Ruatfela Nu FIR thehluh Champhai PS-ah la ziak lut lo

Aizawl | January 17, 2022: Dan kalha kuhva leh thil danga sumdawnna a inhnamhnawihte chhui chhuaka an chungah dan anga hmala tura Vanramchhuangi (Ruatfela nu)-in December 29, 2021- a Champhai PS-a FIR a theh luh chu court-ah chhui phalna lak ngai a nih vangin tun thlengin case register a la ni lo nia thudawn a ni. 

Ruatfela nu hian Indi-Myanmar border a dan kalh a kuhva a sumdawna lian tham tak che vel mekah dan kengkawhtu department thenkhatte chuan an kut ni lo a sawiin kut an silsan titih a ni, a ti a, dan kengkawhtu Mizoram police-te chuan an thuneihna huamchhungah dan kalh a chetna a thleng a nih chuan a tul anga chhuichian leh danin a sawi anga hmalak chu India danpui  hnuaiah an tih ngei ngei tur a ni a, lian tham taka kuhva rah hmanga sumdawnna chu an uipui tuilian thlir ngawt tur a ni loh avangin FIR chu a thehlut tih a sawi.  

Ruatfela nu chuan kuhva phur truck veivak ten way bill an nei vek em tih te, kuhva te chu India ram chhunga tharchhuah nge ram dang atanga lakluh tih te, kuhva sumdawnna kalpuituten

GST leh chhiah an pe ni anga an insawi chu Central finance revenue leh Excise & custom department ten an dawng ngei em tih te, chhiah pekna receipt nia an sawite chu dan ang taka pek chhuah a ni em tihte chu a zawhna a nih thu a sawi a, kuhva a sumdawna kalpuitute leh adress kimchang, kuhva an lakna hmun leh rate leh an hralh leh dan kimchangte chu police-ten an chhuichhiah a beisei tih a sawi bawk.

Thudawnna in a tarlan danin Ruatfelanu FIR thehluh hi mi mal inpuhna a ni lo a, chung ang chu chhui phalna court a dil ngai a nih vangin police lamin chhui phalna an dil mek a, hemi vang hian tun thlengin case ziah luh a la ni lo. Vawin thawhtanni hian court hawn a nidawn a, thubuai ziahluh chungchang pawh chak zawka hmalak theih a nih beisei a ni.

- (Zalen)

& ZoRin