Aizawl | January 23, 2022 : Vawiin January ni 23, 2022 Pathianni chhun dar 1 vel khan Sihhmui naupang David Lalmalsawma (6) s/o Richard Lalramthara leh a thian pahnihte chuan, Davida te in chhak lama Rail station sak mek panna kawngah cycle an chuang a, an haw lam chu Davida'n a khalh mek laiin bolero pakhat chu chhak lam atanga rawn tlan thlain Davida cycle khalh lai chu su thluin a chil zui ta a, ka chhawn lohin Davida hi a hmunah a boral.
Davida thian naupang pahnih ten an sawi danin motor hi bolero dum lam niin an sawi a, davida a chil hian ding lovin a tlan tlang a, tunah hian naupang chil hlumtu motor hi zawn mek a ni.
Sihhmui YMA Branch President Pu Lalthlengliana hnen atanga thu dawn danin, motor hian naupang Davida hi a lu, a chal vei lamah chil hmasain a awm bawrah a zawh niin a lang a, motor-in a chilna hi a sawp hneh hle a ni.
Davida ruang hi vawiin vek hian Sairang PHC ah posmortem a ni a, zaninah tlaivarpui a ni anga, naktuk lamah vui a ni ang.
- Mizo Special Report / Vanneihthanga Vanchhawng
Post a Comment
He post chungchanga i ngaihdan lo sawi ve rawh: