan sawm a che u, in tan hmun a awm e. Tin, sorkar tha siam kan tumnaah hian Party dang mite, party a la awm ngai lo te, Mizoram mipui a duh apiangin min rawn zawm rawh u, kawngka zau takin a inhawng e. Min zawm thei kher lo a nih pawhin, in awmna hmun apiangah sorkar tha siam kan tumnaah hian min lo thlawp turin kan sawm che u a ni. MNF sorkar hnuaiah Krismas vawi 1 chiah kan hmang tawh dawn a, a bak an sorkar tawh dawn lo. Kum 2023 Krismas chu Congress party leh mipui siam sorkar tha hnuaiah kan hmang tawh ngei ang," a ti bawk.


He hunah hian Pu Zodintluanga Ralte, MPCC Treasurer pawhin thu sawiin, "MNF sorkarah chuan Finance Department-in a tlachawp takmeuhin sorkar hnathawk hlawh tur an dapkhawm thin. Congress sorkar lai, Finance Minister huaisen Pu Lalsawta hnuaiah kha chuan a hun takah sorkar hnathawkten hlawh an la thei zel a, an mamawh zat GP Fund an la thei. Tuna Mizoramin Finance lama harsatna a tawh mek siamtha leh theitu chu Congress Party hi a ni," a ti bawk.


Congress Bhavan hawnnaah hian tawngtairualna hun hman a nih bakah ram leh mipui tana thahnemngai taka thawk tura inpekna thutiam chham rualna hun hman a ni.





Post i hmuh dan

Post a Comment

0 Comments